घेरे दा ऐ मतें मगर, घेरे च कोई नेईं,
तेरे सवाए ओ मना, तेरे च कोई नेईं।
गैरत, तलाश, हक्कै दी ईन, सच,
मरदें च होंदे गुण केई, मुर्दें च कोई नेईं।
मालां च मस्त कोई हा, तस्वीह च कोई हा,
सब ओपरेपनै च हे, अपने च कोई नेईं।
कोई हा खब्बी बख्खिया, सज्जी च कोई हा,
रस्ते दे आर-पार हे, रस्ते च कोई नेईं।
भागें दे लेख काश तूं अपने पढ़ी सकें।
हत्थें च तेरे हैन पर मत्थे च कोई नेईं।
पागल मलंग रस्ते च, भीड़ै गी दिक्खियै,
आखन लगा- "सब नंगे न, परदे च कोई नेईं॥"