उद्घाटनी भाषण

मिगी एह् दिक्खियै खुशी होई जेह्ड़ी असें परंपरा शुरु कीती ही, जिसी अस 'अखिल भारती डोगरी सम्मेलन' आखदे हे की जे साढ़े दो-त्रै-चार साथी हिमाचल, दिल्ली, मुंबई थमां साढ़े कन्नै आई रलदे हे। में दिल्ली दे सारें सम्मेलनें च शामल रेह्दा आं, अजै दे सम्मेलनै दी हाजरी गी दिक्खियै मिगी बड़ी खुशी ऐ पर पोह्लें बी उ'नें सम्मेलनें दी हाजरी दा मुकाबला नेईं ऐ। दिल्ली हालांकि नया प्रदेश ऐ जित्थें डोगरें दी गिनती बड़ी मती नेईं ही, पर लोक शौकै कन्नै औंदें हे ते साढ़ा उत्साह बधांदे हे।

अज्ज मेरे मनै च इक दर्द ऐ जिसी में तु'दे सामनै बुहासरना चाहनां। दर्द ऐ डोगरी भाषा ते डोगरी साहित्य दा। जंदूं दे डोगरे इस धरातल पर आए, ओहदा कोई लंबा-चौड़ा प्रमाणक इतिहास ते साढ़े कोल नेईं ऐ, लेकिन किश सयाणे इतिहासकारें इस शैहर बारे खोज जरूर कीती ही - जे जम्मू कदूं आबाद होआ? डोगरें इत्थें अपना राज कि'यां कायम कीता? सुखदेव सिंह चाड़क इक ऐसे इतिहासकार हे जि'नेंगी इतिहास प्रणाली दा बड़ा ज्ञान हा। उं'दी पैहली कताब जेहदा नां हा, "The Rise and Fall of Dogra Kingdom"। ओहदे मूजब महाराजा रणजीत देव (1730-1785) होरें 55 साल राज कीता हा। Rise & Fall दो शब्द बड़े स्वभावक न, जेहड़ा उच्चा चढ़दा ऐ उ'न्नै थल्लै जरूर औना होंदा ऐ सूरजै दे चढ़ने ते ढलने साहीं।

उं'दे मूजब जम्मू दा पैहला राजा मालदेव हा। ओह एह जिकर करदे न जे मालदेव दा राजतिलक 1360 ई० च होआ। एह् नेईं दस्सदे जे उं'दा राजतिलक जम्मू च होआ हा जां जित्थुआं ओह आए हे उत्थै गै होई चुके दा हा। में अंदाजा लाया हा जे एह् राजतिलक शायद जम्मू च गै होआ होग, की जे जम्मू च पुरानी मंडी दा इलाका गै राजे दी मंडी ही, इत्थें राजायें दे पराने मैहल हे। मालदेव दी इक पुरानी यादगार बी इत्थें ऐ जिसी बारांदरी आखदे न, उत्थें डोगरें राजें दे राजतिलक होंदे रेह्। गुलाब सिंह जी दा ते नेईं होआ होना की जे असें पढ़े दा ऐ जे उ'नेंगी अखनूरै च जीआपोता दे घाटै पर ल्हैरै दे महाराजा रंजीत सिंह जी ने आइयै राजतिलक दित्ता हा। त्रैनें भाएं गी ओहदा मालक बनाई दित्ता हा। उं'दे पिता जी किशोर सिंह हे उस बेल्लै। गुलाब सिंह दे बाद रणबीर सिंह जी दा राजतिलक होआ हा, उस्सै बारांदरी च महाराजा प्रताप सिंह जी गी राजतिलक दित्ता गेआ हा।

जदूं हरि सिंह जी दा राजतिलक होआ हा ते असें दिक्खेआ जे जंगले लग्गी गे, नालियां ते जगाहं साफ होई गेइयां, आखन लगे जे इत्थै राजतिलक होना ऐ। इ'यां उत्थै त्रै राजतिलक

• एह् लेखक सम्मेलन, 2007. आयोजत होआ

होए, उथैं बारांदरी दे कोला फत्त्हू दे चंगाने गी जेहड़ी ग'ल्ली जंदी ए उथैं उ'दे मैहल होंदे हे। एह मैहल उथैं मालदेव थमां रंजीत देव दे जमाने तगर हे। 1360-1730 तक तकरीबन 400 बरे होई गे। एहदे बाद इक राजा ध्रुवदेव होआ। ओह्दे चार पुत्तर होए, इसकरी उन्न मसूस कीता जे उं'दे रौहने आस्तै एह जगह बड़ी तंग ए। उसने मंडी मुबारक दी नींव रक्खी। आखेआ जंदा ए जे उसल्लै डोगरे तनूं बी इत्थें बसदे होने न पर शहर जम्मू अदूं राजधानी नेईं हा, जम्मू राजधानी बनेआ मालदेव दे औने करी।

अस जानने आं भाषा विज्ञानियें मूजब जे उत्तरी भारत दियां जिन्नियां बी बोल्लियां न, राजस्थानी, कोला लैयै पूर्वी असम तगर, एह सब्बै 800-900 साल कोला परानियां नेईं हैन। संस्कृत ही- वैदिक संस्कृत, फ्ही लौकक संस्कृत आई। बाल्मीकि गी अस संस्कृत दा आदि- कवि आखने आं पर ओह नेईं हा, की जे संस्कृत दा वैदिक साहित्य उसल्लै तगर बनी चुके दा हा। लोकक साहित्य रामायण ते महाभारत कोला शुरू होंदा ए। कालिदास, भास, शुद्रक बगैरा दे नाटकें च अस एह दिक्खियै हैरान होंदे हे जे एह किश पात्तरें कोला संस्कृत बलांदे हे ते किश कोला प्राकृत। प्राकृत बारै अस ज्यादा किश नेईं हे जानदे की जे एह उस बेल्लै आम बोलचाल दी भाषा नेईं ही। प्राकृत दे बाद अपभ्रंश आइयां, फ्ही उसे बा'द सदियां भाषा आइयां-डोगरी, पंजाबी, राजस्थानी, हिंदी, बंगाली, गुजराती बगैरा। एह सब्बै भैनां न ते इं'दी बरेस 800-900 साल कोला मती परानी नेईं ए। 1360 गी जेहड़ा राजा बनेआ हा अगर अस गिनचे तां 700 साल ते होई गे हे (1360-2000 तक)। एहदा मतलब ए जे डोगरी ओह्दे कोला 100/150 साल पैहलें अपभ्रंश चा निकली होनी ए। ओह्दी उसलै केह् शकल ही? ओह्दे च अपभ्रंश कोला बखरा किन्ना परिवर्तन होए दा हा? एहदे बारै साढे कश कोई लिखत प्रमाण नेईं ए।

अस बी उ'थै चीज सांमने आं जेहड़ी असेंगी जरूरत होंदी ए बाकियें गी अस नजरअंदाज करी ओड़ने आं। इक दुख होंदा ए इस गल्लै दा जे भाषाएं दा समूचा ज्ञान होना लोड़चदा हा, के संस्कृत कोला सिद्धै तौर पर ते डोगरी नेईं निकली, ओह् ते दो पड़ांड पार करियै आई ही ते हर इक पड़ांड कम से कम 500 साल दी ते रही होग। लेकन 500 साल तक जेहड़ी चीज बजूद च बनी रही, बोल्ली जंदी रही, ओह्दा कोई साहित्यिक प्रमाण साढे कोल नेईं ए। प्राकृत साहित्य साढे कोल नेईं ए। जेकर किश कताबं लिखियां बी गेयां तां बी ओह् अज्ज साढे कश मजूद नेईं हैन। इस आस्तै में समझानां जे 700 साल परानी साढ़ी तरीख ए डोगरें दी, डोगरी बोल्ली जां भाषा दी। एह कोई बड़ा बड्डा अरसा ते नेईं ए पर जेकर अस इं'नें सालें च झाक्की मारचै तां इस भाषा च साहित्यिक बोध-बकास कि'यां होआ? कदों होआ? किश परिवेश च होआ? तां इ'यां सेही होंदा ऐ जे किश सदियें तगर अस अद्ध-ज्हार युगै च गै रहे। साढ़ी कोला साढ़ी भाषा विकसित नेईं होई। बोलचाल च अस डोगरी गी मात्तरी-भाषा आखियै बरतदे रेह्। मगर देनदार आं उस उ'नें लोकें दे जि'नें लोक साहित्य दे नां पर लोक गीत, लोक कथां लिखियां, मुहावरे-खुआन बनाए, भाषा गी समृद्ध कीता। देनदार आं अस साहित्य अकैडमी ते कल्चरल अकैडमी दे जे इत्थें किश लोकें गी एह ख्याल आया जे अपनी खिल्लरी दी बरासतै गी असें किठ्ठा करना लोड़चदा। काफी सारे लोकगीत, लोक-कथां किट्ठियां

कीतियां गेइयां। डोगरी दे मुहावरे, खुआण कटोैरियें लिखनें दा श्रेय श्री तारा स्मैलपुरी होरें गी जंदा ऐ। इ'यां गै किश होर लोकें बी इस कन्नै च रुचि लेई पर ओह्दे बा'द पही असें नजर-अंदाज करी दित्ता। लोक-साहित्य गी नजर-अंदाज करना अपनी लोक-परंपरा दे इतिहास गी भुल्लनें दे बरोबर ऐ। लेकिन शुकर एह ऐ जे मता सारा लोक-साहित्य इकट्ठा होइयै प्रकाशत होई गेआ। एह साढ़ी कुसै दी व्यक्तिगत जां संस्थाएं बगैरा दी बी तौफ़ीक़ नेईं ही। एह कोई सरकारी संस्था गै करी सकदी ही। अस शुकर गुजार आं उ'दे जे उ'नें एह कन्न कीता।

डोगरें च इक झक्क-जन मजूद हा जे जम्मू च जे कोई साढ़े कन्नै पंजाबी च गल्ल करदा हा तां अस डोगरी गी छोड़ी ओह्दे कन्नै पंजाबी च गल्ल करन लगी पौंदे, इ'यै नेहियां कमजोरियां अज्ज बी मजूद न। अपनी भाशा कन्नै उस किसमा दा प्यार नेईं हा। डोगरी बड़ी ज़ोरदार भाशा ऐ, ओह्दा अपना लोक साहित्य बी ऐ। अज्ज जेहाड़ियां दरेड़ां साढ़े घेरें च आवा करदियां न, ओह् दुह्रें भाशाएं आहले घरें च बी आवा करदियां न। की जे उ'दे बच्चे बी उ'नें पब्लिक स्कूलें च पढ़दे च जित्थें उ'दी कोशश होंदी ऐ जे साढ़ा बच्चा अंग्रेजी बोल्लै। अंग्रेजी दे दो फिकरे बोल्दे दिक्खी घरै-आले बड़े खुश होंदे न जे साढ़ा बच्चा अंग्रेज बना करदा ऐ। टी. वी. पर जेल्लै एक्टर, एक्टरसें गी धड़ल्ले कन्नै अंग्रेजी बोल्दे दिखदे न, ते लोक सोचदे न, इ'यै ऐ कामयाबी दा राज। अज्ज साढ़े घरें च बच्चे डोगरी नेईं बोल्दे। डोगरी गी खतरा पैदा होए दा ऐ। डोगरी मेरै थुहाड़े च ऐ। लेकिन मेरे सामनै दिखदे-दिखदे एह सब किश घटेआ जे डोगरे घराने थमां बोह्रैये आई दी कुड़ी डोगरी समझै पर बोल्ली नेईं सकै। एह चिंता दा विशे ऐ। अस कोशश नेईं करदे के बच्चे गी अस समझाचै जे चार ज़बानां अस असानी कन्नै बोल्ली सकने आं। तुस अंग्रेजी बी बोल्लो, हिंदी-उर्दू दे माध्यम कन्नै हायर जमातां जे तुस पढ़दे ओ ओह् बी बोल्लो, मातरी-भाशा ते अपने-आप आई जंदी ऐ की जे घरें च सारियां बिरध जनानियां बगैरा डोगरी बोलदियां न, ते तुस की नेईं बोल्दे? लेकिन, किश वातावरण ऐसा बनी गेआ ऐ, इदारे ऐसे खुल्ली गे न जेहड़े असेंगी ते साढ़े बच्चें गी मातरी भाशा कोला खंडाडे जा करदे न। एह इक बड़ी दुखदायी गल्ल ऐ। एह खतरा ऐ डोगरी आस्तै ते एहदा मुकाबला करने आस्तै असें कोई मुहाज नेईं बनाया, कोई प्रोग्राम नेईं बनाया। जिसलै डोगरी संस्था बनी ही, उसलै कल्चरल अकैडमी, यूनिवर्सिटी दा डोगरी विभाग, डोगरी अख़बारां बगैरा किश नेहा। लेकिन तुसें लोकें जि'नें डोगरी दे उस नकास ते उत्थान गी दिक्खेआ ओह् रूहान हुंदे हे।

1963 च अशाई साहब जदूं रजिस्ट्रार हे में उ'नें गी आखेआ जे तुसें कश्मीरें च एम. आई. एल. दे इम्तेहान शुरू करी दित्ते न, ते डोगरी गी भलाई दित्ता। उ'नें जबाब दित्ता, "शास्त्री जी, में एह गल्ल सुनी दी ऐ जे डोगरी गी छापने आस्तै कोई पब्लिशर सामनै नेईं औंदा ते डोगरी दी जेकर कोई किताब छपदी नेईं तां फिर कोर्स दियां किताबां जेहदे च छे-छे परचे होंदे न ते दो-दो, त्रै-त्रै किताबां होंदियां न उं'दे च, ते ठारां-बीह किताबां हर जमाता आस्तै कि'यां बनङन? ते कु'न बनाग? कु'न उ'नें बच्चें गी मुहैया कराग?' में आनियै वर्किंग कमेटी दी मीटिंग बुलाई ते उ'नेंगी अशाई साहब दी गल्ल बारै दस्सेआ ते पुच्छेआ जे में उ'नेंगी केह जबाब देआं। उं'दे चा इक्क बोलेआ, दूआ बोलेआ जे अस लिखगे, एह किताबां, डोगरी-संस्था उ'नेंगी छापग ते कोर्स दियां किताबां अस मुहैया करागे। में इक दरखास्त लिखी ते सारें ओह्दे पर दस्तखत कीते।

इक कापी में अशाई साहब गी देई दित्ती। ओह ला-जवाब होई गे, हुन ओह नाह नेईं हे करी सकदे। सलेबस असें आपूं छपवाए, छड़े छपवाए गै नेईं, कताबां गै नेईं मुहैया कीतियां बल्के मुफ़त कोचिंग कलासां बी शुरू कीतियां। एह कलासां छड़ियां शहरें च गै नेईं ग्रांएं-पिंडें च बी अस जंदे हे। मेरे कन्नै मेरे साथी प्रोफ़ेसर बी जंदे हे। अस पढ़ाने आस्तै दो-दो, त्रै-त्रै दिन घरा बाहर रौंहदे हे। इक बारी बड़ी गर्मी च अस हीरानगर गे। उथैं मिगी कुसै नै पुच्छेआ जे नेही गर्मी च इन्नी दूर तुस आए डेढ़-दो घंटे बा'द बच्चें गी पढ़ाियै तुसें उठी जाना ऐ, तुसें गी एह्दा केह लाह ऐ। में गलाया जे बस मेरा इ'थै लाह ऐ जे तुसेंगी भाशा दे बारै च कोई उनस पैदा होई जा, तां साढ़ा आना-जाना सफल होई जाग। थाहर-थाहर डोगरी ड्रामे, मुशायरे बगैरा करन जंदे रेह एह् बड़ा कठिन रस्ता हा। असेंगी उस जमाने च कोई पाई- पैसा बी नेईं हा मिलदा।

1948 च रेडियो स्टेशन स्थापत होआ। साढ़ी डोगरी लेखकें दी संस्था बनने दे च'ऊ बरें मगरा। जदू रेडियो पर इक लेख पढ़ने पर 7 रुपे पारिश्रमिक थोंदा हा।

मिगी इक जगह इतिहासै गी फरोलदे होई पता लग्गा जे 18वीं सदी दे दरम्यांनै च कवि देवी दत्त होए। भड्डू दे रौहने आहले हे, ते एह इक बख्वरा लौहका-हारा राज हा। प्रो० गौरी शंकर होरें कवि दत्त पर बड़ा कम्म कीता। पंजाबी दी इक बारी जम्मू च साहित्य सभा होई, ओहदे च नामी-गरामी शायर आए। डोगरी संस्था नै फैसला कीता जे उ'नेंगी सदिदियै चाह पलेआई जाए। उ'नेंगी बलाया गेआ ते उथैं उ'नेंगी त्रै कवतां सनाइयां।