सवाङ स्हाड़ै ए जैहर, पीना हा कुन्ने ?

शरीकें दे घेरे च, जीना हा कुन्ने ?

जनून अपने दी ईन पेई गेई निभानी,

लंगारें गी चाङ-चाङ नै सीना हा कुन्ने ?

भरम तेरा शैला, जे रक्खना निं होंदा,

इ'नें लारें कन्ने पतीना हा कुन्ने ?

शरीकें दै लग्गी दी स्हालन निं जन्दे,

असेंगी तां देना ए मीहना हा कुन्ने !

कुसै हिरख-हिरसै दा सहारा निं होंदा,

इ'नें भोले लोकें चा जीना हा कुन्ने ?

गुआई निं होंदी जे गैरत मनक्खें,

गलाना इ'नेंगी तां हीना हा कुन्ने ?

निकलने दा घेरे चा होंदा जे रस्ता,

फिरी घेरे अन्दर समीना हा कुन्ने ?