भार चित्तै दा भाएं चकोंदा नेईं,
माल ऐसा ए, सुट्टन बी होंदा नेईं।
चित्त माहनू दा होंदा ऐ कागद नरम,
दाग लगदा कोई पही धनौंदा नेईं।
मूढ़ मत्त होऐ, 'जन्न' बी मारदा,
होशमंदें दा 'डूहरा' जरोंदा नेईं।
कैह कुसै दी खुशी कोई खुडदा चलै,
फुल्ल डाहली गी बापास दनोंदा नेईं।
नजर नजरी गी जेकर पछानै नेईं,
मैहरमें कोल बी तां जनोंदा नेईं।
होऐ बेशरम कोई इसी टप्पी जा,
ए घरैखी दा बन्ना टपोंदा नेईं।
बे बसाही इसी 'शीरे' पाई जंदी ऐ,
साल्डू मब्बूतें दा सनोंदा नेईं।
सर सदोखें दे बूंदें भरोई जंदे न,
लालसा दा ए उंजल भरोंदा नेईं।
द्रब्ब बिपदा दा कोई बंडांदा नेईं,
धन सुखै दा कुसै गी दनोंदा नेईं।
इस्सै जखम्मै दी पीड़ा ने इन्ना चलै,
ऐहमें रोंदा ऐ मन, ए भलोंदा नेईं।
गैहल यारें दी सौड़ी बी खु'ल्ली बड़ी,
दोखियें दे चुगाना लघोंदा नेईं।