मेरा मन कदें-कदें, चेतें दियें नेरियें गौलियें च जाई भटकदा ऐ ते बीतै दे दिनें दियें, होई-बरती दियें घटनाएं दियें पोटलियां खोलहन-फरोलन लगदा ऐ। हरानी आली गल्ल ऐ जे कुसै पोटली गी खोलदे गै कोई परानी घटना, अपने सूक्षम रूपा चा निकलियै मेरै मनै दे पर्दे पर, परानी चुप्पू (Silent) फिल्मा आला लेखा तमाशा दस्सन लग्गी पौंदी ऐ। पन्छानू नुहारां अखियें अग्गें झलकारै मारन लगदियां न। इक बारी इक पोटली चा सन् 1948-49 ई. च, जम्मू-उधमपुर रोड़ (सिड़का) पर स्थित टिक्करी नां दे कसबे दे इक खु'ल्ले दब्बड़ा च होने आली-करसान कांफ्रैंस दी रौनक जागी पेई। टिक्करी जम्मू शैहरा थमां 40-42 कि० मीटर दूर होनी ऐ। मेरा करसानी कम्मै-काजै कन्ने भाएं कोई सरबन्ध नेईं, पर उस करसानी कांफ्रैंस कन्ने उसलै डोगरी संस्था जम्मू दा इक महत्त्वपूर्ण सरबन्ध बनी गेआ हा। इस कांफ्रैंसा बारै जानकारी असेंगी कॉमरेड धन्वन्तरी हुन्दे कोला थ्होई ही। एह प्रसंग बनने दी बी अपनी इक कहानी ऐ। डोगरी संस्था, जम्मू दी स्थापना होए दे लगभग चार बरै होई गे हे। इस अरसै च डोगरी संस्था दी स्थापना च भागीदार साथियें चा किश साथी परेड ग्राउंड दे दक्खनी सिरे पर उग्गे दे "यूक्लिप्टस" दे दऽ ऊँ बूठें दे ख'ल्ल, जां दवानें दे मन्दरै दी बाहरली प्रदक्खना च आई बहँदे ते इस गल्ला पर नमोशी प्रगट करदे जे जिस उद्देश्य गी लेइयै असें संस्था दी स्थापना कीती ही उस बख्खी बधने दा अजें तक कोई जतन-हीला साढे कोला होई नेईं सकेआ। साढे कोल मनै दी बेदन, ते उधम करने का हौसला ते ऐ, पर साढे कोल, ना लोड़चदे साधन न ते ना गै बौहने-बचारने आस्तै कोई निश्चित ठौर-ठकाना। संस्था दे प्रधान पं. संसार चन्द जी ने इक दिन बैठे दे सुझाव दित्ता साढे चा इक दऊँ जनें गी जम्मू च कालीजन्नी कॉमरेड धन्वन्तरी कोल जाइयै संस्था दे कम्मैं गी अग्गें बधाने आस्तै, उ'न्दे कोला सलाह-मश्वरा लैना चाहिदा। कॉ. धन्वन्तरी दा जन्म जम्मू च गै होआ हा ते
उ'नें दसवीं तक्कै दी पढ़ाई जम्मू दे श्री रणबीर हाई स्कूलै च कीती ही । अग्गें दी पढ़ाई आस्तै ओह लहौर चली गे हे । उस बेल्लै जम्मू च भाएं “प्रिंस ऑव वेल्ज” नां दा इक कॉलेज चालू होई गेदा हा, पर अजें ना रणबीर हाई स्कूलै च ते ना गै इस कॉलेज च “सांईस” कन्ने सरबन्ध रक्खने आले विशे पढ़ाए जन्दे हे । सांईस पढ़ने आस्तै विद्यार्थियों गी, लाहौर जां अमृतसर जाना पौन्दा हा । कॉमरेड धन्वन्तरी दे पिता, कर्नल दुगादत्त महे, रियासती फौज़ा च डॉक्टर हे । जम्मू दे काली जन्नी मोहल्ले च उ'न्दा अपना पक्का मकान हा । कर्नल (डॉ.) दुर्गादत्त महे दे त्र'ऊं पुत्तरें च कॉमरेड धन्वन्तरी सारें कोला लौहके हे । उ'न्दे सारें कोला बड्डे भाऽ श्री भीमसेन महे कन्नून (Law) दे इम्तिहान पास करी लैने कारण, महकमा जुडीशरी (Judiciary) च 'जज्ज' (Jadge) लग्गे हे ।
कॉ. धन्वन्तरी ने लहौर जाइयै पहलें D. A. V. College चा एफ. एस. सी. (F. Sc.) दी परीक्षा पास कीती ते उसदे बा'द ओह विदेशी सामराज दी गुलामी दे बरूद्ध चलने आले कांग्रेस दे आन्दोलनै च दिलचस्पी लैन लगी पे । ओह अग्गें कॉलेज च B.Sc. दी पढ़ाई नेईं करी सके । उसकी जगह उ'नें डी. ए. वी. आयुर्वेदिक कॉलेज च दाखल होईयै कविराज ते वैद्य वाचस्पति नां दियां दो परीक्षा पास कीतियां ते लहौर दे गै इक मोहल्ले दी गली च इक दुकान कराए पर लैयै आयुर्वेदिक हकीमी दी प्रैक्टिस शुरू करी दित्ती । इस्तै हकीमी दी दुकान च कम्म करदे होई, उ'न्दा मेल-मिलाप स. भगत सिंघ जनेह क्रान्तिकारियें कन्ने होआ ते धन्वन्तरी बी क्रान्तिकारी दल दे इक सरकदा सदस्य बनी गे । कॉमरेड धन्वन्तरी महे दी, जीवन-संघर्ष दी एह रोमांचकारी कहानी बड्डी कष्ट-भरोची ते लम्मी कहानी ऐ । सार संखेप एह जे धन्वन्तरी होर सन् 1919 ई. च मैट्रिक दी परीक्षा पास करियै लहौर चली गे हे ते उस क्रान्तिकारी संघर्ष दे दौरान 12-14 ब'रे सामराजवादी जेल्लें च बिताये (जेदे च चार ब'रे अंडमान दी बदनाम कालेपानी दी जेल्ला च कटियै) ओह जम्मू-कश्मीर रियास्ती च राज-परत होने दे बा'द, जेल्लें उ'न्दे रियास्ती दे अन्दर औने पर लग्गी दी, सामन्ती दौर दी पाबन्दी गी लोक-राजी हकूमत ने मन्सूख करी दित्ता तां ओह सन् 1947 ई. दे नवम्बर म्हीने जम्मू च अपने घर परतोए हे ।
मास्टर संसारचन्द होर कां. धन्वन्तरी गी जानदे हे । इसकी अस दोऐ जने, डोगरी संस्था बारे उ'न्दे कन्ने गल्ल बात करने आस्तै उ'न्दे काली जन्नी आले मकानें पर उ'नें गी मिलन गे । कां. धन्वन्तरी होर जेल्लें जम्मूँ वापस आए हे तां ओह् बड़े कमजोर हे । उ'न्दा शरीर जेल्लें दे कष्ट जरी-जरियै जर्जर होई चुके दा हा । धन्वन्तरी होरें इ'ने ब'रें तगर, इस चाल्ली दा संघर्षपूर्ण जीवन बतीत करने कारण शादी-व्याह दे बारे च कदै सोचेआ गै नेईं हा । काली जन्नी च, उ'न्दे कोला बड्डे भाऽ, श्री विश्वामित्र ते उं'दा परिवार रौंहदा हा । मकान खासा बड्डा हा । धन्वन्तरी होर उत्थें गै इक बक्खरे कमरे च सौंदे -बौहंदे हे । उ'नें गी मिलने आले बी उस्सै कमरे च उ'नें गी मिलदे हे । अस उ'न्दे कमरे च गे तां ओह् बड़े खुश होए । अस उ'न्दे कन्ने डोगरी च गै गल्ल-बात करदे हे । धन्वन्तरी होर पंजाबी भाषा च दूऐं कन्ने बचार-बटांदरा करदे हे । आखन लगे-
“में तुसेंगी सनेहा भेजने आला हा।”
मास्टर होरें पुच्छेआ, 'कोई कम्म हा?' आखन लगे 'जम्मू-
उधमपुर रोड पर टिकरी नां दा इक पहाड़ी कसबा ऐ । द'ऊं म्हीनें बा'द टिकरी च इक करसान
कांफ्रेंस करने दा फैसला हुआ ऐ। टिकरी दे कोला-पोरे दे ते बमहाग दे अलाके दे मते सारे करसानें दे इस कांफ़्रैंसा च शामिल होने दी मेद ऐ। तुस डोगरी संस्था दे प्रोग्राम बनाने दे बारे च फिकर-मन्द हे। क्या डोगरा करसानें दी इस कांफ़्रैंसा च, अमर करसान, बावा जित्तो दे बलिदान दे विशे गी लेयै, कोई डोगरी नाटक खेढेआ जाई सकदा ऐ? एह नाटक खेढेआ जाई सकै तां इक ते उस करसान-कांफ़्रैंसा दी शोभा-शौहरत होई जाग ते दूए डोगरी संस्था दे कम्मैं दी बी इक ठोस शुरुआत होई जाग।'
मास्टर संसारचन्द होर ते में कां. धन्वन्तरी महे हुंदे मकाना चा बाहर आए। मास्टर होरें मेरे पासै दिखियै आखेआ, "कॉमरेड धन्वन्तरी दी सोच किन्नी गैहरी ते सार्थक ऐ।"
"बड़ा सार्थक सुझाव ऐ धन्वन्तरी हुन्दा।" में आखेआ, "पर सहाड़े चा कुसै गी बी नाटक लिखने दा कोई अनुभव नेईं। दूए, बावा जित्तो दे बारे च, नां ओहदी 'कारक' छपी दी ऐ, ते नां ओदे जीवन ते उसदे समें दे बारे च कोई समग्गरी छपी दी मिलदी ऐ। इक गंभीर चुनौती साढ़े सामनै कड़ी करी दित्ती ऐ धन्वन्तरी होरें। जे असें इस पैहली गै चुनौती दे अगें, हार मन्नी लेई तां इस बिखड़े पैंडे च अगें औने आला सफर कि 'यां निभग'?"
सार-संक्षेप ए जे मेरे जनेह ना-तजर्बेकार लेखक ने सिर्फ अपने उत्साह ते उद्दम दे सहारै, दो ढाई घंटें दा इक सिद्धा सरल डोगरी नाटक लिखेआ ते किश उत्साही पर ना-तजर्बेकार ते घट्ट पढ़े दे जां बिलकुल नेईं पढ़े दे ग्राई ग'बरुएं, 10-15 दिन रिहर्सलां करियै उस कांफ़्रैंसा दी इक संजा, पैट्रोमैक्स लैम्पें दी लोई च मंच पर उसी पेश कीता। रियासत दी अवामी हकूमत दे मंत्रियें चा, बख्शी गुलाम मुहम्मद (उप प्रधानमन्त्री), सरदार बुधसिंह (इन्फरमेशन ते ब्राड-कास्टिंग मंत्री) गिरधारी लाल डोगरा (वित्त मंत्री), कॉमरेड धन्वन्तरी, टिकरी च इस करसान कांफ़्रैंसा दे मुख्य प्रबन्धक ठाकुर कर्नल सिंह टिकरी दे कोल-कच्छे दे ग्राएं दे बसनीकें ते कांफ़्रैंसा च बमहाग तगर दे अलाके थमां आए दे ग'बरू करसानें, बावा जित्तो दे प्रति श्रद्धालुओं होने करी इस नाटक गी बड़ी रुचि कन्नै दिख्खेआ। कां. धन्वन्तरी होरें, नाटक खेढने आले कलाकारों गी थापी दित्ती। मिगी पक्का यकीन ऐ जे टिकरी दे ठा. त्रलोक सिंह चनासिया ने बी एह नाटक ज़रूरी दिख्खेआ होना ऐ। उस समें डोगरी संस्था दे साधकें दा, ठा. त्रलोक सिंह हुन्दे कन्नै कोई खासा परिचय नेईं हा।
इस नाटक दे मंचन दी त्यारी ते उसी खेढने च जो मदद मदाद असेंगी टिकरी दे ठा. कर्नल सिंह हुन्दे कोला मिली, ओदे कारण ओहो साढे बड़े नेड़मां सहयोगी मित्तर बनी गे हे। इस नाटका बारै, पाठकें गी एह सनाना बी में ज़रूरी समझानां जे, बावा जित्तो दे जीवन पर लिखे गे इस नाटकै च, उसदे परिवारक जीवन गी खासा महत्त्व दित्ता गेआ हा। बावा जित्ते दी घैरआली माया दा किरदार बी पैंथल ग्रां दे इक गोरे, पतले घाटा आले जागतै ने कीता हा। 16-17 बरैं दी गौरी दे किरदार च, उसदे बचपने कारण ओहदे खि'न्नु ते गोटी खेढने दे द्रिश्य बी लोकें गी बड़े पसिन्द आए हे। जाबर, जगीरदार बीरसिंहै ते पहाड़ी करसान जित्तो दे मझाटे, उसदी फसली दे बंटारे पर जड़ा झगड़ा हुआ, ओह द्रिश्य बी खासा प्रभावशाली रहा। पर अखीर च जेल्लै जित्तो ने अपनी कटारी अपनी छाती च खो 'बने दा नाटक कीता ते जुआन ग'बरू जित्तो दी चिट्टे रंग दी फतूही दे
अन्दरें छपैलै दी घुले दे लाल रंगें आली रूऐं दी पोटली दा गूढ़ा लाल रंग सिमक्या चिट्टी फतूही पर फैलदा गेआ तां भलोके करसान-दर्शकें पर इक घनी चुप्पी छाई गेई ही। इस्सै 'सीन' पर साढ़ा एह नाटक समाप्त होआ हा। में उसलै स्टैजै पर कीते दे नीलियें चादरें दे पर्दे दे पिच्छें, रजिस्टरा परा पढ़ी-पढियै "प्राम्पट" (Prompet) करा करदा हा। इक जागत मेरे पिच्छें खड़ाेता दा, रजिस्टरा उप्पर बैटरी दी लोऽ सुट्टा करदा हा।
दूए दिन साड़ी नाटक-मंडली दे उ'नै ग'बरूएं कन्ने, जि'नें रातीं नाटकै च पार्ट कीते हे, करसान-कांफ्रैंसा च दूरा-पारा दा आए दे ग'बरू-करसानें, बड़े खुश होईयै गल्ल-बात कीती। उ'नें गी जकीन होआ करदा हा जे सच्चें गै समें च कोई तब्दीली जरूर आई ऐ। नेईं तां एह रियास्ती दे मैंतरी, ऐहलकार ते नेता लोक साढ़े कन्ने, साढ़े दुखै-सुखै दियां गल्लां की करदे? उ'न्दे आस्तै एह गल्ल बी चाबत लाने आली ही जे "अज्जै तग्गर साढे ग्राएं च, बरै च सिर्फ इक बारी रामलीला दा नाटक जागत जरूर खेढदे हे, पर इस कांफ्रैंसा च एह बावा जित्तो दे बलिदानें दा नाटक! पैहली हाकमी बेलै, जिमींदारें, जागीरदारें गी नीचा दस्सने आले ई'त्थै जेनेह नाटक कु'न खेढन दिन्दा हा?''
इस्सै टिक्करी कांफ्रैंसा च डोगरी संस्था पासेआ, इक होर बड़ी महत्त्व आली 'आइटम' (Item) बी पेश कीती गई ही। डोगरी संस्था कोल पहाड़ी चित्रकला दियां, कोई बीह (20) असली तस्वीरां बी ए हियां। पं. संसारचन्द होर उ'नें चित्रेंगी बी अपने कन्ने टिक्करी लेई आए हे। करसान-कांफ्रैंसा दे स्थानीय मुख्य प्रबन्धक, ठा. कर्नल-सिंह होरें इ'नें चित्रें गी प्रदर्शित करने आस्तै सिड़कें दे कंडे उप्पर गै इक हट्टी साढे आस्तै खाली कराई दित्ती। असें उस हट्टी दी सामनी कन्धे पर उ'नें चित्रें गी लाई दित्ता। इक भज्जी दी पुरानी मोटरै दा करांगा, चित्रें आली साड़ी उस हट्टी दे सामनै, सिड़का दे कंडे पर पेदा हा। पं संसारचन्द होरें मिगी ओदे उप्पर खड़ाेईयै, इस पहाड़ी चित्रकला दी नमेशा गी दिख्खने आस्तै करसानें गी ओने आस्तै सद्दे गी आखेआ। में उत्थै खड़ाेईयै केह भाषण दित्ता होग, मिगी अज्ज किश बी याद नेईं पर मेरे निमन्त्रण देने दे कम्मै च कर्नल सिंह होरें पूरा करी दित्ता? उ'नें दिनें सिड़का पर औने-जाने आली 'ट्रैफिक' (Traffic) बी बिरली गै हुन्दी ही। भलोके करसानें च बी इक भेड़-चाल-जन गै हुन्दी ऐ। मास्टर संसारचन्द होरं हट्टी दे अन्दर, इक लकड़ी दी पेटी पर खड़ाेते दे उ'नें चित्रें दे बारे च, उ'न्दे रंगें दे बारे च, ते उ'न्दे चित्रकारें दे बारे च जानकारी देआ करदे हे।
मिगी ओह् हट्टी, ओहदे च लग्गे दे ओह् चित्र, ते उ'नें गी दिख्खने आले ओह् भलोके करसान, अज्जै तक बिस्सरे नेईं। डोगरा-पहाड़ी चित्रें दी एह पैहली लौहकी-जनेही नमायश, किश बरैं दे बाद, जम्मू दे गान्धी-भवन च कायम होने आली उस "डोगरा आर्ट गैलरी" दा पैहला कोमल औंकर हा, जेहदा उद्घाटन स्वतंत्र भारत दे पहैले राष्ट्रपति डॉ. राजेन्द्र प्रसाद हत्थें होआ हा।
इस करसान-कांफ्रैंसा करी टिक्करी, 'डोगरी संस्था' जम्मू दियें साहित्यिक गतिविधियें दा इक बड़ा महत्त्वपूर्ण केन्द्र बनी गेई ही। असें त्रै-चार बारी उत्थै जाईयै, त्रलोक सिंह हुन्दे कन्ने, ओह् थाहर बी दिख्खेआ हा, जिसी त्रलोक सिंह होर 'दरेआ-बड़'' आखदे हे, ते किश मकामी
लोक "लाड़े-लाड़ी दा ढक" आखदे हे । इससे थाहर कदै गर्मियें दे मोसमें च कोला दे ग्रां दा इक गरीब जागत, औने-जाने आले लोकें गी पानी पल्याने दा कम्म करदा हा। इससे जगह ओह घटना घटी ही, जिसकी उस पानी पल्याने आले जागत दी, दूर ख'ल्ल जाइयै, पानी दा घड़ा (जां गागर) भरियै बिना बसांऽ कीते ढक चढियै उत्थै पुज्जने पर उसदी मौत होई गई ही।
उस थाहरा पर उ'नें दिनें रेतले कुप्पड़ा गी घड़ियै बनाई दी इक पालकी ते कुड़ियें दा दाज पाने आले पत्थरें दे घड़े दे पटार बी उप्परोंतली रक्खे दे हे। उस रस्ते औने आली इक पचेकी, पाणी पीने आस्ते, "दरेआ बड्ड" नां आले उस थाहरा पर आई रुकी। लाड़े समेत, मते जने त्रहाए दे हे। स'ब्बें हाबड़े दे पाणी पीन लगी पे। पानी दियां दो गै गागरां हियां सें खाली होई गेइयां। उस्सै बेल्लै पालकी दे अन्दर गर्मी च बेहाल बैठी दी लाड़ी ने पालकी दा पर्दा चुक्कियै ते बाहर झांकियै 'नियानी' गी आखेआ, "जाएओ, मेरे आस्तै बी पानी लेई आवेओ, मेरा गला सुक्की गेआ ऐ।"
पालकी चा मूँह बाहर कढ्ढियै लाड़ी गी पानी मंगदे, पाणी पल्याने आले जागतै ने दिक्खी लेआ। ओह गागर चुक्कियै, उस बिखड़े दन्दे पर बनी दी पतली-जनेही पगडंडी पासै जान लगा, तां ग'बरू जुआन लाड़े ने उसी तर्क कराइयै आखेआ, "जागता, जे खाली गागर लेइयै इस पगडंडी रस्ते ख'ल्ल जाइयै, पानी दी भरी दी गागर लेइयै इसै तेजी कन्ने बिना रुके-बसोए इत्थें आई पुज्जें तां लाड़ी होई तेरी।"
लाड़े दे मूढ़ साथियों जोरा दा गड़ाका मारेआ। पानी पल्याने आला जागत पगडंडी रस्ते दूर ख'ल्ल ढली गेदा हा। लाड़ा ते ओहदे साथी जनिहार दन्दे दे सिरे पर खड़ेते दे, पाणी दी गागर मूँढे पर चुक्के दे, उस्सै पतली पगडंडी रस्ते जागतै गी तौले-तौले उप्पर चढ्दे दिक्खा करदे हे। जागत परसो-परसा होई गेदा हा। उसी साह चढ़े दा हा, पर ओह दन्दे दे उप्पर आई पुज्जा हा। उसने अपनी छबीला दे कोल गागर रक्खी ते इक बारी सिद्धा खड़ाेता ते दूए खिन धड़ाम करदा सद्रेध भुंजा पर डिग्गी पेआ। ओहदे प्राण निकली गेदे हे। रौला पैई गेआ।
लाड़ी पालकी चा बाहर निकली आई। अपना झुंड गुहाड़ियै ओह उस जागता दी लोथा कोला आई खड़ाेती। कुसै स्याणे बुजुर्गें सलाह दित्ती, "हून इत्थें रुको नेईं। चलो लाड़े दा मूँह हिस्सा गेदा हा। नियानी ने लाड़ी गी पालकी च बौहने आस्तै आखेआ। लाड़ी ने नियानी पासै दिक्खियै आखेआ, "मेरी पालकी मेरे ठिकाने तगर पुज्जी गेई ऐ। तुस लोक जाओ। इस जागतै ने अपना प्रण निभाई दस्सेआ ऐ। हून में अपना प्रण कि'यां तोड़ां? जिन्ने मेरे कन्नै सत्त लामां-फेरे लेइयै मिग्गी इत्थें तगर आन्दा हा उसदा बचन में कि'यां तोड़ां? एह जागत गागर लेइयै जिस तेजी कन्नै ख'ल्ल ढलेआ हा, उस्सै तेजी कन्नै भरी दी गागर लेइयै ओह उप्पर आई पुज्जा। उसने, (लाड़े पासै शारा करियै) इ'न्दी शर्त पूरी करी दित्ती। हून इ'न्दी आख़ी दी दूई गल्लै गी पूरा में करंग। मेरा इ'न्दे कन्नै हून कोई 'रिश्ता' नेईं रेहा, मेरा सुहाग इस जागतै कन्नै जुड़ेआ बी ते खिने च खत्म बी होई गेआ।"
गुस्से च कम्बदे होई लाड़े ने, लाड़ी गी बांह दा पगड़ेआ ते पालकी आले पासै घसीटियै लेई चलेआ। लाड़ी ने अपनी बांह छुड़काइयै, रोहे कन्नै आखेआ, "दिक्खेओ, मिग्गी हत्थ लान्दा! मेरा तेरा हून कोई रिश्ता नेईं!"
लाड़ी इन्ना आखियै वापस जान लगी तां लाड़े ने उसी चूंडे दा पगड़ी लेआ ते कच्चे रस्ते दे पत्थरें परा घसीटदा दा लेई चलेआ। लाड़ी पैह्लें गै तरेहाई दी ही इस चाल्ली पत्थरें पर घसीटने करी उस दी मौत होई गई।
अग्गें-पिछें दे ग्राएं दे लोक बी उत्थें आई पुज्जे। उ’नें सारी गल्ल सुनियै उत्थें इक चिता बनाइयै दोनें लाशें गी किट्ठा दाह देई दित्ता। राम जानै, उत्थें बड़े कुप्पड़ा दी बनी दी ओह पालकी ते दाजा आले पतार कुन्ने बनाए, कुन्ने बनोआए, ते उस घटना दी साक्षी एह कलात्मक निशानियां कद्दूं बनाइयां गेइयां होंगन?
इस्सै थाहर ते एह्दे कोला, टिक्करी आले पासै, किश छिंडे पर कोई रौंसला सैल्ला थाहर दिखियै असें केई साहित्यिक गोश्टियां कीतियां हियां।
16 अक्तूबर, 1977 ई. आले ध्याड़ै, ‘‘डुग्गर दे अनलिखे इतिहासै दी खोज’’ शीर्षक संस्था दे प्रोग्रामें दे तैहत, असें टिक्करी च शायद अपना आखरी प्रोग्राम इक सैमीनार कीता हा। एह्दे च ठा. त्रिलोक सिंह होंगें ‘‘टिक्करी-चनास’’ शीर्षक कन्नै एह्दे च इक बड़ा ऐतिहासिक खोजपूर्ण लेख पढ़ेआ हा। ओह लेख डोगरी संस्था दी त्रिमासिक पत्रिका नमीं चेतना दे मार्च, 1978 ई. दे 43 में अंकै च, इस्सै सिलसिले दे दूए दो होर खोजपूर्ण लेखें कन्नै छापेआ गेआ ऐ। अपने उस लेखगी शुरु करदे होई त्रिलोक सिंह चनासिया ने लिखेआ हा— ‘‘म्हाड़े बड़े उत्तम भाग न जे डुग्गर दे मन्ने-परमन्ने दे बुद्धिजीवी ते मनीषी, जि’नें डोगरें दे अनलिखे इतिहासै दी खोज-पड़ताल करने दी एह स्तुति-जोग योजना शुरु कीती ऐ अज्ज (इत्थें टिक्करी च) पधारे दे न। उस उ’नदे बड़े धन्नवादी आं। अज्ज तुस सारे सज्जन जित्थें किट्ठे होए दे ओ, इक सदी पैहले, इस (सारे) थाहरा गी चनास आखदे हे। एह चनास उस समें च 84 ग्रां भलवालता ते 22 नाले बम्हाग दी हकूमता दा राजथड़ा था। अज्ज एह मुड़ियै इक मोहड़ा-मात्तर रेही गेदा ऐ।’’