गर्दशें चा निकलने दा कोई रस्ता होना ऐ।
काफले सहराऽ च न तां कोई चश्मा होना ऐ॥
बे-मैहरमी दे न्हेरें अन्दर, मन-मसाफर इक्कला,
लगन दा, नज़रें च उसदी, कोई दीया होना ऐ।
"जिंदगी दे चश्मे पर, दोऐ हे अस, जां फुल्ल हे",
व्हाऽ पुरे दी बोल्ली बैठी- कोई सुखना होना ऐ।
दोस्ती दे किन्ने डाऽवे! होई नेईं पन्छान पर,
दौन्नें चित्तें दे मंझाटै कोई पर्दा होना ऐ।
डूंहगे डडलें बगदा दरेआ, प्यासा रक्खै जीवें गी,
मेरे अंदर बी तां ऐसा कोई दरेआ होना ऐ।
ए खुशी दे पर्व ते चेहरें प रौनक कोई नेईं,
चित्तें अंदर दर्द इ'दै कोई पलदा होना ऐ।
रेखा गरीबी हेठ अनगिन लोक प्यासे बलगदे,
तेरे मै-खाने च साकी, कोई फितना होना ऐ।