इस भोली भलोकड़िया धरती दे
अनलिखे इतिहासै दी
रूह बे-चैन बड़ी
बार-बार भैंची-भैंची
इक्वै गल्ल पुछदी ऐ
“कलगी ते थोई, पर
मुल्ल के चुकाना पेआ?”
रोज
बस, इ’थै रोणी उसदी सनोचै दी
“कलगी ते थोई, पर
मुल्ल के चुकाना पेआ”?
प्यासी-जन रूह एह
साढ़े इतिहासै दी
इ’नें जाड़े-पचुआड़ें च
ठंगरे ते कंगरें च
बे-जान, बे-सुर्त,
सुक्की दियें खड्डें च
ब्हाऊ दा बलूना बनी
लूहें दी त्राट बनी
म्हा-भारतै दे जख्वै आंगू
पुछदी सुआल ऐ
“कलगी ते थोई, पर
मुल्ल के चुकाना पेआ”?
अपने सुआला दा
जवाब जदूं थ्धोंदा नेईं
खिंझी दी बोल्ली पौन्दी
दस्सो ! निर्लज्जो तुस
सुनै दे ओ, बिन्झे दे ?
चुप की ओ?
बे-गैरतो, नपुंसको !
जवाब की निं दिन्दे तुस ?
साथियो, रफीको !
भगवान तुस ओ,
खाई-लाई लैन्दे ओ,
हस्सी-गाई लैन्दे ओ,
झूठे इतिहास एह पढ़ियै पतीन्दे ओ,
बीते दे समें पर गौह करी लैन्दे ओ।
पर,
मेरा की निं खैहड़ा
एह सुदैन रूह छोड़ै दी?
खट्टा परा केईं बारी
ख'ल्ल सुट्टी जन्दी ऐ
इक्कै रट लाई दी,
इक्कै गल्ल पुछदी ऐ-
"मुल्ल केह चुकाना पेआ"?
तुस खबरै गालियें ते धमकियें नै
टालो इसी सौ बारी,
मारो, धमकाओ इसी
पर
उन्नै ते लैना ऐ
जवाब उस गल्लै दा
मेरे खानदाना च,
कुसै ने बी
कदें बी
बरसोधों निं गुराहियां कदें,
थोथ़रू, खमीरे, पूड़े,
सुच्चियां निं खाद्धियां।
अपनी गै मैहनतू प'
कीता ऐ गुजारा सदा
मेरे कुसै पुरखे ने
गंढे निं कवित्त झूठे,
लिखे निं कसीदे कदें,
तुस्सें फिरी दस्सो,
मिगी गै की पुछदी ऐ,
रूह इतिहासा दी-
देआं के जवाब इसी
ओह्दे इस सुआला दा-
"कलगी ते थ्होई, पर
मुल्ल के चुकाना पेआ?" ✧