(i)
भलोका कुत्तै माह्नू लंगदा जड़ा हा,
थड़ा¹ उसगी साथी ए डंगदा बड़ा हा,
छड़ी चापलूसी सियासत ही इत्थें,
ते शारें ने कम्बदी रियासत ही इत्थें।
भ्याली दे षड्यंत्र चल्दे हे इत्थें,
ते साले-भनोए गै पलदे हे इत्थें।
नसीब इसने जनता दे सूली हे टंगे,
ए दिखदा तव्वैं कें दे मुजरे हा नंगे।
ओ मस्ती खमारी नशा ओ अथाह हा,
समें दे न्यांऽ दा इसी के पता हा!
कलमाए बागें बरै अज्ज पानी,
- राजे दी मंडी दा दरबारी थड़ा, जित्थें 1954 ई०च इक डोगरी कवि सम्मेलन, बक्शी गुलाम मुहम्मद दी प्रधानता च होआ हा।
ए जनता दे कवियें दी गूंजै दी बानी।
*बसन्ती बहारें दी पैहली निशानी*
(ii)
ए डुग्गर हा सुन्दर बहारें दी धरती,
कलम दे अनोखें नज़ारें दी धरती।
अजन्ता दी सानी ओ चित्तर-कला ही,
कला दी जुआनी ओ चित्तर-कला ही।
जि'दा मान देसें-बदेसें च होआ,
घरै बिच उसगी निं सहारा बी थ्होआ।
अ'न्नें दे गल हार फुल्लें दे पाए,
उ'न्नें सप्प समझी थ्होआंटी टकाए।
ओ पतझड़ ही साथी, तां फुल्ल ओ लटोए,
कुसै अज्ज साम्बे, सम्हाले, परोए।
तां चित्तर-कला दी प्ही जागी ए कहानी,
गोल्ली थों मुड़ियै बनी गेई ए रानी।
*ए बहारें दी साथी ऐ दूई निशानी*
(iii)
फुल्लें दी शोभा सगन्धी च बसदी
चन्नै दी शोभा चनैनू च हसदी।
इ'यां गै बोल्ली ए गैरत ही स्हाड़ी,
ए धड़कन मनै दी असें ही प्यारी।
घरा इच इसगी हा अपमान थ्होआ,
तकें ते मीहनें दा बिसपान थ्होआ।
समें दे लोआरें ओ कंडे नसाए,
तां पैंछी ए रुस्से दे बागें गी आए।
नमें गीत लेइयै ए किरणां सजोइयां,
बोल्ली दी बेला गी कलियां न थ्होइयां।
ए उडडी ए कविता-सगन्धी सुहानी,
डुग्गर दी धरती गी थ्होई ऐ बाणी।।
*ए बहारें दी साथी बनी ऐ निशानी*
(iv)
धरती दी ममता ही कै दें च पेदी,
- डोगरा हाल नां दा जम्मू च इक थाहर।
मैहनत लटोन्दी ही रस्तें-चरस्ते,
किस्मत ही बन्झी दी बजियें दे बस्तें।
खलाड़े हे रोन्दे ते खेतर हे कुढ़दे,
तरसदी ज्वानी ही, माह्नू हे बुढ़दे।
गजरें दनांसें दे चाऽ रेह अधूरे,
नां साल्लुं जुड़े, नां जुड़े सूहे चूड़े।
ज्याणें नमाने निं खेडे खडाए,
ओ ओंकार हे, भुक्खें ते फाके सकाए।
जु़आनी निं झूरी, ना हस्सी ना गाई
खोल्ले निं खु'ल्ली ए तंगी दी फाही।
ओ सतजुग हा बजियें दा, धोफे हे चलदे,
सवेरे गै संजा दे शौरे हे ढलदे।
खीरी ओ बन्ने समे न मस्हाए,
ते धरती दे पुत्तर गै मालक बनाए।
बज्झे रुकेदा फही बगेआ ऐ पानी,
ते मुक्की ऐ खीरी ओ सोके दी कहानी।
ए व्हार्नें दी साथी ऐ चौथी निशानी ✧
[1954]