किस रिश्ते इच ब'न्नी लैते,
दर्दमंद तूं लोक नमाने ?
जि'नें तुगी नेईं करें बी दिक्खेआ,
जि'नें नेई दिक्खे जौहर तेरे।
सिर्फ सुनी ऐ, कहानी तेरी
पढ़ी कुतै कोई लिखत अधूरी।
की एह तेरे परस्तार न?
की एह तेरे पर गौहे करदे न?
तेरी कहानी दे पर्दे गी
बार-बार चुकदे-पुटदे
अपने भावें दे रंगें नै
अपनी सोचें दी "कैनवस" पर
तेरी इक तस्वीर बनाइयै
तेरा गौरव अंकत करियै
तेरी ईन-कथा दे धुंदले
चि'न नशान कठेरना चांहदे
मित्ती इच जो खिल्लरी गेदे
मोती इक-इक चुनना चाहदे-चुनी निं पांदे।
जंगल-जाड़ें कोला, पुछदे
"कैसा हा ओह शेर डोगरा ?
किन्ना हा ओह उच्चा लम्मा?
रूप-छवि ही कैसी उसदी
की हा नर्म कालजा
उस फौलादी नर-मर्दै दा-
सुनदे गै दुखिएं दे दुखड़े
की ओह धड़कन लगी पौंदा हा?"
आपूं बेद्दन बनी जंदा हा !
इस धरती दे दुक्खें कन्ने
तिल-तिल करियै की जलदा हा?
दूएं दी अग्गी इच कैसी
कुद्दी-कुद्दी जाई पौंदा हा?
इस रिश्ते इच ब'न्नी लैत्ते-दर्दमंद तूं लोक नमाने।
ओहदे कारण जगटी दी अनजान बस्ती-
दुखिएं तै इन्साफ-न्यांऽ दा
बनी गेई इक राज-थढ़ा ही।
ना-मेदी दे न्हेरें अंदर ठेडे-ठोकर खा करदे हे-
उं'दे गितै जगटी गै ए आशा दी इक जोत ही उसलै
डुग्गर पर छाई ही उसलै
मौती दी बंगार डरौनी
खतरे-धोखे चप्पे-चप्पै
उस बेल्लै बी सिदक-वफा दी बत्ता उप्पर
डीडो दे मतवाले ग'बरू
ईन दे झंडे लेइयै निकले।
दुश्मन उसदी तलोआरी दे दिक्खी जलवे
सुलह दे हत्थ बधांदा रेहा।
उसगी सुन्ने कन्ने बौँ ओह तोल्ली लैंदा
थेह उसदे ओह कच्चे जगटी
सुंदर मैहल बनी सकदे हे
थ्होई सकदे हे उसगी बी / राज-जगीरां ।
मनसबरदारी/उच्ची कलगी।
मान ते इज्जत थ्होई सकदी ही
इक बारी जे डीडो अपनी।
ईन-खमारी छोड़ी दिंदा
लाहोरा दे दरबारै अंदर-
दिंदा सीस नुआई जेकर
अपनी ढाल-तलोआर उसदे पैरें अग्गें रखदा जेकर
जि'यां इस्सै धरती दे किश हाजतमंदें
ईन-अजादी भेंट सजाइयै
पेश कीती ही जाइयै जिसलै
उ'नेंगी थ्होई मनसबदारी
चक्क-जगीरां/खिल्लत/कलगी
थ्होई हकूमत थ्होए खजाने।
सब किश थ्होआ।
नेई थ्होई पर उ'नेंगी रत्ती,
दर्दमंद लोकें दी शरधा
प्यार-म्हब्बत दे फुल्लें दे हार निं थ्होए।
गौह-गौरव दा ताज निं थ्होआ।
ईन दी सुच्ची कलगी गी ओ पाई सके नेईं।
उस रिश्ते इच ब'न्नी लैते
अमर शहीद मियां डीडो ने
दर्दमंद ए लोक नमाने !