मेरी कताब
इक किरण - फिक्की जेहड़ी पौन्दी नेईं,
धर्म-जाति, रंग धरती दे इ'नें
कैदखानें कैद जो रौंहदी नेईं
मेरी कताब
लोऽ जिदी निरमैल, कोमल
आदमी दी नजरें गी निर्मल करै
सृश्टि दे सौ राज़ खोहलै
खोहल्लियै अग्गें धेरै,
आदमी दी आतमा गी जो बझालै
झुनकियै, प्यार करियै मुस्कराइयै
ते आखै-
"भोलिए! पनछान अपना-आप तूं
तु'म्मी किरण ऐं !
अपने गितै होई गेई सन्ताप तूं
न्हेरे अंदर तूं घिरी दी रेही करी
होई गेई इक दाग ऐं!
बेसुरा इक राग ऐं
इक कलि कोमल ही तूं
खिड़ना जिसगी चेतै नेईं
अपने शलैपे दी नेईं जिसगी खबर
ओ बेखबर ! तुम्मी किरण ऐं, जाग तूं।"
मेरी कताब,
मेरे गित्तै ए किरण, इक लाजवाब
रोशनी ऐ,
चन्न-सूरज स'ब्बनें थों सिरमौर ऐ,
ए नेईं हुंदी कुतै।
तां सैकड़े ए चन्न-सूरज बी करें
दूर करी सकदे नेईं अज्ञानता दे गुप्प न्हेरे,
आदमी तां आदमी बनदा नेईं।
मेरी कताब ए मेरी मिट्टी दी खुश्बू
ए मेरी धरती दी देन,
मेरी धरती दे गै बेटें दी चमक
उं'दी सोचें दा नचोड़
सुच्चे खिनें दी साधना
सुच्चे खिनें दी लालसा
सुच्चे खिनें दी कामना
मेरी कताब
ए नमां रिश्ता मनुक्खें दा जिसी
धर्म-धरती, रंग-जाति दा निं डर
आदमी लेई आदमी दा प्यार ऐ,
जीवन दा सिंगार ऐ
ते मेरी दुनिया दे मालक।
ए जढ़ी तेरी कताब
धर्म-धरती, रंग-जाति दा निं डर
आदमी भलखोए दा
जादूं च बेसुध होए दा
हर कुसै दी डफ्फ अपनी
हर कुसै दा अपना राग
आदमी गी आदमी शा, इस खंडाया ऐ सदा
इसने लड़ाया ऐ सदा
इतिहास सारा गै मेरा, तेरी कताबै दी कथा,
खूनी लड़ाइयां, कतलो-गारत
यलगार ते मारू जेहाद
तबलीग ते तेगो-तबर
तेरी कताब,
हिरख दे बोलें चा नफरत
त्याग दे शब्दें चा कीता
तेरी कताब
आदमी दी आदमी गी नेईं पछान
ए नेईं थ्होंदी करें
तेरी कताब
तां असेंगी होना नेईं हा ए खुमार,
जेहदे करी होइयां लड़ाइयां बे-शुमार
ए नशा, नजरें गी जे ब'त्री देऐ !
अपनी मखलूका गितै
अपनी इस सृश्टि लेई
कैसा ऐ, ए तेरा प्यार
तेरा गै संसार ऐ
तेरी कताब !