याद कुसै अपने दी

ए याद के ऐ?
नजरी दी झीलें दी नीली सतह पर
बिन मलाह दै डोलके खंदी कुसै
लौहकी-जनेही किश्ती दी
धुंदली निशानी ऐ कोई ।

x                x                x

ए याद के ऐ?
    रिश्ते दी गंगा दिया जल-धारा पर
    हत्थें चा जो किरी पेआ कदैं
    फुल्ल कोई,
    उस रुढ़ी गेदे नमाने फुल्लै गी
    मुड़ियै फड़ी लैने गितै
    आत्तर, दुखी, बे-हाल-जन होई गेदी
    हीखिया दी ठंडी सूंक!

x                x                x

ए याद के ऐ?
    चेतें दे नेहरें च बल्लें,
    अति बल्लें, अति बल्लें,
    जो जा करदी ऐ
    उस प्यारी मूरता दी
    रूप-रेखा, नैन-नक्श
    तुप्प्ने ते सांभने गी मचली गेदी लालसा।

x                x                x

ए याद के ऐ?
    कालजे दे फुल्लै दी-
    नरम कोमल पत्ती पर
    चु'ब्बी जो गेदा कुतै
    नजर पर औंदा नेईं,
    रड़कदा रौंहदा ऐ पर,
    उस कुसै कंडे दी म्हेशां सरसरांदी पीड़ ऐ।

x                x                x

ए याद के ऐ?
इस समें दे बे-क्यासे, सीमा-हीन
अन-मिने काले खलाऽ अंदर कुतै
गुम्म होई गेदे कुसै,
तारे दी बे-कल तपाश ।

  ×               ×               ×

  ए याद !
  अक्खीं दी ए जलन ऐ,
  कालजे दी भुखन ऐ
  सूँकें दी ए पवन ऐ । ✧