‘‘एयर इंडिया’’ दे उत्तर भारती मैनेजर दी जड़ी चिट्ठी मिगी 11 मई 1971 गी थ्होई ओदा कोई इतिहासिक महत्त्व भाएं नेईं, पर मिगी इ'यां सेही होआ जि'यां ओ चिट्ठी डोगरी दी नमीं साहित्यक चेतना दा गै इक आदर-पूर्ण सम्हाला हा। इस चिट्ठी च एयर इंडिया दे अतिथि दे रूपै च, भारत दे पैहले बोइंग (Boing) 747— ‘‘सम्राट अशोक’’ दी लन्दन तगरै दी ‘‘पैहली डुआरी’’ (Inaugural Flight) च शामिल होने दा नीन्दरा हा। दो-ढाई सौ खास मेहमानें दी चन्दी च इक डोगरी लेखकै दा नां शामिल कीते जाने दा कारण, भारती नागरिक उड्डयन मंत्री डॉ॰ कर्णसिंह हुन्दी, डोगरी दी इस अदबी चेतना बारै, कोला दी जानकारी होई सकदा ऐ।
ए नीन्दरा थ्होने पर बी, एडी लम्मी ते ओपरी यात्रा बारै मिगी खासा संकोच हा। ए संकोच श्री बलराज पुरी ने दूर कीता। पासपोर्ट बनवाने च बी जम्मू च श्री पुरी ने ते दिल्ली च बंसीलाल गुप्ता ते एयर इंडिया दे श्री डोगरा ने खासी मदद कीती।
24 मई गी सवेरे 8-30 बजे मैं बिडला मन्दर (दिल्ली) थमां टैक्सी लेइयै कल्पना दे जम्बो जेट ते कल्पना दे लन्दन दी रूप-रेखाएं कन्ने केईं ख्याली शकलां बनान्दा ‘पालम’ (Palam) हवाई अड्डे जाई पुज्जा। जम्बो जेट बम्बई थमां लगभग 10 बजे सवेरे पालम पर उतरेआ, सारे गै पालम गी जि'यां सरकंडा उ'ब्बरी आया। जम्बो जेट पालम आस्तै बी इक नमां पक्खिरू हा। मेरे जनेह मेहमानें गी, इस यात्रा दे दौरान जेब-खर्च आस्तै कुल त्रै (3) पौंड बदेशी सिक्का, भारती 56-57 रुपें दे बदले च थ्होआ हा। पौंड-पौंड दे त्रै नोटें ? बस!
इ'नें बदेशी यात्राएं च बिस्तरा कन्ने लेने दी लोड़ नेईं पौन्दी। मेरे कोल अपना ब्रीफ केस ते चमड़े दी इक लौहकी-जनेही अटैची ही जेदे च, इक स्वैटर ते त्रै जोड़े तम्बी-कमीच ते इक अचकन ही।
जम्बो जेट, सम्राट अशोक च लगभग 350 यात्री सवार होए। जहाज़ी अमले दे लोकें दी गनतरी बी 40-50 दे लगभग होनी ऐ। जम्बो जेट दे, अन्दर, मिगी इस यात्रा च च'ऊं कुर्सियें दी मंझली रींगा च जि'नें त्रै'ऊं यात्रियों दा साथ थ्होआ, ओ हे : कशमीरा दे प्रसिद्ध चित्रकार गुलाम रसूल सन्तोष, गुजरात दे तरुण चित्रकार ईश्वर सागर (जि'नेंईं दिल्ली च होने आली 1971 दी अन्तर्राष्ट्रीय चित्रकला नुमैश च पुरस्कृत कीता गेआ हा) ते रोहतक (हरियाणा) दे ‘कृषि पंडित’ श्री पी॰ एल॰ बतरा।
जम्बो जेट दे अन्दर दोनें पासें दियें कन्थें पर, डोगरा-पहाड़ी (कांगड़ा-बसोहली) चित्रकला दी शैली च श्री कृष्ण दे जीवन दियें झलकियें दे सुन्दर चित्रें दी सजावट ही। जहाजा दे जिस
कम्पार्टमैंट च अस लोक हे- ओदे सामने, लगभग 6 फुट x 4 फुट दा पहाड़ी चित्र-शैली दा इक चित्र हा। दरबारै च बैठे दा, झारी छिक्कै करदा कोई पहाड़ी राजा, पर्वती सुन्दर गतारें दे गीत सुनै करदा ऐ।
जम्बो जेट दा सारा ओपरायण बल्लें-बल्लें दूर होई गेआ ते ओदे थाहर इक नमां ख्याली सरूर मिगी अपने रंगै च रंगदा चली गेआ। में सेही कीता जि'यां में पहाड़ी चित्रकला दे संरक्षक राजा संसारचन्द कटोच दे शीश-महलै च, ओदे दरबारै दी रंग-बरंगी महफ़ल दा मुजरा करें करदां। यात्री हैड फोन लाइयै जि'नें सत्तें संगीत-धाराएं (Channels) चा अपनी मर्जी दा संगीत सुनी सकदे हे, ओदी विवरण-पत्रका च प्रसिद्ध सन्तूर-वादक जम्मू दे श्री शिवकुमार शर्मा दे चित्र ने इस उड्डरदे शीशमहलै दे, इस डोगरा-पहाड़ी कला दे कोमल वातावरणै गी होर बी गूढ़ा करी दित्ता। इस चाल्ली जम्बो जैट च मेरी ए यात्रा इक खास अपनेपन दे वातावरणै च पूरी होई। महात्मा गान्धी दी आत्म-कथा दा अनुवाद करने दे अनुभवै करी में इस यात्रा च कट्टर शाक भोजी (Vegetarian) रेहा लगभग चार हजार कि०मी० दी इस यात्रा च एयर इंडिया ने अपने मेहमानें दा जड़ा आदर-सत्कार कीता- ओ उस शीश-महलै कल्पना दे ऐन मताबक हा। में खाने-पीने दी अपनी सीमा रेखा दे कारण इस आदर-सत्कार दा इक दर्शक बनियै जायज़ा लैन्दा रेहा। जोआन ते सुन्दर एयर होस्टेसिज़्ज़ ते कुशल स्टुअर्ट यात्रियों दियां, भान्त-सभान्तें यात्रियों दियां, खाने ते पीने दियां फ़रमाइशां पूरियां करने दी सारी खेचल्ल, मुसकराई-मुसकराइयै ते शिष्टाचार दे मधुर शब्दें दियें फुहारें कन्ने नभान्दे न। इ'नें कर्मचारियों दा इ'नें हवाइ यात्राएं च बड़ा महत्त्वपूर्ण योगदान ऐ। शलेपा, शिष्टाचार ते कुशलता, एयर होस्टेसिज़्ज़ च इ'नें त्र'उं गुणे दा होना किन्नै ज़रूरी ऐ।
एयर इंडिया दे मेहमानें गी योरप दियें प्रसिद्ध शराबें दे उपहार मुफ़्त पेश कीते गे। केइयें यात्रियों इस बारै अपनी कपैसिटी (समर्थ) परखने दा इसी सुनैहरी मौका समझेआ। दो-चार मनचलें गी इस दौड़ा च भुंज बी दिक्खनी पेई गेई। उ'न्दे करी बाकी यात्रियों गी खासी खिझ'ज ते नदामत होई।
5-6 सौ मील प्रति घंटा दी गति कन्ने ते 35-40 हजार फुट दी ऊंचाई पर उड्डरने आले ''सम्राट अशोक'' ने कुवैत दे हवाई अड्डे पर उतरियै अपनी यात्रा दा अद्ध पूरा कीता। जम्बो जेट दा सारा जहाजी अमला इत्थें बदली गेआ ते ओदे थाहर नमां कर्मचारी-दल आई गेआ।
कुवैत ! मध्यपूर्व दे रेगिस्तानी मरु च इक सुवर्ण नगरी! पेट्रोल दे भंडारें दी धरत! जित्थें सैली खब्बलै दी त्रिम्ब दुर्लभ न्यामत ऐ। कुवैत दे बा'द रोम (इटली) दे अड्डे पर उतरेआ। उस बेल्लै उत्थें, लन्दन दियें घड़ियें मूजब रातें दे 9 बजे हे। उस बेल्लै उत्थें, खासी जोरा दी बरखा ब'रै करदी ही। मिगी प्रो० लक्ष्मीनारायण दी गल्ल चेता आई जे लन्दन च बदलें दा कोई भरोसा नेईं ते जेल्लै ब'रै उसै बेल्लै ठंड। में उस बेल्लै अपने साधारण लाम्बे (तम्बी-कमीज़, बास्काट) च गै हा। पर में कोई खास ठंड सेही नेईं कीती। लन्दन दा हवाई अड्डा दिक्खियै दिल्ली दा 'पालम' मिगी बड़ा साधारण सेही होआ।
लन्दन एयरपोर्ट दे बाहर एयर इंडिया दे यात्री-कोच (Coach) तगर पुज्जने च कोई अड़ा
घंटा लग्गी गेआ। पासपोर्ट ते हैल्थ सर्टिफिकेट दी परख-पड़ताल मिंटें च होई गेई।
जिस होटलै च एयर इंडिया पासेआ साढ़े ठहरने दा प्रबन्ध कीता गेदा हा ओ लन्दन दे ‘हीथ्रो' हवाई अड्डे कोला कोई दो फरलांग दूर ऐ। ‘स्काई वे' (Sky Way) नां दा ए होटल-लन्दन दे ‘ए' क्लास होटलों चा इक ऐ। यात्रियें गी बखरे-बखरे कमरे मिले। मेरे कमरे दा नम्बर हा 3001- सैकंड फ्लोर दे उत्तरी विंग दा आखरी कमरा। टेलिविजन, रेडियो ते टेलीफून- इ'नें स'बनें सुविधाएं कन्ने लैस। टेलिविजन दा प्रोग्राम राती 12-30 तगर चलदा ऐ। ठंडे ते गर्म पानी दी सुविधा 24 घंटे प्राप्त। 24 मई रातीं मेहमानें दे ‘डिनर' दा प्रबन्ध इस्सै होटल च हा। मैं सिर्फ होटली जीवनै दे अनदिक्खे चित्र दिख्खने आस्तै ते इस जीवन दे 'एटिकेट' दी इक झलक लैने आस्तै एदे च शामिल हुआ। ‘पच्छमी जीवन' दी ‘लग्ज़री' (Luxury) च बी अपनी इक व्यवस्था ऐ, अपना इक दम्भ-दखावा ऐ, अपना इक रख-रखाओ ऐ। सफाई दा ते के आखना!
डिनर दे बाद कमरा नं० 3001 च परतोइये मैं आराम कुर्सी पर बैठा तां मेरे मनै च, अपने देसै दे इतिहासै दे 1757, 1857, ते 1919, 1942 ते 1947 केई सन् रातीं दी उस चुप्पी दे नकेबले च रहस्यपूर्ण पैछियें आंगहर फंघें दा फड़फड़ करदे उड्डदे चली गे। मैं उ'नें बदेसी साम्राज्यवादिथें दी धरती पर हा, जि'नें लगभग 200 ब'रा भर मेरे बिशाल देसै दा अत्याचार-पूर्ण शोषण कीता हा। 'मधुकर' दी कविता दे बोल चेता आए : 'देस बल्लें बल्लें ओदी दाढ़ें बिच्च जान लगा' । मेरे कमरे दे लाल पर्दे, लाल कार्पेट ते लाल बेड-कवर उस दुर्भा ग्यपूर्ण इतिहासै दे गै अंग सेही होन लग्गे। उस कमरे दी सुख-सुविधाएं च मिगी उस्सै साम्राज्यवादी लुट्ट-धुड्ड ते बेशमार डाकाजनियें दे सुराग सेही होन लग्गे। जि'नें उपनिवेशें दा इ'नें साम्राज्यवादी गोरी जातियें सदियें तगर शोषण कीता, उ'न्दे रंगदार लोकें दे बारे च, जाति, रंग ते धर्म दे नां पर इ'नें उपनिवेशवादियें किन्नी घृणा दा प्रचार कीता हा।
पर दूए दिन उस होटलै दे कोंटर पर कम्म करने आले जि'नें अंग्रेज़ नौजवान कुड़ियें-जागतें गी मैं दिख्खेआ, रिफ्रेशमैंट रूम च जि'नें प्रौढ़ अंग्रेज़ जनानियें गी खिलाने-पलाने दी सेवा करदे दिख्खेआ। वेटिंग थियेटर ते लाऊंज़ च जि'नें अंग्रेज़ ग'बरू पोर्टरें (कुल्लियें) गी यात्रियें दा सम्मान उ'न्दे कमरों च नेन्दे दिख्खेआ- उ'न्दे चा कुसै दे बी चेहरे पर ते व्यवहार च उस घृणा दा चि'न्न-निशान नेईं हा। उस साम्राज्यवादी हाकमी घमंडे दी कोई रेखा उथें नेईं ही। ओ सारे किरती-कम्मन लोक हे, जि'नहैं अपने देसै दे उ'नें साम्राज्यवादी शोषक स्वार्थें दी शायद पूरी जानकारी बी नेईं ही। होटला च चार दिन रहियै मेरे मनै दी ओ पैहली प्रतिक्रिया मती सारी शान्त होई गेई। अंग्रेज़ों गी भारत छोड़े दे 24 ब'रे होई गे हे। इस अर्से च मेरे देसा ने अपनी रोगी जीवन-स्थिति गी बदलने ते सम्हालने आस्तै बड़े जतन कीते न- उ'दा गै नतीजा ऐ जे मैं जम्बो जेट दी इस राजसी यात्रा दा अंग बनियै, उ'नें गै अंग्रेज़े दी राजधानी लन्दन दे इस अन्तर्राष्ट्रीय होटलै च ठैहरे दा आं। अज्ज मेरे च, किस्सै चाल्ली दा बी कोई हीन-भाव नेईं हा।
25 मई, मंगलवारें, राज्नगरी लन्दन दी सैर करने दा प्रोग्राम हा। होटल थमां ‘ब्रेकफास्ट' करियै अस सवेरे ठीक नौ बजे, डी लक्स यात्री-कोचें च बेहियै बाहर निकले। ड्राईवर दे कोल, अगली सीटों पर साढ़ी लेड़ी गाईड (Guide) बैठी दी ही। माईक ओदे कोल हा। यात्री-कोच के
हा, शीशे दा चलदा-फिरदा खु 'ल्ला कमरा हा, जेदे चा हर पासै दा द्रिश्श दिख्खने दी सहूलत ही। उस बेल्लै हौली-हौली बारीक फुहार पवै करदी ही। गाईड ने आखेआ "ऐसे गै मौसमै च लन्दन अपने कुदरती मूड च ल'बदा ऐ।" साढ़ा होटल लन्दन दे जिस हिस्से च हा, ओदा नां ऐ मिडलसेक्स (Middle Sex), लन्दन दे वेस्ट एण्ड कोला कोई 15-16 मील दूर।
इस विश्वनगरी दी पैहली झलकै च जिस चीज़ै ने मिगी प्रभावित कीता ओ ही उस धरती पर जीवन दी गतिशीलता। सिड़कें पर रंग-बरंगी मोटरें दी आवाजाई दा कोई एन्त नेईं हा, ते पही रफ्तार 50-60-70 मील प्रति घंटा। संस्कृत दे कुसै मनचले ने मोटर शब्दै दी व्युत्पत्ति कीती ही— "मृदि तरति इति" अर्थात् भुंजा पर तरने आली। लन्दन दियें मोटरें पर ओ गल्ल खूब फबदी ऐ। इन्नियें अनगिनत मोटरें, बसें दी एडी दौड़ ते पही हार्न बज्जने दा कोई छेड़-छडूका नेईं। चौकें च ड्रिल-जन करने आले ट्रैफिक दे सपाइयें दा नां-नशान नेईं। सारी ट्रैफिक आटोमैटक लाल, पीली ते सैल्ली रोशनियें कन्नै बज्झी दी। ट्रैफिक दे बारे च सिर्फ इक्क आदेश में मते थाहरें पढ़ैआ : ‘Give Way’ (रस्ता देओ)। ते किन्ना प्रभावपूर्ण हा ओ इक आदेश। डाइविंग उत्थें तेज़ ज़रूर ऐ, पर ऐ अनुशासन च बज्झी दी। जीवन दा ए बड़ा मार्मिक आदर्श ऐ : गति ते अनुशासन!
लन्दन दी इस बाहरली बस्ती च, सिड़का दे कोल जड़े बी रिहायशी मकान असेंगी नज़री आए ओ सब सुरुचिपूर्ण सेही होन्दे हे। आम तौर पर दुछत्ते। छत ढालमां ते अक्सर डार्क रैड्ड रंगे दे। हर मकानै पर टैलीविजन दे एरियल। मकान, बस्ती च दुए मकानें कन्नै मिलियै इक खास पैटर्न बनान्दे हे, पर इन्फ़रादी तौर पर हर मकान अपने च इक्क टकोडी इकाई हा-ओदा अपना गै घाट हा, शैलैपा हा। मकान के हे, सग्गोसारी दी इक लम्मी रंग-बरंगी चित्रशाला ही।
जिस रंस्तै साड़ी कोच-गड्डी लंघी, उ'नें महल्लें च तामें-तामें गिरजा-घरें दे क्रास ज़रूर ल'बदे रेह। इक महल्ले च इक्क कब्रिस्तान नज़री आया। बड़ा सुन्दर, साफ़ ते फुल्लें दियें क्यारियें कन्नै सज्जे दा थाहर हा। मरने आलें दे चेतें दी साम्भ-सम्हाल, मनुक्खी जीवनै दी सांझी कमजोरी ऐ। जिस सिड़का परा अस जा करदे हे, ओदा नां हा Telgarth Road— इस सिड़का दा ए नां दुरा तगर बनेआ रेहा। दिल्ली आला लेखा मोड़ा-मोड़ा दे बा'द नां बदलने आली खोद्धल इत्थें नेईं ही। पुरानी शैली दे रिहायशी मकानें च कुत्तै-कुत्तै नमें युगै दे चि'न्न-नशान, कई मंजले स्काई स्केपर (Sky Skaper) बी दैन्तें आंहर उ'नें मासूम भलोकी बस्तियें गी नापसन्दी दियें नज़रें कन्नै दिखदे सेही हुन्दे हे। इस इन्द्रपुरी च कुत्तै गरीबी बी होग ? ए खतोला पता नेईं उस चलदी बस्सा च कुत्थों उड्ड़रदा मेरे मनै च आई गेआ। उ'आं लन्दन दे जिस लाके चा अस लंघा करदे हे ओ सग्गोसारी दी गै बस्ती सेही होन्दा हा। रस्ते च सड़कें दे कन्नै-कन्ने पटरी (Pavements) पर चलने आले लोक बड़े तामें-तामें हे-अपवाद मातर। अस सवेरे नौ बजे चले हे। रस्ते च केइयें स्काई-स्केपर बिल्डिंगें दे शीशें चा असें कारोबारी दफ़तरें च लोकेंई बकाएदा कम्म करदे दिख्खेआ। गाईड ने सुनाया जे इत्थें ठीक नौ बजे कम्म-काज शुरू होई जन्दा ऐ। मैं सेही कीता जे इत्थें सच्चें मैनें च कम्म-काज शुरू होई जन्दा ऐ। मिगी अपना देस चेता आया। सिरें पर बोदें दा खक्खरा! लम्मियां चोड़ियां कलमां ते क्याड़ी पर बालें दी घनी छां (छप्पर), केईं बारी एदे कन्नै-कन्ने बनियां मुच्छों बी- लन्दन च ग'बरुएं दा ए आम फैशन हा। लिंकन (Lincoln) होटल दा
बोर्ड पढ़दे गै मेरे मनै च ब्रिटेन ते अमरीका दे सरबन्धें दा, दो सदियां पुराना रंगबरंगी बदलदा इतिहास फिरी गेआ। अमरीकनें, अंग्रेजें कोला घमासान लड़ाई लड़ियै अपनी आज़ादी लेई ही। समें बदले, सरबन्ध बदले। योरप दी कामन मार्केट च शामिल होने दे बरतानिया दे जतनें च, दस बरें भर इस्सै करी फ्रांस, जर्मनी ते दूए सदस्य देसें पासेआ लगातार भन्न पौन्दा रेहा, की जे ए देस बरतानिया गी अमरीका दा आश्रित, ओदा पिटठू, ओदा चिमचा समझदे हे। 26 मई गी रातौं, ‘स्काई वे' होटला दे अपने कमरे च टी० वी० (Television) पर बरतानिया दे प्रधानमन्त्री श्री हीथ दा इस्सै सिलसिले च फ्रांस दे राष्ट्रपति पांपिड्रयू कन्नै होई दी मुलाकातै दे बारे च टी०वी० प्रतिनिधि दा इक बड़ा रोचक ‘इंटरव्यू’ में दिख्येआ। इस मुलाकातै च श्री एडवर्ड हीथ इस गल्लै पर बड़े खुश हे जे श्री पांपिड्रयू ने बरतानिया गी सांझी मंडी च शामिल करी लेने दा भरोसा दुआया ऐ। इस गल्लै आस्तै बरतानिया गी फ्रांस ते जर्मनी, खास तौरै पर फ्रांस अगे बड़ा नीमां होना पेआ ऐ। खैर, अस लन्दन दे वैस्ट एंड च जाई पुज्जे दे हे। लन्दन दे स्मारक थाहर दिखने दा श्रीगणेश असें दरेआ टेम्स दे कंडे बरतानिया दी पार्लियामैंट दे इतिहासक भवनें कोला कीता। इत्थें 323 फुट उच्चे विक्टोरिया टॉवर पर उस धरती दा राष्टी ध्वज झुल्लै करदा हा। किन्ना गौह होन्दा ऐ धरती गी अपने राष्ट्री झंडे दा! असें भारतवासियें च अजें अपने राष्ट्री झंडे दा उस चाल्ली दा मान, गौह (गौरव) नेईं बनेआ। ए (इ)मारत, संसद दा अधिवेशन चालू होने कारण यात्रियें आस्तै बंद ही। असें एदा रूप-शलैपा बाहरा गै दिख्येआ। दिल्ली दा संसद भवन एदै कोला मता 'मैस्सिव' (Massive) ते रोबदार ऐ। पर इस भवनै दा इक हलचल-पूर्ण, प्राचीन इतिहास ऐ। साढे संसद भवनै दा इतिहास अजें हुन बनना शुरू होआ ऐ।
पालियामैंट भवनै दे कोल गै अंग्रेज बादशाहें (ते बेगमें) दी ताजपोशी दा तिलक-स्थान ऐ ‘वेस्ट मिंस्टर एब्बे (West Minster Ebbey)। इस महत्त्वपूर्ण इतिहासक एब्बे (गिर्जे) गी असें गाईड दी सहायता कन्नै भलेआं अन्दरा फिरियै दिख्येआ। ए, गिर्जा सन् 1050 च सम्राट् एडवर्ड (द कन्फैस्सर) ने बनवाया हा। दूए बादशाहें बी लगातार एदे शलैपै ते महत्तव च बाद्धा करने दा जतन कीता। ओक लकड़ी दी ओ कुर्सी जेदे पर नमें बादशाह दी ताजपोशी दी आखरी रस्म पूरी होंदी ऐ, सन् 1300 च एडवर्ड (प्रथम) आस्तै बनी ही। इस कुर्सी दे चौनें पैरें दे अन्दरोआर स्काटलैंड दे बादशाहें दा ओ इतिहासक पत्थर पेदा ऐ, जिसी अंग्रेज बड़ी भाग-नशानी समझदे न। इस पत्थरै दा नां ऐ स्टोन ऑव स्कोन (Stone of Scone)। स्काटलैंड दे निवासी इस पत्थरै गी बापस लेई जाने दे सुपने दिखदे न। ए गिर्जा दिखियै, अस लन्दन दे इस केन्द्र प्रदेश दियां सुन्दर, सादियां पर पक्कियां अमारतां, बैंकिंग सैंटर, ब्यापार केन्द्र, दिखदे-दिखदे विक्टोरिया स्ट्रीट चा होइयै बकिंघम पैलेस दे सामनै जाई पुज्जे, जो बरतानिया दी बर्तमान साम्राज्ञी एलिज़ाबैथ (द्वितीय) दा नवास-स्थान ऐ। एदे कोला गै दूए पासै वाईट हाल ऐ ते 10 डौिनिंग स्ट्रीट नां दा, इंगलैंड दे प्रधान मन्त्री दा सरकारी निवास-स्थान ऐ। बकिंघम मैहल दे कोल गै, पूर्व आले पासै असें लन्दन दे मशहूर हाईड पार्क दी ओ नुक्कर दिक्खी, जित्थें सियासी मजम्मे लगदे न ते रंग-बरंगे भाषण होन्दे न।
लन्दन दी जन-संख्या, गाइड ने दस्सेआ, इक करोड़ ऐ पर इन्नी घनी आबादी दे इस शैहरा च जगा-जगा अनेकां सैल्ले, सुन्दर पार्क बी असें दिक्खे। पिक्कैडली (Piccadily) लन्दन दा
'कनाटप्लेस' ऐ। असें इसी औन्दे-जन्दे जिन्ने बारी दिक्खेआ, हर बारी एदी रंगत ते एदा 'मूड' होर चाल्ली दा सेही होआ।
लन्दन च ट्रेलाफगढ़ चौक (Trafalgar Square) बड़ा सुन्दर स्थान ऐ। इत्थों दे फुहारे, बेशमार कबूतर ते मझाटै धातु दे बने दे, चौं बिशाल शेर-मूर्तियें आले चबूतरे पर 184 फुट उच्चा ओ गोल स्तूप (मनारा) ऐ, जेदे उप्पर जर्नल नैलसन दी पाषाण-मूर्ति स्थापत ऐ।
इस चौक दे उत्तर पासै लन्दन दी नैशनल गैलरी ऐ ते ओदे कोल गै नैशनल पोर्टरेट (Portrait) गैलरी। पिक्कैडिली सर्कस कोला ट्रेफालगढ़ चौक तगरा दे इस लाके गी, जड़ा लन्दन दा दिल सेही होन्दा ऐ, थिएटर लैंड बी आक्खेआ जन्दा ऐ। चौक दे पछमी पासै लन्दन दी रायल अकैडमी ऐ ते पूर्वोत्तर पासै ऐ बुशहाऊस, जित्थें बी० बी० सी० दे स्टुडियो न। इस्सै बुश-हाउस दे कन्नै लगदी अगली (इ)मारत "इंडियन हाई कमीशन" दी ऐ। जित्थें उसलै श्री अप्पा पन्त नां दे अधिकारी भारती उच्चायुक्त हे। हाई कमीशन च जम्बो जेट दे मेहमार्नै कन्नै उच्चायुक्त ने इक दिनें च दो बारी मुलाकात कीती। इक बैठका च उच्चायुक्त ने भारत ते बरतानिया दे आर्थिक ते राजनीतिक सरबन्धें बारै बड़े ब्योरे कन्नै चर्चा कीती। उन्दा सुर खासा आशावादी हा। 25 मई गी चाह दे बा'द, हाई कमीशन च, जम्बो जेट दे मेहमार्नै आस्तै इक सांस्कृतक-संध्या दा आयोजन होआ, जेदे च कथ्थक नाच ते पछमी-संगीत दा प्रोग्राम पेश कीता गेआ। ओह प्रोग्राम, पता नेईं मिगी किश उथला ते बेजान सेही होआ। नर्तकें च अंगें दी हलचल मती ही- कला दी गहराई ते कोमलता घट। इक मदरासन कलाकार, "ऊषा आयर" ने पछम्मी (Western) संगीत दियां चार-पंच चीजां पेश कीतियां। मेरे कन्नै कश्मीरी चित्रकार सन्तोष बैठे दे हे। मैं उ'न्नेईं इस कलाकारै बारै पुच्छेआ तां ओह आखन लग्गे- "अंग्रेजी संगीत की बड़ी मशहूर फनकार है।" सांवली ऊषा आयर ने बड़े विश्वास कन्नै गाएआ।
25 मई गी गै असें लन्दन च दो होर मशहूर थाहर दिक्खे। उ'न्ने-चा इक ऐ 1350 साल पुराना सेंट पाल दा अति प्रसिद्ध गिर्जा (St. Paul's Cathedral)। गाइड दे शब्दें च- One of the most famous landmark in the Capital (राजधानी दे अति महत्त्वपूर्ण थाहरें चा इक)। इस्सै थाहरा पर पैहलें सैक्सन ते फी नार्मन जातियें गिर्जा बनेआ हा, पर 7मीं सदी च लन्दन दे इक अग्निकांड च ओ जली गेआ हा। वर्तमान कैथड्रल 1710 ई० च बनियै तयार होआ हा। सर क्रिस्टोफर रेण (Wren) नां दे मशहूर आर्किटेक्ट ने इस दा नक्शा बनाया हा ते उस्सै दी निगरानी च ए अमारत बनी ही। ए कैथड्रल लन्दन च प्रोटेस्टेंट इसाइयें दा सारें कोला बड़ा गिर्जा ऐ। एदे गुम्बद दी चोटी, भुंजा कोला 365 फुट उच्ची ऐ। इस्सै दे इक हिस्से च नैलसन ते वलिंगटन नां दे मशहूर अंग्रेज जर्नलें दियां कबरां न। दरेआ टेम्स इस गिर्जे दी इमारत दे कन्नै बगदा ऐ। इस गिर्जे दी वास्तुकला ते साज-सजावट बड़ी गै प्रभावपूर्ण ऐ। एदे प्रधान प्रवेश दे कोल गै प्रबन्धकें पासैआ गिर्जे दे 'रैनोवेशन' आस्तै 30 लक्ख पौंड दी अपील टंगी दी ही। काश दुनिया च स'बनें धर्में दे मन्दर, गुरुद्वारे इस्सै गिर्जे आंहेगर साफ, सुन्दर, सज्जे दे ते कलाएं दे केन्द्र होन्दे!
एदे बा'द असें लन्दन दा इक होर इतिहासक स्थान दिक्खेआ : "टाॅवर ऑफ लन्दन" गाईड ने आक्खेआ- For nearly a thousand years history has been made in the
Tower of London (अर्थात् उस देसें दा इक हजार बरें दा इतिहास इसै दुर्ग-किले कन्ने जुड़े दा ऐ)। पराने समें च, लन्दन दा, पूर्व पासें दे पैहरेदार, टेम्स दे पछमी कंधे पर इक हजार ब'रा पराना ए किला, बड़ा गै रोमांचक थाहर ऐ। ए लन्दन दा लाल-किला ऐ! "Many famous and infamous people were executed in it— (केई मशहूर ते गुमनाम लोकें दे सिर इत्थै कप्पे गे हे)। जर्मनी दा हर हेस्स सन् 1942 कोला सन् 1969 ई० तगर इसै किले च कैद रेहा। इस पराने किले दे बिजली कन्ने जगमग करदे इक तैहखाने च अंग्रेज बादशाहें दे मुकट-मणियां, खास शीशे दे खास संदूकें च रक्खे गेदे न। इ'नें जवाहरातें च गै में भारत दा मशहूर कोहेनूर हीरा बी दिक्खेआ। राजमाता दे क्राऊन पर जड़ेदा। 'टावर ऑफ लन्दन' बारै जुड़ी सचित्र पुस्तक में खरीदी- ओदे पैहले शब्द हे- The Tower of London has been called "The Cradle of the English race', for it was has here that England had her first beginning as a Nation. It is the oldest palace, fortress and prison in Europe."
इस चाल्ली 25 मई दा ए दिन लन्दन दे इतिहासक स्थानें गी दिक्खने च गुजरेआ। लन्दन सच्चें गै राजानगरी ऐ। क्या सफाई ऐ, क्या व्यवस्था ऐ, क्या अमारतां न, क्या सग्गोसारी ऐ, क्या जीवन ऐ! पर दरअसल अस इस यात्रा च लन्दन दा ए उपराला रूप-शैलैपा गै दिक्खी सके- ओदे जीवनै दे अन्तराल दा मुजरा करने दा असेंगी कोई मौका जां सुजोग नेईं मिलेआ। 26 मई गी असें इक बारी फैही लन्दन दा ए अलाका पैदल फिरियै दिक्खेआ। मिग्गी सिर्फ दो बुड्ढे आदमी भिक्ख मंगदे नजरी आए। सहायता दी इक लिखत अपील-पट्टी कोल रखियै इक थाहर बैठे दे। ग'बरू जागत-कुड़ियें दे केईं जोड़े, बाहें च बाहमां पाइयै, औन्दे-जन्दे जां कुत्तै खड़ांते-बैठे दे ल'ब्बे पर बाकी दुनिया कोला जि'यां ओ बे-न्याज़ हे, बाकी दुनिया बी उ'न्दे बारे च उस्सै चाल्ली उदासीन ही। 'बाबी' नां दे पोलीस कर्मचारी, लन्दन दी इस सुन्दर व्यवस्था दा बड़ा महत्त्वपूर्ण अंग न। इंडियन हाई-कमीशन चा निकलियै 'पिक्कैडिली सर्कस' कोला होन्दे होई जिसलै में अपने द'ऊं साथियें कोला खिंडी गेआ तां इक 'बाबी' ने गै उस अनजाने समुन्दरै च मेरी मदद कीती ही। लन्दन दे इस हिस्से च विदेशी यात्रियों दा इ'नें दिनें खासा ज़ोर रौहन्दा ऐ। उ'नेंगी हर चाल्ली दी जानकारी देना ते उ'न्दी मदद करना इ'नें ग'बरू सैन्तरियें दी ड्यूटी ऐ। इ'न्दी गैहरी नीली बर्दी ते खास किस्मै दी नीली टोपी- इन्दी टकोदी पनछान ऐ।
दुकानें पर-- हर जगह बाहर शो-केसें च चीज़ें दे नमूने ते उ'न्दे भाऽ-मुल्ल लिखे दे हुन्दे न। इत्थै भाऽ-मुल्ल करने दी कोई खेचल नेईं, कोई झगड़ा नेईं।
25 मई संजा एयर इंडिया दे रिजनल डायरेक्टर पासेआ 'स्काई वे' होटलै च कॉकटेल ते डिनर दित्ता गेआ। 26 गी साढ़ा रातीं दा खाना लन्दन दे इक बड़े मशहूर होटलै च होआ, जेदा नां हा "टॉक ऑव दि टाऊन"- वेस्ट एण्ड दे पिक्कैडिली सर्कस दे लाके च जित्थै एयर इण्डिया दा बुकिंग आफिस ऐ। असें लन्दन दे समर्थ वर्ग दे जीवन दी इक झलक इस होटलै च दिक्खी। डांस ते कैबरे, जेदे च लगभग 30-40 गौरांग्नां ते त्रै-चार पुरख-पात्र हे- बिजली कन्ने चलदे, बदलदे स्टेज-दृश्यों ते प्लेट फार्म पर रंग-बरंगी रोशनियें च जमनास्टक-नुमां अंग-भंगियें आले
नाचें दा ओ प्रदर्शन, मेरे पूर्वी संस्कारें गी बड़ा बोझल सेही होआ। बिलकुल सस्ता, कला-हीन प्रदर्शन!
रातीं अपने होटल दे कमरे च में कल्ला बैठै दा इ’नैं द’ऊं दिनें च दिक्खे दे लन्दन दे स्थिर ते गतिशील जीवनैं दे चित्रें गो मनैं दे स्क्रीन पर दुरहान लगा।
गिरजा-घरें च धार्मिक गौरव दी रंगत उन्नी गहरी नेईं सेही होई, जिन्नी इतिहास ते ऐश्वर्य दी। अंग्रेज़ी वास्तु कला दे अत्यन्त मनोरम नमूने न ए कैथेड्रल, ऐबे ते गिर्जें। लन्दन, अपनियें कला-गैलरियें आस्तै संसार भरै च मशहूर ऐ। अपने इतिहास दा गौरव अंग्रेज़ें बनाई रक्खे दा ऐ। इस लौहके-जनेह टापू च सीमित इस जाति ने किन्ने साहसपूर्ण कम्म कीते न- चंगे बी माड़े बी ते सैंकड़े सालें दियें अपनियें परम्पराएं गी इ’नैं कि’यां सम्भाले-सम्हाले दा ऐ!
27 मई (बीरवार) सवेरे सवा नौ बजे यात्री-कोच ऑक्सफोर्ड नगर ते शेक्सपियर दी जन्मभू स्ट्रैटफोर्ड ऑन एवान पासै चले। आक्सफोर्ड दा क्सबा लन्दन कोला कोई 40-45 मील उत्तर-पूर्व (N.W.) पासै ऐ ते शेक्सपियर दी जन्म भूमि, आक्सफोर्ड कोला अग्गें कोई 30 मील। अज्जै दी यात्रा इ’नैं दोनें थाह्रें करी ते महत्त्वपूर्ण ऐ गै ही, ए इसकरी बी मेरे आस्तै यादगारी यात्रा ही की जे इस दिन लन्दन दी गैहमागहमी चा निकलियै इंग्लैण्ड दा देहाती जीवन ते देहाती इलाका दिक्खने दा असेंई मौका मिलेआ हा। सवेरे, पौंदी फुहारा च गै यात्री-कोचें च अस निकले हे। शीशें पर कोमल धुन्दै दी परत जमीं जन्दी ते तलियें कन्नै ते रूमालै कन्नै घड़ी-घड़ी उसी साफ करियै बाहरा दा नज़ारा लेने आस्तै थोड़ा थाह्र बान्दा करना पौन्दा। 'स्काई वे' होटल थमां चले दे 15 मिंटें बा’द उत्तर आली बक्खी इक उच्ची टिब्बी पर विंडसर कौस्सल दे मनारे ते बुर्ज बदलियें च छप्पन-लुक्कन करदे ल’ब्बे। ल’ब्बे नेईं, कौच च कन्ने चलने आले गाईड ने असेंगी दस्से। जिस रस्तै साढ़ी बस जा करदी ही ओदे आले-दुआले दा सारा लाका टेम्स दरेआ दी घाटी दा इलाका हा। दपासै खेतर- काफी बड्डे-बड्डे खेतर हे, जि’न्दै च आमतौरै पर कनकें दी घनी फसल, फुट सवा फुट भर मठोई दी ही। मेरे कन्ने हरयाने दे कृषि-पंडित श्री बत्तरा बैठे दे हे। उ’नैं आखेआ ए गमें-भिड़ेंडें दे चारे लेई होनी ऐ। उ’आं इत्थें कनक जून च गै पकदी ऐ। मार्च-ऐप्रल ते इत्थें बड़े ठंडे महीने हुन्दे न। हर जगह कनक गै कनक, बिच बिच सरेंआं दियां पीलियां चौरस पैलियां, ते कुतै-कुतै आलुएं दे खेतर।
लगभग दस मिंटें बा’द साढ़ी बस इक ऐसी जगह जा लंधी जेदै दपासी बूटें दा जाड़-जन हा। अगली सीटें पर बैठे दे गाईड दे माईक चा आवाज आई- “Here in olden days, highway men would hide and rob the people at pistol point.” (पराने समें च इत्थें डाकू, लोकें गी बन्दूक दस्सियै लुट्टी लैन्दे हे)। पर अज्ज इस मुफस्सलात दी सड़का पर रंग-बरंगी कारें दी इक दौड़-जण लगातार चलदी सेही होन्दी ही।
इस थाह्रै कोला थोड़ी दूर अग्गें जाने पर, कु’छ दे अग्गें पत्तनी दी ढलाई दे मोड़ें दा चेता आई गेआ। उ’थै जनेह देयार ते पहाड़ी सिलसिला भाएं इत्थें नेईं हा, पर कोई चीज़ ऐसी ऐ ही जिसने मिगी एकदम ‘कु’छ’ दा चेता कराई दित्ता।
सवेरे 10.30 बजे अस आक्सफोर्ड नां दे कसबे च जाई पुज्जे। रॅडाल्फ नां दे इक होटला च
असं काफी दा प्याला-प्याला पीता ते फही इत्थें रुकियै अस आक्सफोर्ड यूनिवर्सिटी दी अमारत ते उस यूनिवर्सिटी दा सारें कोला पुराना कालेज 'क्राइस्ट कालेज' दिक्खन चली गे। कालेज दे अन्दर जाने पर, मिगी अपने दिक्खे दे कालेजें कोला ओ थाहर बिल्कुल होर चाल्ली दा सेही होआ। विद्यार्थी आवा जा करदे हे, जागत बी कुड़ियां बी, पर कुसै ने बी साढे बारे च किसै चाल्ली दा कोई कौतूहल नेईं दस्सेआ। अस सारे भारती यात्री हे। कालेज दी एह् अमारत कोई 400 साल पुरानी ऐ। गाईड असेंईं कालेज दे डाइनिंग हाल पासै लै गेआ। लगभग 150 विद्यार्थीं दे 'लंच' आस्तै कप्प-सासर रक्खे जा करदे हे। हाल दे अन्दर कन्धें पर लगभग 60 बड्डे-बड्डे आयल पोटरैट टंगे दे हे। उस कॉलेज कन्नै सरबन्ध रक्खने आले विद्वानें-अध्यापकें दे चित्र। 12 बजे अस कॉलेज दे अन्दर इक गिर्जे दे कोलें लंघे। उस बेल्लै ओदे भित्त बन्द हे, अन्दर प्रार्थना होआ करदी ही। मिगी ए दिक्खने दा चाऽ हा जे दिक्खां कॉलेज दे किन्ने जागत-कुड़ियां गिर्जे दी इस प्रार्थना सभा च शामिल होए दे न!
आक्सफोर्ड च असें यूनिवर्सिटी दा मशहूर शैलडोनियन हाल (Sheldonian theatre) बी दिक्खेआ। इस यूनिवर्सिटी दा, उपाधियां देने दा दीक्षान्त समारोह (Convocation) इस्सै लौहके जनेह् पर ऐतिहासिक हाल च होन्दा ऐ। किन्ना महत्वपूर्ण हा ए पुरानी वजह दा हाल, जेदे च सिर्फ चार-पंज सौ आदमीं दे बौहने दी जगह ऐ। हाल दे व्यवस्थापक ने असेंईं इस हाल दे बारे च बड़ी तफसील कन्नै दस्सेआ-समझाया। हाल दे अन्दर जाने आस्तै हर यात्री गी 3 पैंस दी प्रवेश-चिट लैनी पेई। आक्सफोर्ड दे इक होटलै च साढे लंच दा प्रबन्ध हा जेदे बा'द लगभग दो घंटे असें फिरियै-तुरियै इस शेहरा दे केईं नमें-पराने थाहर दिक्खे। इक 3-4 सौ ब’रा पुरानी सरां (Inn) दिक्खी- अज्ज बी उत्थों दा वातावरण उस्सै प्राचीन परम्परा दा चेत्ता करान्दा ऐ। रेडिमेड गार्मेंटस दी इक ऐसी खु'ल्ली मार्केट च अस चली गे जित्थें जनाने-मर्दानें ते बच्चे-बुड्ढें स’बनें आस्तै हर चाल्ली दे रेडिमेड कपड़े मिली सकदे हे। बक्खरे-बक्खरे हिस्से, बक्खरे-बक्खरे कौंटर, हर हिस्से च सेल्स-वूमन ते कीमतें लिखी दियंन निश्चत। मैं उत्थों चार जोड़े जराबां खरीदीयां- इक पौंड दियां।
लगभग त्रै बजे अस इंग्लैंड दे अमर कवि-नाटककार शेक्सपियर दी जन्म-भूमि दिक्खन चली पे। रस्ते च थोड़े-थोड़े छिंडे पर ग्रां औन्दे रेह। मामूली ग्रां, जि'न्दा नां वगैरा साढे गाईड गी बी पता नेईं हा, पर ग्रां च हर घर पक्का, उस्सै चाल्ली दा जनेह दच्छते मकान अस रस्ते दे कस्बे-नगरें च दिक्खदे आए हे। कोई मकान ऐसा नेईं ल'ब्बा जेदों छत्ता पर टी० वी० दा एरियल नेईं हा। 'टेलीविजन' उस मुलखै च सम्गोसारी दी निशानी नेईं, जीवन दा इक जरूरी अंग ऐ- मनोरंजन, शिक्षा ते प्रचार दा प्रभावपूर्ण साधन!
स्ट्रेटफोर्ड जन्दे होई रस्ते च टेम्स दे कंडे ब्लेडन (Bladon) नां दा ओ ग्रां बी गाईड ने असेंईं दूरा दस्सेआ, जित्थें इंगलैंड दे प्रधानमंत्री चर्चिल गी ओदी इच्छा अनुसार दफ़नाया गेआ हा। रस्ते च दरम्याना-कद्द झाड़ियां चिट्टे फुल्लें कन्नै लदोई दियां हियां। गाईड ने दस्सेआ- इ'थै न 'मे फ्लावर' (May Flower)- इस बसन्ती मौसमें च प्रकृति दा ए मनभाना शंगार ऐ। चार बजे संजा अस उस गौरव-भूमि पर पुज्जे? एवान (Avon) नां दी इक सील, शान्त नदी कस्बे दे
उप्परले सिरे पर बगदी ऐ। शेक्सपियर दे घरा सामने जाइये इ 'यां सेही होआ जि 'यां ए थाहर ओपरा नेईं ऐ, की जे शेक्सपियर साढे गितै कोई ओपरा-अपरिचित साहित्यकार नेईं हा। शेक्सपियर दा ए प्राचीन घर सड़के दे ऐन कंधे पर ऐ। सिर्फ इक फुटपाथ मंझाटै ऐ। आले-दुआलै सारे मकान नमें न। बिच्च एहु एह इक चार सौ साल पराना मकान ऐ। उस दिन, उस बेल्लै बी उत्थें लगभग दो-त्रै सौ यात्री ऐ हे। भारती यात्री कोई 50-60 गै हे। जम्बो जेट दे भारती मेहमानें चा इन्ने सारे लोक गै इ 'नें थाहरें गी दिक्खन आए हे, बाकी दे लोक, रातों, 'ए' क्लास होटलें च कॉकटेल ते डिनर-डांस दे प्रोग्रामें च गै नजरी औन्दे हे।
शेक्सपियर दे इस जन्म-भू नगरै च असें होर बी दो-त्रै पराने सुरक्षित मकान दिक्खे, जि 'न्दा सरबन्ध शेक्सपियर दे किज नजदीकी रिश्तेदारें कन्नै ऐ। इ 'नें स 'बनें इतिहास-स्मारखें दी साम्भ-सम्हाल इक ट्रस्ट (Trust) करदा ऐ। शेक्सपियर दे घरे दे अन्दर उस गरीबी दी छाप बड़ी स्पष्ट ही, जेदी गोदा च उस विश्व-साधक ने अपना बचपन ते लड़कपन गुजारेआ हा। स्ट्रेटफोर्ड च नाटककार शेक्सपियर दे गौरव दे अनुरूप इक नाटक-घर ऐ- 'रायल शेक्सपियर थिएटर'। ए थियेटर-हाल एवान दरया दे ऐन कंधे पर इक अमारता दी पहली मंजला पर ऐ। ख 'लकी मंजला च इक रेस्टोरां ऐ। संझा बेल्ले दी चाह असें इत्थें गै पीती। थियेटर हाल दिक्खने दी इच्छा ही, पर पता लग्गा जे उस बेल्लै उत्थें शेक्सपियर दा नाटक "हेनरी पंचम" दा प्रदर्शन चला करदा हा। बाहर निकले तां इक बोर्ड पर इस थियेटर दा प्रोग्राम पढ़ेआ :
- मर्चेंट आव वीनिस (30 मार्च 1971 कोला) 2. ट्वेल्फथ नाईट (8 अप्रैल कोला) 3. हेनरी पंचम (28 अप्रैल कोला) 4. दि डच्चेस आफ हल्फी (15 जुलाई कोला) 5. .....ऑव एयन्स (अगस्त) ते 6. ओथेलो (सितम्बर)
(112वां शेक्सपियर सीजन (Season), मार्च कोला दिसम्बर 1971)
कैसा अमर नाटककार हा शेक्सपियर! अस भारती विद्यार्थी कालीदास गी भारत दा शेक्सपियर आखने आं। पर किन्ने कालिदास थियेटर न साढे देसै च? शेक्सपियर दे नाटकें दी संख्या ते विविधता! ओह, ओदा के मुकाबला ऐ? दुनिया उ 'नें नाटकें गी पढ़ी-पढ़ी रजदी गै नेईं। अस डोगरी च बी उ 'नें नाटकें दा अनुवाद करने दी सोचै करने आं। 'शकुन्तला' उस बेल्लै तगर डोगरी च नेईं ही आई। मां 'मैकबेथ' दा इक रूपान्तर संस्कृत दे इक प्राध्यापक (प्रो० सत्यपाल) ने जरूर प्रकाशित कीता दा ऐ।
स्ट्रेटफोर्ड थमां अस संझा छे बजे वापस परतोए।
28 मई दे दिन बी इंगलैंड-दर्शन दा प्रोग्राम हा। इस दिन असें हाम्पटन-कोर्टस, मेडन-हैड, ते विंडसर कासल नां दे प्रसिद्ध थाहर दिक्खे। हाम्पटन-कोर्ट, ट्यूडर बादशाहें दे मैहल न। अज्ज बी इ 'न्दी साम्भ-सम्हाल बड़े जतनें कन्नै कीती जन्दी ऐ। राजसी वैभव दा ठाठबाट के ऐ, जि 'यां पुराने इतिहासै दे किज ध्याऐ दे चमकदे सुनैहरी सिलेख न! ते 'विंडसर कासल' (किला), टेम्स दे कंधे पहाड़ी पर स्थित बड़ी विशाल ते प्रभावित करने आली किलेबंदी ऐ। लन्दन दे सम्राट-सम्राज्ञी दा ए राजकी निवास-स्थान ऐ। जित्थें सम्राज्ञी दा निवास ऐ, उस गोल टावर गी छोड़ियै, इस 'कॉसल' दे बाकी सारे थाहर सैलानी लोक दिक्खी सकदे न।
'रायल एपार्टमेंट्स' इस कौसल दा ओ हिस्सा ऐ जेड़ा कदै इ'नें बादशांहें दा राजकी निवास-मैहल हा। ए मैहल अंग्रेजी कलाएं दा अपूर्व संगम ऐ। मूर्ति-कला, चित्रकला, प्रसादन कला, कार्विंग, फरनीचर, साज-सम्मान! मैहल दे सारे कमरे, अपनी मौलिक साज-सजावटै च गै सुरक्षत रक्खे गेदे न। जि'यां, होर घड़ी गी इत्थें उ'नें लोकें पही आई जाना ऐ। ए बादशाह दा ड्राईंग रूम ऐ, ए बादशाह दा स्टेट बैड्ड-चैम्बर, ए बादशाह दा डैसिंग रूम, ए बादशाह दी बैठक ऐ। इस्सै चाल्ली बेगमें दे बक्खरे-बक्खरे सज्जे-सजाए दे कोष्ठ न। सब कमरे चित्रकला दे नमूने कन्नै सज्जे दे। दरबार-हाल, दावत-हाल, डांस-हाल, स्वागत-हाल। गाईड दसदा जा करदा हा। इक बड़ेरे हाल च पुज्जयै गाईड ने आखेआ- ए वाटरलू चैम्बर ऐ। वाटरलू दे मकाम पर नैपोलियन पर विजय दी खुशी दी दावत देने आस्तै जार्ज (चौथे) ने इस चैम्बर गी खास तौरै पर सजाने दा हुकम दत्ता हा। 150 मेहमानें आस्तै एदे च दावत दा इन्तजाम कीता जाई सकदा ऐ। गाईड ने, उस पिँक हाल दे फर्श पर पेदे पिँक कार्पेट (कालीन) पासै इशारा करदे होई दस्सेआ:-
"इस हाल दा ए शानदार कालीन, सारे योरप च जेदे बरोबर दूआ कोई बी कालीन नेईं ऐ, महारानी विक्टोरिया आस्तै भारत वर्श च आगरा नां दे शैहरे दी जेल्लै च तयार कीता गेआ हा।" मेरे कन्नै दे दूए भारती मेहमानें गी ए गल्ल सुनियै खुशी होई जां दुख होआ, में आखी नेईं सकदा, पर ओदे बाद विंडसर कौसल च होर किज बी दिखने दी रुचि मेरे मनै च नेईं ही रही।
अपनी गुलामी ते बेबसी दा ए चेत्ता, फही उ'नें जख़में गी दुखाली गेआ हा।
च'ऊं दिनें दे इस प्रोग्रामै च त्रै दिन असेंई जड़े थाहर दस्से गे ओ सब राजसी वैभव ते राजें-बादशांहें दे इतिहासै कन्नै जुड़े दे हे। 27 मई दा दिन गै इक अपवाद हा- आक्सफोर्ड ते शेक्सपियर आला दिन! 28 मई गी रातीं मेहमानें गी फही लन्दन दे वेस्ट एंड च इक फ्रेंच होटल (La Dolce Notre Restaurant) च कॉकटेल, डिनर डांस ते शो दी दावत ही। अंग्रेजी होटलें कोला निश्चत रूप कन्नै होर चाल्ली दा वातावरण हा इस फ्रैंच होटलै च। कोमल वातावरण, कोमल रोशनियां, कोमल संगीत।
ते दुए दिन 29 मई गी इक भारती वोईंग (737) विमान च बेहियै अस भारत गी चली पे, जनेवा, पैरिस ते ईरान दे रस्तै। 30 मई गी सवेरे अट्ठ नौ बजे अस फही दिल्ली दे पालम पर हे।