बोल तविये, तुऐं बोल हां,
ओठ इतिहासै आले, सीते दे खोल !
तू समें दी ऐं नशानी-बोल तू,
बगदे पानिएं दी जबानी-बोल तू।
गोआही दे, सूरजै दी धी ऐं तू,
इस चाल्ली चुप-चबीती की ऐं तू,
तूं ते सब किज अपनी अक्खीं दिक्खेआ,
बीतेआ दबक्खीं जे किश तूं दिक्खेआ।
सदिएं शा खतोहते रेह म्हेशां खड़कदे,
बे-बस, दुखी ओह रेह तड़फदे -
की कुसै इतिहास ए लिखेआ नेईं?
की नेहा मैहम कोई मिलेआ नेई?
की सिर्फ राजें दी गै क्हानी लिखी?
उं'दी मरजियै मताबक, उं'दी जबानी लिखी
मन्नेआ राजें दा बी इतिहास ऐ
वक्त उप्पर हाकमी दा डर बी खास ऐ।
पर इक्क गी इक्की दे सखाने आहले ओ,
पाठ राजभगती दे सखाने आहले ओ।
राज-दरबारों दे घेरें रेही करी,
खिल्लतां ते सन्नदां सौ लेई करी।
जो तुसें लिखेआ-बनाया ऐ जरो,
जो तुसें चुनेआ-सजाया ऐ करो।
अस उसी इन्साफ कि 'यां आखचै ?
ए ते कसीदे-खानिएं दा इतिहास ऐ,
बस्स राजें कन्ने रानिएं दा इतिहास ऐ।
होर बी इत्थे किश होआ जां नेई,
दूआ कोई लाल माऊ जम्मेआ जां नेईं?
डुग्गर दी दत्त, रणपत दी कत्थ की नेईं लिखी,
डीडो बीर बांकड़े दी सरमत्थ की नेईं लिखी,
बावा जित्तो की तेरे मन भाया नेईं
बावा अंबो याद की तुकी आया नेई
इं'दा की लखोआ ओ इतिहास नेई ?
इतिहास कन्ने की कीता इन्साफ नेईं
उं'दी कत्थ बोल, कहानी की होई गेई ?
सच्चै दी जोत सुच्ची, नमानी की होई गेई?
बोल तविए !