जंगल

अजें किन्ने-क जंगलें चा/गुज़रना
काफला अपना? जदूं बी अपने
सफरै च
कुसै हिरखै दे गीतै दे
सुहामें सुर सुरकदे न
कदम रलदे न राहियें दे,
चमक औंदी ऐ नज़रें च
ते भोले काफले आले
इ 'नें गीतें दी मस्ती च
रंगोई जंदे न इस चाल्ली,
नज़र चौकस नेईं रौंहदी,
ज़रा गफलत ऐ होई जंदी
तदूं गै कोई
जंगल सामनै आइयै
दरिंदे छोड़ी दिंदा ऐ।
डराई जंदा ऐ गीतें गी।

भुलाई जंदा ऐ रसतें चा-
अजें किन्ने-क जंगलें चा
गुज़रना काफला अपना?

अचानक बस्तियें अंदर
घना जंगल जदूं कोई
कुतों दा उग्गी औंदा ऐ
भलोकी बस्तियें च
नागहानी मौत आई जंदी।
मसूमैं दे लहू कन्ने जशन करियै
ओ जंगल छपन होई जंदा।
ते ज़ख्मी गीत-नग़मे छट-पटांदे न।
अजें किन्ने-क जंगलें चा....

ए जंगल छपन हुंदा ऐ
कदें की खतम नेईं हुंदा?

कदें पूरब च उगदा ऐ,
कदें पच्छम च ल'बदा ऐ।
कदें उत्तर, कदें दक्खन,
कदें इधर, कदें उद्धर
घना जंगल,
दरिंदें दी ओ रंगभूमि
अचानक लोप होई जंदा,
अचानक लोप होई जंदा।

सुआल आखर एह उठदा ऐ
एह जाई छपदा ऐ कुत्थें फही?
ज़रा सोचो ते सही यारो,
कुतै साढे दिलें अंदर गै एह जंगल
ते छपदा नेईं ? ✧