बड़ी लचार धरती ऐ, समझ कोई निं सार आई,
कुत्तै इत्थें खजां फैली, कुत्तै इत्थें बहार आई।
सनैहरी रिशम लोई दी, फनाके सोहल फौगन दे,
अज़ादी दी परी आई, करी सोलां संगार आई।
जि'दे गित्तै मेरे देसें, प्रले दे नाच केई दिक्खे,
खुशी दा पर्व ओ आया, ओ गीतें दी गुंजार आई।
चमकदी धुप्प भर स्याले, ते ठायदे प्राण तरसै दै,
मेरे बेहड़े च नेई आई, चलो तु 'न्दै पसार आई।
अज़ादी दे इ'ने फुल्लें गी सौ खतरे न झूरै दे,
शकारी गी नज़र जि'यां कुत्तै कूंजें दी डार आई।
जुड़े नेई बाग स'बनें गी, ते ब्हार औंदी ऐ बागें च,
चलो इन्नी खुशी ते ऐ, कुत्तै आखर ए ब्हार आई।