अजें बी ऐ दाऽवा असें-
जे देनदार तेरे आं/परस्तार तेरे आं,
तेरा चेत्ता औंदे इक गौह जागी पौंदा ऐ,
न्हेर-मन्हेरे इस अपने इतिहासै दे,
सुन्ने गलियारे च
जोत इक जगी पवै।
पर देनदारी कैसी ऐ?
एह कर्जदारी कैसी ऐ?
कर्ज़ निं चुकाया कुसै
डुब्बे दे आं अपनी गै इस शर्मसारी च।
ते तेरे इस रिणै दियां
देआ 'ने आं किस्तां ।
हर साल तेरे इस उज्जड़े दे थे पर
चौकी-जन देने दी रसम नभाई जन्नें
दिन ए मनाई जन्नें
ते बरस-गंढें तेरियें गी घोखी लैन्ने, गिनी लैने
दो सौ ते बाहमी ऐ, तेरी ए जयंती अज्ज।
कुसै कलाकारै, जिसी अपनी गै कल्पना चा चित्तरेआ, बनाया ऐ
उस मूरता ख्याली गी। तेरी तस्वीर मन्नी
फुल्लें कन्ने पूजने दी पिर्त असें पाई ऐ।
मूरतै दे अग्गें हुन पैसे बी न चढ़न लगे।
बल्ले-बल्लें तुसेंगी बी/असें ऐ बनाई देना-
बे-जान मोहरा इक / गुंगा कोई देवता
तां जे हुन तुं'दे कन्ने
रिश्ता मनुक्खी कोई साढ़े कन्ने र 'वै नेईं
समां पाइयै, लोकें आई जाना गल टल्ला पाइयै
सुक्खनें सरीनिएं तै थान नमां होई जाना। करचै बी केह मियां?
तेरे समें आली ओ ईन-किंद रेही नेईं।
होई गे नकारे आं। होए बे-स्हारे आं
डोगरें दी बीरता दे नारे चार ला जेहड़ा,
भीड़ किश कट्ठी करी, नाटक रचाऽ जेहड़ा।
बिकी जन्नें ओहदे हत्थ। चली पौन्नें उ'दे पिच्छे
पेई जन्ने काहले आं/इन्ने बे-स्हारे आं।
चमक बिंद दिक्खी, भरम सुन्ने दा बनाई लैन्नें,
सुखने जगाई लैन्त्रे,
बारां ब'रे-भर जेहड़ी कीती ही लड़ाई तुसें
जाबर उस बैरिया दे मैले मनसूबें गी
मित्ती च मलाया हा ! मुल्ख ए जगाया हा,
ईन-आबरू दा झंडा तुसें जम्मू च झुलाया हा,
फ्ही सुच्चा बलिदान देइयै
सुरगा च बैठे दे बी
निहालपा च रेही होग सोच तुं'दी
डोगरा अज़ादी दी लड़ाई जेहड़ी छेड़ी तुसें
उसी मंजल तक लेग कोई
तुं'दी उस कपट-मौती दा
बदला बी लैंग कोई ।
गोली इक होर तुं'दे कालजे च लग्गी होग
दिक्खी लैता होग तुसें
बड़ी-ना-शुकरी ऐ धरत ए डोगरें दी
गैरता दे फुल्लें गी रास नेईं औंदी ऐ।
सुखना ओ तुं'दा मियां ! पूरा कि'यां होना ऐ?
छातिया दे रिसदे ओ जख्म भलोंदे कि 'यां
तेरे नेहा मर्द-माहनू । दूआ कोई होआ नेईं।
दो सौ ब'रे तुसें किन्नी शर्मसारी झल्ली ऐ।
हुन असें तुसेंगी दुआस नेइयों रौहन देना,
नमोशियें च डुब्बे दे इक्कले निं बौहन देना।
तुं'दी शर्मसारी गी मटाने गितै
असें हुन सोची लेआ,
रौहन निं देनिया न, पैलियां दुआसियां।
देवता बनाई असें तुसेंगी ऐ पूजना
इन्ने चिर तुस बे-घर-बाहर रेह ओ,
बेकार-जन रेह ओ।
हुन ए कार नमीं होई जानी तुसें ऐ।
सुक्खन जे इक अद्धी, पूरी-पूरी करी दित्ती तुसें
दिक्खेओ फ्ही मियां तुस,
मेले लग्गी जाने न,
जैकारे गूंजी पौने न,
भंडारे खु'ल्ली जाने न।
डोगरें गी हुन बस देवतें दा स्हारा ऐ,
डोगरा-समाज अज्ज होई गेआ नकारा ऐ,
इल्मा ते हुनरें दी दौड़ा च पछेडे आं,
हत्थ कम्म करने दी जाच असें सिक्खी नेईं।
रिज़क हलाल दा मियां जुड़दा ऐ मैहनतें ने,
मिहह्नतें दी पिर्त अजें साढ़े कोई पेई नेईं
समें कन्ने दौड़ने दा ढंग-थौह आया नेईं
ते टोर इस समें दी, तेज इन्नी होई गेई
जे रथ उस समें आहला नजरी च औंदा नेईं
हां, धूड़ ओहदी चौनीं पासें छाई दी सेही होऐ,
तुसें इस राम रौले कोला पर लैना के ?
हुन फुल्लें, अगरबत्तिएं दी सुगंधे इच र'वो तुस
शरधा दे फुल्लें दिया सेजा पर सवो मियां !