ऐतवारा दी गल्ल ऐ। धौंथली दी ढक्की दे, शैहरा आले सिरे पर खड़ेयै अ'ऊं सोचन लगा जे ए 'नां' कंदूं रखिआ होग, कुन्ने रखिआ होग? घरा ए सोचियै निकलिआ हा जे चलो अज्ज थोड़ी दूर दी सैर करी औन्ने आं। शैहरें दा तंग जीन, फही माश्टरी? बैठक गै बैठक? गांडे बी जुड़ी जन्दे न।
जगतें गी अस मास्टर लोक पढ़ाने-लिखानें घट ते सिक्ख-मत मती दिन्ने आं। "इदं कर्तव्यम् इदम कर्तव्यम्" - (ए करना ते ए नेईं करना)। इस्सै चाल्ली म्हाड़े बी किज हित-चिन्तक साथी-मित्तर न, जि'न्हें म्हाड़ी सेहत दी म्हाड़े कोला बी मती चिन्ता फिकर ऐ। जेल्लै मिलङन तां अपनी उ'थै परानी तशखीस। पैंचुई-पैंचुई सुनाडन - 'ए इन्नी बैठक गै आदमी गी मारी दै। तां गै ए हाल ऐ। सवेरे-संजा कदैं मील दो मील फिरी आवा करों तां दिक्खो हां लगदी ऐ नीं भुक्ख, जंदी ऐ नीं ए लतें दी अच्चम्मी? होंदी ऐ नीं खलासी इस रोजै-रोजै दी सिरपीड़ा कोला।' पर जिस चाल्ली जागत म्हाड़ियां गल्लां इस कन्ना सुन्नियै उस कन्ना कट्टी उड़दे न, उसै चाल्ली अस बी अपने हित-चिन्तकों दे इ'नें 'रामबाण' नुसखें गी कदैं हस्सियै ते कदैं बड़ी गम्भीरता कन्ने ओडे उप्पर अमल करने दी मुद्रा बनाइयै, टालदे रहे आं! पर ऐतवारें पता निं के उद्धम आया जे असें सच्चें गै सारा दिन फिरने-दुरने च गै बिताने दा निश्चा करी लेआ। पिट्ठी पर ब'न्ने आले झोले (लैदरसैक) च असें इक-दो पोथी, कागद-पिंसल, खाने आस्तै किज बिस्कुट, डबल रोट्टी, बैं दी अपनी बंसी ते होर जरूरी निक्कड़-छुक्कड़ पाया ते सवेरे चाह पीयै नगरोटे आली बक्खी जाने दा निश्चा करियै टुरी पे। छत्तड़ी हत्थै च लेई। स्यानें दी गल्ला चेतै आई जे, 'सफर करदे टका, टोकनी, रस्सी, सोटी, काच्चू ते इक डंगे दा खाने-पीने दा सरिस्ता करियै चलो। पर असें ना ते सफर गै कोई लम्मा हा ते ना कुत्तै जाड़े-जुआड़ी च होयै जाना हा। इसकरी, रस्सी ते टोकनी (गड़बी) कन्ने रक्खनी असें जरूरी नेईं समझी। फही तबिया दै कंडे-कंडे जाना हा छत्तरी सोटी दे थाहर बी ऐ ही ते ओदा अपना टकोदा लाह बी ऐ हा।
शुकर ए जे रस्ते च असें उ'नें 'हितचिन्तकें' चा कोई नेईं मिलेआ। नेईं तां उ'नें पिट्ठी पर बज्झा दा ओ स्कौटें आला थैला ते पैरें सूतरी जुराबें पर मुट्टे, रबड़ै दे तले आला नीला फ्लीट दिखियै जरूर धैथियां घेड़नियां हियां। 'ए एडी म्हीम के पेई गेई ऐ? सैर करन चले ओ जां कुत्ते ज्यालोजिकल सर्वे करन? वापसी कंदूं तगरा दी ऐ? परतोने दा ख्याल बी ऐ जां निहंगें सांईं "गांह दे गांह गै" टुरी जाना जे?
खैर, उ'नें कोला ते बचियै निकली आया, पर ढक्की दे सिरे पर पुजदे गै जि'यां उस ढक्की ने रोकी लेआ। मनै च खतोला होआ जे-'धौंथली' ए नां इस ढक्की दा कंदूं पेआ होग? की पेआ
होग ? कुन्ने रक्खेआ हा एदा ए नां ?'' अ'ऊं रुकियै सोचन लगा तां मिगी महाभारतै च वनवासी पांडवें दा ओ किस्सा चेतै आई गेआ जेदे च इक जंगलै च त्रेह कन्नै घाबरे दे पंजे पांडवें चा लौहके चार भाऽ बारी-बारी पानी पीन गे ते परतियै नेईं आए। जित्थै ओ जन्दे हे उत्थै इक बड़ा सुन्दर 'सर' हा पर ओदे कोल गै इक घने रुक्खै पर रौहने आला, इक 'जक्ख' उ'नें आखदा 'इस सरै दा पानी तां पीन देंग जै पैहले मेरे सवालें दा जबाब देइ लैंगे ओ।' ओ त्रेहू कन्नै आतर होए दे ओदी गल्ल अनसुनी करियै पानी पीन लगदे तां उंजली च लेदा पानी ओठें तगर पुज्जने कोला पैहलें गै ओ बचारे बठोई-मरड़ोई जंदे। खीर बडुडे पांडव युधिष्ठर आपूं उत्थै आए तां उं'नें बी जख्वै उ'थै गल्ल आखी। ओ धीरजै आले माह्न्नू हे। रुकियै बोले : 'पुच्छो जे पुच्छदेओ।' जक्खै उ'नेईं कई सवाल पुच्छै। उ'नें, स'बनें सवालें दा मनासब जबाब दित्ता। जक्ख प्रसन्न होई गेआ। मूर्च्छत होए दे चारै पांडव बी हौशै च आई गे ते फही स'बनें शैल तृप्त होइयै 'सरै' दा ठंडा निर्मल पानी पीता।
अ'ऊं इस्सै बारै सोचदा-सोचदा बिंद रुकियै ते पिच्छें मुड़ियै दिक्खै करदा हा तां जे खाकी पैंट-कमीच, सैलै साफे करी टकोदा पनखौने आला जंगलत दा इक जुआंटड़ा 'गार्ड' मेरे कोल आई खड़ोता ते हस्सियै बोल्लेआ :
गार्ड : 'ए कोई सुदैन ऐ बाऊ जी! बस इत्थै गै मंदेरै ही ड्योढ़ी च पेदी रोंह्दी ऐ। कुसै कोला किश मंगदी नेईं। ते नां गै इत्थों कुतै होर जंदी ऐ। मंदर औंदे-जन्दे मरें गी दिक्खियै गड़ाके मारदी ऐ। जनानियें गी घट गै कुआलदी ऐ। कदै मौजा च आई जा तां आखदी ऐ 'चनेमत मिगी दी देई जाओ हां!' इन्ना आखियै इ'न्ने पैर छुन्न लगदी ऐ तां ओ डुआकियां मारदियां, ते इसी बुरा-भला आखदियां निकलैं जंदियां न ते ए गड़ाके मारदी ऐ। अज्ज सैर करन निकले ल'बदे ओ ? कोई चीज बिस्सरी ते नेईं आए ? रुकी की गे ओ ?''
में : नेईं, बिस्सरैआ ते किज नेईं ते नां गै अ'ऊं इस मंगती बचारी गी आं दिक्खै दा। अ'ऊं ए सोचदा-सोचदा रुकी गेआं जे इस ढक्की च ते कन्ने इस बजारा गी धौंथली, ए नां कुन्ने दित्ता हा ? कदू दित्ता हा ? की दित्ता ?
गार्ड : 'धौंथली ! उ'आं इस नां दा किज मतलब बी ऐ बाऊ जी धौंथली !'' [बिंद मुंडी गी झुनक देइयै पुच्छदे उस भलोके ग'बरू दे ओठें पर हासे दियां रेखां खिल्लरी गेइयां।]
में : नां दे मतलबै करी गै अ'ऊं ए सोचै करनां गार्ड राजा। धौंथली दरअसल 'धर्म स्थली' हा- धर्मै पुन्नै दा थाहर। उ'यै नां असें-तुसें 'धौंथली' करी लेआ। इ'थै जनहे नाएं पिच्छे कोई ना कोई कथ-कहानी जरूर होंदी ऐ। धौंथली दी ओ कत्थ के ऐ ? इ'थै सोच आई गेई तां रुकी गेआं। [गार्ड मेरे मुहां पासै दिक्खै करदा हा। उसी मेरी गल्ल सुनियै जि'यां थोड़ा चबात लग्गा हा।]
गार्ड : 'गल्ल तुं 'दी ठीक सेही होदी ऐ। धर्म-स्थली ते धौंथली ! वाह! बाबू जी, तुम कम्म के करदे ओ ? इ'थै जनेही खोज-पड़ताल मास्टर लोक गै करदे न, तुस बी कुतै ?''
में : [में मुस्करायै आखेआ-] ''मिम्मी माश्टर आं राजा! नेईं तां अज्जै दी इस दुनिया च इ'नें नकामियें गल्लें पर सोच-बचार करने दी बेहूल बी होर कुस गी ऐ ?''
गार्ड : अज्ज तुम्हां गै तुम्हां ऐ मास्टर जी। तानी गै पलची जा तां जुलाहे बैचारे दी बी के पेश जंदी ऐ ? परमेसर बचारा बी कुतै नुक्कडा खड़ोईयै अपनी तानी दा ए गुंजल दिक़्खै करदा होना ऐ। आं, ते के सोचेआ तुसें धौंथली दी कत्थै बारै ? मिमी अट्ठ नौ जमातां पढ़ी दियां न, बाबू जी। इकि किताबै च कुतै पढ़ेआ हा जे 'जम्मू-लोचनै' शकार खेडदे कुते शेर-बक्करी गी इक्कै थाहर किट्ठे पानी पींदे दिक्यियै सोचेआ हा जे ए कोई बड़ा धार्मिक थाहर ऐ। तां उसने इत्थै अपने नां पर ए जम्मू नगर बसाया हा ? उसै करी लिखेदा हा जे जम्मू गी अज्जै तगर पुराने बुजुर्ग लोक धर्म-नगरी आखदे न। तुस की मुस्करा करदे ओ मास्टर जी ? ए गल्ल सच नेईं ?''
[ में चलदे-चलदे रुकी गेआ ते घने जाड़ा आली बक्खी दिक्यियै में उसी पुच्छेआ- ]
मास्टर : ''गार्ड जी। ए जाड़ तुं'दी गै तबहीला च होना ऐ ? तुस लोक ते रोज गै एह्दे च औन्दे-जन्दे ओ ? इत्थें शेर ते नेईं पर चित्तरे ते हैन गै, पिज्जड़-पाहड़ें बी हैन। तुसें बी कदें किट्ठे पानी पींदे दिक़्खेआ ?''
गार्ड : ''नेईं मास्टर जी! में ते कदें नेईं दिक़्खेआ।''
मास्टर : ''गल्ल ए ऐ चौधरी, जे ए इक बड़ा कपटपूर्ण झूठ हा जिसी कुसै चलाक खुदगर्ज माह्नू ने जानी-बुज्झियै प्रचारेआ हा ते भोले लोकें अपने भलोकेपुने च उसी सच्च मन्नी लैत्ता। जे ए उ'थै धर्मी थाहर ऐ तां फही इ'नें जाड़ें-जंगलें च गोके माला दा इन्ना नुकसान कीं होंदा ऐ ? पिज्जड़-पाहड़ें गी इस जाड़ै दे चित्तरे कीं खंदे न ? गार्ड राजा सर्कस ते तुसें दिक्खे दा होना ऐ ? सर्कसै दे उस लोहे दे पिंजरे च असें शेर ते बकरी गी किट्ठे दिक़्खेआ हा। बकरी शेरै दी पिट्ठी पर खुर रक्खियै खड़ोती ते सेही ही बचारी, पर उसदे कालजै दी ध्रक-ध्रक पिंजरे दे बाहरा बी सेही होई जंदी ही। अजें ओ सारी करामत उस रिंग मास्टरै दे इक हत्थै च लत्तै दे चाबुकै दी ते दूए हत्थै च पगड़े दे पस्तौलै दी होंदी ऐ। शेर ते बकरी इक थाहर ? आं कोई शेर बरागी सन्यासी होई जा तां गल्ल दूई ऐ। तुसें उस शेरै दी कहानी ते पढ़ी-सुनी दी होनी ए जेह्ड़ा बुड्ढा होई जाने पर कुतों थ्होए दा इक सुन्ने दा कंगना हत्था च लैयै उस जंगलै दा औन्दे-जन्दे मशाफरें गी अपने 'बरागी' होई जाने दा यकीन दुआइयै, ओ कंगन देने दा लालच दिंदा हा। कोई ना कोई लोभी माह्नू ओदे इस धोखे च आई गै फसदा हा। ते उस दूए शेरै दी कत्थ बी तुसें सुनी दी होनी इक पिंजरे च कुत्तै कैद हा ते औन्दे-जन्दे मशाफरें गी बैन-बास्तै पाइयै ते सौ-सौ संगधा खाइयै, आखदा हा जे मिगी इत्थों बाहर कढ्डो, ओ सारी उमर तु'दे गुण गांग। ते बाहर निकलने पर जिस चाल्ली उस भलोके मशाफरै गी खाने आस्तै ओ अपने पिछले पंजें पर खड़ोई गेआ हा। आं, इ'नें कहानियें च गै इक भलेमानस (दर-असल मूर्ख) शेरै दी कत्थ बी औन्दी ऐ। उ'थै जिसने जंगलै दे पशुयें दी रूह-फरयाद सुणियै ए मन्नी लैता हा जे ओ पशु आपूं बारी-बारी अपने-अपने घरा इक जीव ओदे खाने आस्तै भेजी देआ करडन। मूर्ख ते उसी इसकरी आखेआ की जे इक निक्के जनेह सेह (खरगोशें) ने उसी खुह्रै च सुट्टिआ हा। की गार्ड राजा, ए कहानियां सच न जां ओ जम्मू-लोचनै आली ? इक गल्ल होर बी सोचने जोग ऐ मित्तरा ओ जे इना पवित्र-धार्मक थाहर दिक्यियै जम्मू-लोचनै गी ए ख्याल की नेईं आया जे इस थाहरै पर कोई आश्रम बनाइयै जोग-तप करना चाहीदा। इस आवागमन दा
चक्कर मकायै परलोक सुधारना चाहिदा। उस थाहर नगर बसाइयै राज करने दी गल्ल ओदे मनै च की आई? राज के ते धर्म के? इक-दूरे दे जमांदरू बैरी।''
''गल्ल तुं'दी ठीक ऐ, बाबू जी। भला इक ओपरे नमें आदमी ने नमें सिरेआ कुतै जुआड़ी च कोई नमां नगर बसाना बी कि'या हा? बस्ती उत्थें पैहलें बी जरूरा होनी ऐ। नगर-नगरोटा नेईं होग तां कोई माड़ा-मुट्टा ग्रां-पद्दर गै होग। तदूं बी जोरें आलें दी गै चलती होनी ऐ मास्टर जी। अस लोक अज्ज बी बड़े भोले-भलोके आं, तदूं दा ते आखना गै के? कैसा चालाक माहनू हा ओ जम्मू-लोचना बी मास्टर जी! कैसी झूठी गल्ल नशर कीती जे अज्जै तगर अस मूढ़ लोक उसी उस्सै चाल्ली सच मन्ने आवै करने आं। में केई बारी मनै च सोचेआ जे ओ थाहर, होई सकै तां तृष्ना चाहिदा जित्थें जम्मू-लोचनै ओ दि'ब्ब तमासा दिक्खेआ हा। ए गल्ल उसने लोकें च प्रचारी बी कि'या होग मास्टर जी?''
''गार्ड राजा! तुस लोक बी ते शिकारी ओ। तुसें बी शकार खेलने दे सौ भेद औंदे न पर मुट्टा असूल ते इक्के ना भाई। ओ ए जे शकारी अपने शकारै गी धोखा दिन्दा ऐ। शकार ओदे धोखे च आई गेआ तां समझो होआ पुट्ठा। जम्मू-लोचनै बी शकार करना हा उ'नें भलोके लोकें गी अपनी हाकमी च आनियै उ'न्दे उप्पर राज करना हा। इस नमें रिशते बारै एदे कोला बड्ढू सुन्दर कपटपूर्ण प्रचार के होई सकदा हा जे उसने इस थाहरै पर शेर ते बकरी गी इक्कै थाहर पानी पीन्दे दिक्खेआ ऐ। ए थाहर बड़ा गै पवित्र ऐ। मतलब ओदा उ'नें भलोके लोकेंई ए यकीन दुआना हा जे राजा ते परजा इ'नें दौंनें दा नाता सरबन्ध उ'आं भाइए शेर ते बकरियें आला सरबन्ध गै होंदा ऐ पर मेरा थोड़ा ए सरबन्ध उस्सै शेर-बकरी आला लेखा होग जि'नें असें इस जाड़ा च कोल-कोल खड़ोइयै पानी पीन्दे दिक्खेआ ऐ। लोकें बी सोचेआ होना ऐ जे ए कोई 'करणी आला' भगवान मनुक्ख ऐ जैसी ऐसा चबात नजारा दिक्खने दा मौका थ्वोआ ऐ। असें पीढ़ियां होई गेयां न इत्थें रौंहदे, असेंईं कदें नेईं दिक्खेआ ओ नजारा। अस मल डांगर जंगल नेईं तां जाड़ लान्ने आं तां डर बनेआ रौंहदा ऐ जे कुतै मिरग नुकसान नेईं करी जा। उ'आं करदा नेईं गे ? कोई गै हफ्ता खाली जन्दा ऐ। अज्ज एदी गौ ऐ नेईं ते कल ओहदी बच्छी। ते ए कोई ऐसा प्रतापी भागें आला आदमी हा जिसने इस चित्तरें कन्ने भरोचे दे जाड़ा च इक ते देवी भगवती दा बाहन शेर दिक्खेआ, ते ओ बी बकरी कोल खड़ोइयै पानी पींदा! धरती दा असर हा? जां शेर गै कोई दुर्गा दी सवारी आला हा? जां जम्मू-लोचनै दे गै भागें दी करामात ही?''
''जम्मू-लोचनै बी सोचेआ होना ऐ जे बिदमाता ने असली शकार ते उसी अज्ज दित्ता ऐ। हून शेर बनियै सिंहे-आसनै (शेरै दे आसनै) पर बिराजो ते कलगियां झुलायियै बकरियें पर राज करो। बकरियां बचारियां ते मता चिर सोची गै नेईं सकियां होंगन जे ए गल्ल चंगी होई ऐ जां माड़ी? ते इस झूठी बिसली गल्ला दा प्रचार बी बकरियें आगूं भलोकें उ'नें लोकें आपूं गै कीता। जम्मू लोचनै राज सिंहासने पर नचिन्त होइयै बौने आस्तै उ'नें लोकें चा उ'नेंई चुन्नी लेआ जि'नें उसने समझेआ जे ए चतर-चलाक बी हैन ते कन्ने लालची-लोभी बी। उं'दी पिट्ठी पर उसने थापी दित्ती, किज नाम-कराम दित्ता ते फही कुसै खतरनाक रोगें दे किरमें आंगर, उ'नेंई लोकें च छोड़ी दित्ता। ओ बिके दे प्रचारक जित्थें चार माहनू किट्ठे दिखदे, उत्थें गै जाइयै नमें
मास्टर : राजा दा स्तुति गान करदे। ओदे बारे नित नमियां कथा-कहानियां फलांदे, जि’न्नें थमां राजा दे चमत्कारी प्रभावै दा प्रचार होए। उ’नें कथैं दा गै असर ऐ जे सदिएं पैंरत बी, अपने आस्तै गुलामी दे बंधन आनने आली उस झूठी फरेब-कथा गी सच्च मन्नियै, अस भलोके महानू इ’नें जड़ें च उस ‘ख्याली’ तलाई गी तुप्पी कढ्ढने आस्तै आतुर होई होनें आं जित्थै बकरियें दी कुल-दादी दी मान-मरजादा रखने आस्तै शेरें दे उस कुल दादे ने, उसी दिखियै टौर बी नेईं हा हलाया, सगुआं अदबै कन्नै नजरां नीमियां करियै उन्ने चिर चुप-चाप खड़ाैता रेहा हा जिन्ने चिर ओ कुल दादी पानी पीऐ उत्थों चली नेईं गेई। वाह! वाह!
मास्टर : ‘‘पैसे बिके दे लोक इस्तै चाल्ली अपनी खुदगरजी आस्तै अपनी जात-बरादरी, अपना दीन-धर्म, सब किज कुर्बान करी दिन्दे न। राजनीति दी भाशा च जम्मू-लोचन नीतिवान हा, उसदी नजऱी ए ओ भंड-मरासी, तुप्पी-ताली ले हे। उसने ओ इतिहासकार बी मुल्लें खरीदी ले जड़े इब्जाना लेखयै इतिहासै च झूठी गौ सच्ची गे झूठ बनाइयै पत्थर लीकर करी सकदे न। इ’नें जर-खरीद इतिहासकारें गै हर जमाने च, रावणें ते कैंसें जां जरासंधें ते दुरजोधनें-गी दानी, मानी ते ज्ञानी बनाइयै दस्सने दा जत्तन करियै लोकें दिएं अक्खीं च लेत्तर पाया ऐ ते हून बी पान्दे जा करदे न।’’
गार्ड : ‘‘हून के पाना ऐ लेत्तर इ’नें बचरें! लोक हून दिन-ब दिन सोहग्रे-स्याने होंदे जा करदे न।’’
मास्टर : ‘‘नेईं गार्ड राजा! अजें बी लोकें दिए अक्खिएं च लेत्तर पाने आले बी मते न ते पाने जोगा लेत्तर बी मता ऐ? जि’यां लोक सयाने होआ करदे न उ’आं-उ’आं गै, जम्मू-लोचन बी अपने डाऽ पैंतरे बदलदे जा करद न। में दिख्ये दा ऐ जे निर्मल मुनि दा भाशन सुनने आस्तै ओने आला ओ बदनाम बड्ढीखोर हाकम, बड़ी लहीमी कन्नै आइयै मैली, फुट्टी दी दरी पर गै लोकें च बेही जंदा हा। लोक बचारे समझदे हे-हाकम होऐ तां इ’यै जनेहा, जिसी ना पैसे दा घमंड ऐ ना हाकमी दा। अजें गार्ड जी, लोकें ई इ’नें लेत्तर पाने आले चतर-कपटें कन्नै मते चिर लड़ना-घुलना ऐ।’’
गार्ड : ‘‘ओ जम्मू-लोचन ऐ कुत्थों दा हा मास्टर जी?’’
मास्टर : ‘‘इतिहासै ते भई, इस बारै कोई भेत्-सुराग दस्सेआ नेईं। लोकें दियां अटकलां न। कोई आखदा ‘भेरे’ दा हा, कोई आखदा नेईं ‘ऐमनाबादी’ हा। केई आखदे न गुजरांआले दा हा, केई आखदे न गुजरात दा हा। ए स’ब्बै थाहर सन 47 दे बा’द पाक्स्तानै च आई गे न। भलोके लोक आखदे न जम्मू-लोचन इस्तै लाकै दा हा। उं’दा बच़ार ऐ जे ओ भद्रवाह दिएं बरफानी पहाड़ियें चा निकलियै आया हा, केई अनुमान लान्दे न जे सरहूँ सरै दा कोई इच्छाधारी मगरमच्छ हा जढ़ा माहनू-रूप धारियै ऐथमां रस्तै ताहीं आई निकळेआ हा। कइयें गी यकीन ऐ जे जम्मू-लोचन त्रिकुटा दिएं पहाड़ियें दा गै कोई तलिसमी जड़-जीव हा जड़ा गु’नी-गाहरा चा ढलियै इत्थें आई पुज्जा हा। कोई आखदा ऐ जे ए कोई गुल-गुलाब गढ़ै पासे दा मलंग जिमींदार हा, जड़ा चनांहूं च तरदा अखनूर जिया-पोते दे पत्तनें पर ते उत्थों शकारै दे पिच्छे-पिच्छे उस छपड़ी पर आई निकळेआ। सच्ची गल्ल ए ऐ गार्ड जी! जे जिन्ने मुंह उन्नियां गल्लां आखदे न सत्तें अ’न्नें इक हाथी दिख्येआ दा जिस-जिस अंगे पर उ’न्दा हत्थ लग्गा उससे मूजब ओदी उपमा ओ देन लगे। ओ हाल इ’नें बेशुमार अटकलें दा ऐ। जि’यां इक्कै सूरज शीशे दे तोटे च सौ-सैकड़े होईये
ल'बदा ऐ उ'आं गै इक्क जम्मू-लोचन गै हाकमी दे शीशें च सौ-सैकड़े रूप लेईयै चमकदा सेही होआ होग ।''
[साथी] : 'त्रेह ते नेईं लग्गी मास्टर जी ? दो-ढाई मील पैंडा लांगी आए आं। ओ पिच्छें 'गुल्लु दा बाड़ा' रही गेआ। ए सीतलिएं दा मंदर ऐ। उप्पर आली सिड़कै ए लारियें-ट्रकें दा औन जान-हून दसें-बीहें बर्रें दा शुरु होआ ऐ मास्टर जी, नेईं तां इ'थै रस्ता दिन-रात चलदा हा। कच्चरें-बैंतरें दे गल पेदियां घंगरेलां रात-दिन छन-छन करदियां रौंहदियां हियां। सारे रस्तै भाखें आले गीतें दी गुंजार मची रौंहदी ही। तदू ए जंगल-झाड़ बी बड़े घने हे ।'
[मास्टर जी] : में आखेआ "ए जाड़ छड़े घने गै नेईं हे । सुतंतरता दे पुजारियें दे कोट-किले बी इ'थै हे।"
[साथी] : "सुतंतरता दे पुजारी कु'न मास्टर जी ? ए मिरग चिनरे ?"
[मास्टर जी] : "नेईं ए मिरग-चित्तरे नेईं साथिया। अ'ऊँ उ'नें सूरमें दी गल्ल करै करनां जि'नें जगती दे डीडो गी अपना आगू मन्नियै, इस धरती दी सुतंतरता दी राखी गित्तै प्राण तलियें पर लेई करी, जाबर धाड़ियें दे जोर-जुल्में दे काले दाग मसाने आस्तै, इ'नें झाड़ें गी गै अपनी किलेबंदी बनाई लैता हा।"
[साथी] : "कैसी गल्ल ए मास्टर जी, स्हाड़े जागतें दियें पढ़ने आलियें पोथियें च जम्मू-लोचनै दियां फरजी झुठियां किस्से-कहानियां लिखोई दिया न ते 'डीडो' जनेह् बांके सूरमे दा कुत्तै नां बी नेईं आया ।"
[मास्टर जी] : "डीडो सच्चा सूरमा जे ऐ हा। नीति कोला बद्धु उसी सचाई प्यारी ही, अपने आस्तै राजसिंहासन प्राप्त करने दी मैली लालसा ओदे निर्मल कालजे च जे नेईं ही। उस कालजे च बस दो चीजां हियां इक इस धरती दा सुच्चा प्यार ते दुआ इ'दे मान-गौरवै आस्तै अपना सर्वस्स लाई देने दा फुलादी प्रण ।"
[साथी] : "आखदे ने मास्टर जी, बैरी ओदा नां सुनियै बी थर-थर कंबदे हे ।"
[मास्टर जी] : "उ'नें बैरियें गी इक बाहरली बादशाही दी पिट्टू ही। ओ मतें सारे धाड़ू जाबरु उस्सै दे भेजे दे आए दे हे । थाहरें-थाहरें उ'नें थाहने कायम करियै इस लाके दे लोकें दा जीन औखा करी दित्ता हा। ओ जालम धाड़ अपने-आप्पै गी इस लाके दा मानक समझदे हे ते मनमाने अत्याचार करदे हे । रोज इस लाके दी ईन, गैरत, किंद जख्मी होंदी हा, रोज कुत्तै ना कुत्तै अग्ग लगदी ही, रोज कोई सुहाग लटोंदा, कोई कुआरा हिरख पैरें हेठ मलोई जंदा। रोज कोई ममता दा आहल्ड़ा तीला-तीला होई जंदा। इ'यां सेही होंदा हा जि'यां झाड़ें च मिरगें दी आपापजी मची दी ऐ ते ओ मासूम जीवें दी रत्तू कन्ने होलियां खैढ्दे न।"
[साथी] : मास्टर जी में जगती मते बारी गेदां। उत्थें जाओ तां मियां डीडो दा चेत्ता आए बगैर नेईं रौंहदा। पर ए दिकियै मिगी चबात लग्गा जे उत्थें बी, उस धरती दे सुच्चे पुत्तरै, दे नां दा कुत्तै कोई 'मोहरा' नेईं, कोई जन्न-पत्थर नेईं, कोई समाध-संध नेईं। चार पीढ़ियां डोगरें दा राज रहा ते उस सच्चे-सुच्चे डोगरे दा चेत्ता बी कुसैगी नेईं आया ? भला अपना राज हा ए ?
[मास्टर जी] : "इतिहासै दा कबतपुणा ए ग'बरुआ! डोगरा धरती दी लचारी ऐ। खरीदे दे, बिके दे इतिहासकारें"
मास्टर : उस बलिदानी बहादरै गी डाकू ते धाड़ आखियै बदनाम करने दी नीचता कीती। उसने उस जाबर बादशाहतै कन्ने सुलह जे नेईं ही कीती। ओ उ'नें ई इक्कै गल्ल आखदा हा -
‘‘अपना मांझे-मालवे दा मुलक सम्भालो,
मेरा ए भलोका देस खाल्ली करो।’’
ए जाड़, ए किक्कर-फलाहियें दे झुंड, त'वी दे पानी दा ए सुन्दर परवाह, ओ त्रिकुटा दे त्रै किंगरे, ए सब गवाही ने जे डीडो इस धरती दा सच्चा सूरमा हा, इस देसै दा मान-टिक्का हा। डोगरें दा सच्चा इतिहास जदुं कदें बी लखोग तदुं दुधै दा दुद्ध ते पानी दा पानी नित्थरी औना ऐ। तदुं जम्मू-लोचनें, ते उ'न्दे बारसें नंगे होइयै, अपना न्यांऽ लैने आस्तै जनता-जनार्द्दनै दे दरबारै च आइयै खड़ाने पौना ऐ।
गार्ड : ओ दिन कदें औग मास्टर जी ?
मास्टर : औग की नेईं ? जे गार्ड राजा ! तूं चाहैं, अ'ऊं चाहूं, सारे जने चाहन तां उस दिनै गी औने कोला कु 'न रोकी सकदा ऐ ? सौ-सवा सौ ब'रा इक सचाई, झूठै दबाई रक्खी दी ही-ओ हुन झूठै गी परें सुट्टियै उठने दा जतन करै करदी ऐ। उस सचाई दी रू-फरियाद अज्ज जमाने गी सुनने गै पौनी ऐ। किज तूं सुनानी ऐ, किज मैं सुनानी ऐ।
गार्ड : मास्टर जी, ए गल्ल अज्ज पता लग्गी ऐ जे केईं कताबों बी 'झूठै' कन्ने भरोची दियों होई सकदियां न! ए इतिहास असलियता दी छात्ती पर झूठै दे महल खडेरी सकदा ऐ। अ'ऊं पुच्छुंग ना जकटी जाइयै, जे डीडो दे बारसें अपने उस बडके दी कुतै यादगार की नेईं बनाई ? डीडो दे बारसें गी डर कैहदा हा ? कोकड़ियाँ जगोरां खसोई जानियां हियां। उ'न्दियां कोकियां पिन्सनां बंद होई जानियां हियां ?
मास्टर : ए सवाल उस ग्रां जाइयै पुच्छने जोग नेईं ऐ, राजा! ए सवाल ते चौकें-चौकें च खड़ोइयै पुच्छने जोग ऐ। उस सवालै अग्गें तुम्मी देनदार ऐं, आमीं देनदार आं। ओदे उस कतलै दा जिम्मा उस्सै इक आदमी पर नेईं जिसने सांझी छाता पर ओदी चौड़ी छात्ती च बंदूका दी गोली मारी ही - ओदे उस कतला दी जिम्मेदारी उस सारी कौमै पर ऐ जिसने चुप रहियै उस जुल्मै खिलाफ ओठ नेईं खोले। खैर, दिक्खो के बनदा ऐ।
गार्ड : मास्टर जी, मैं हुन त'वी दा बाहेआ टप्पियै बिंद पार जाना ऐ। मन ते करै करदा जे तु'न्दे कन्ने होर अग्गें तगर चलां पर उस ग्रां औना ऐ रेंजर साहब ने। इक तफ्तीश करनी ऐ उ'नें। अज्जै दा दिन मिगी म्हेशां चेतै रौहग। जम्मू-लोचनै बारे ते डीडो बारै-समें दा न्यांऽ दिक्खो! कपटियें गी राजसिंहासने ते नामवरी जुड़ी गेई ते सच्चे बलिदानी गी जाड़ें-जंगलें दा औखा जीन ते कन्ने डाकू होने दा बदनामी। अग्ग लग्गो इस झूठै इतिहासै गी! तुसें कुत्थें तगर जाना मिथे दा ऐ मास्टर जी ? दूर नहीं जाएओ। ओ आक्वै करदे न शहरें दो जने। कन्ने खच्चर ऐ। नगरोटे तगर इ'न्दे कन्ने तुसें साथ होई जाना ऐ। उत्थें ठंडे पानी दा खूह ऐ। बेहियै किज खाई-पीऐ बिंद बसां करेओ ते परती आवेओ। टांगा बी थ्वोई जंदा ऐ ते 'बस' बी औन्दी-जंदी रौहन्दी ऐ। ते मिगी देओ आज्ञा। अच्छा, नमस्ते मास्टर जी।
माश्टर : 'नमस्ते' गाडं राजा।' खच्चरै आले दमें जने मेरे कोल आई पुज्जे तां में पुच्छेआ : 'सुनाओ शाह जी, तुसें कुत्थें जाना ऐ?'
शाह जी : 'असें जी नगरोटे कोला बिंद पिच्छों गै, उप्परै ई होई जाना ऐ।' नानकी दी बांऽ- 'तुसें नां सुणेदा होना ऐ? बस ओदे कोल गै समझो। ते तुसें?'
माश्टर : 'अ 'ऊं बस इ 'यां गै निकली पेआ।' 'चल मनै देआ मौजिया'' आली गल्ल ऐ। छुट्टी ही। सोचेआ चलो थोड़ी दूरें तगर फिरी-टुरी औन्ने आं।'
शाह जी : 'उ'आं कम्म के करदे ओ साहब ? कोई नौकरी ऐ जां अपना कम्म-काज ऐ ?'
माश्टर : 'कम्म ऐ माश्टरी। शाह जी, जगत पढ़ान्नां।'
शाह जी : 'माश्टर ओ ? धन भाग ! असली कम्म, कोई पुच्छै तां मस्टरें दा गै! उ'आं जमाना कैरू बदली गेआ ऐ ? ए शहर हून पच्छोन्दा गै नेई। कदें राजे-महाराजें दे चर्चै चलदे हे। सन्ताली (47) के आया जे उ'नें बचारे आस्तै साढ़-सत्ती गै आई गई। माश्टर जी, बूटे दी टीहसी जिन्नी उच्ची होग उत्थों ख 'ल्ल पौने करी उनी गै मती लग्गग बी। लोक आखदे हे जे पिछले जन्मे च जि 'नें मोती दान कीते होन उ'नेंई गै राजसिंहासन थ्वोदे न पर जि 'नें बचारे गौ सिंहासन छोड़ने पे न उ'न्दे मोतियें च के खोट हा भाई ? की माश्टर जी ?'
माश्टर : 'दरया दा हाड़ ऐ, शाह जी ! हरे-भरे बाग-खेतर बी केईं बारी रढ़ई लेई जंदा ऐ। समें दा परवाह ते इ'नें हाड़ें कोला बी बिकराल ते जोरें आला होंदा ऐ। रढ़ई लेई गेआ सारें गी। इन्नी गै लिखी दी होनी ऐ बचारे दे भागें। कीता बी के जा, शाह जी ?'
शाह जी : 'ए ते मेले आले हंडोले आला गै सहाब ऐ, माश्टर जी। ख'लका हिस्सा उप्पर ते उप्परला ख'ल्ल।'
माश्टर : 'नेईं, शाह जी ! हून राजें-महाराजें दे सिंहासनें दा जमाना परत्यै नेईं औना। एकड़ा हिस्सा हून उस समें दे डाले चा निकली गै गेआ समझो।'
शाह जी : 'नां उ'आं सच आखेआ तुसें माश्टर जी ! जिस खेत्तरै च मसातर-मसातर रेत फिरी जा उत्थें भला बरेआल कि'यां बुढ़े ? स्हाड़े ग्रां दा इक जागत फौजा च जमादार ऐ, माश्टर जी। मते थाहरें फिरी आया ऐ। आखन लगा- 'राजें-नवाबें दा बुरा हाल ऐ। उ'दियां कलंगियां ते सिंहासन जाई रखो न जैबघरें च ते ओ बचरे हून इस फिकरा च न जे धंधा के करन ?' आखन लगा - 'केइयें राजाएं परदेसें जाइयै कम्म-काज करना शुरु कीता ऐ ते केइयें इत्थें गै। दौ-त्रै ते अपने महलैं गी गै होटल बनाईित्ता ऐ ते आपूं उ'दे मालक मैनेजर बनी गे न। की माश्टर जी, होई सकदा ऐ इस चाल्ली ? इन्ना बदलोई जाना हा समें ने, कुन्ने सोचेआ हा ? बड़ी समझदारी कन्नै चलना पौंदा ऐ शाह जी। गिल्ली भुंजा, तलैट-पिलछी सब किश दिक्खियै गै देनी पौंदी ऐ। स्हाड़े देसे दे राजे-महाराजें ते ऐ गै बड़े समझदार हे। समें दा स्वातम पछानियै चलना गै समझदारी ऐ। होटलें दा धंधा के माड़ा ऐ ? उ'नें कंदूं अपने हत्थें प्यालियां छल्लनियां न ? उत्थें बी बैठे दे गै कम्म करना ऐ। आं, इन्ना फर्क ज़रूर ऐ जे महलैं च हे तां हुक्म दिन्दे हे, हून होटलें च होडन तां दूए दे हुकमें दी तामील करनी पौग। पर पैसें दी बरखां बी ते होग ना। ते इस दुनिया दी सारी ईन-मरजाद, पैसे कन्ने थ्वोई जंदी ऐ। की झूठ ऐ शाह जी?'
दमं शाह : 'सच्च आखेआ मास्टर जी तुसें । पैसा पैसा गै। ए कलजुग ऐ ना। सेवा दा गै मेवा ऐ।'
मास्टर : 'दूए, शाह जी! ओ कलगी ते मुकट दूरा गै शैल ल'बदे हे। उं'दा असली सुख कदें कोई उ'नें राजे-नवाबें गी पुच्छी दिखदा ना। इक ते इ'यां बी खरा-भला माह्नू कलगी लायै किज ओपरा-ओपरा ल'बदा ऐ, दूए सिरपीड़ जाने च गै नेईं औंदी। लोक जि'यां-जि'यां स्याने होए करदे हे, उ'आं-उ'आं गै ए कलगी ते राजमुकट लाने आले सिरें गी, सिर भारा-भारा सेही होंदा हा। हुन होटल खोलो, कारखाने खोलो, मौज गै मौज ऐ।'
[दमं शाह मेरी बक्खी घूरी-घूरियै दिख्खन लगे। बुड्ढे ने पुच्छेआ :-]
दमं शाह : 'इक गल्ल पुच्छं मास्टर जी?'
मास्टर : [मैं मुसकराइयै जवाब दित्ता-] 'खुशी कन्नै पुच्छो।'
दमं शाह : 'मास्टर जी, सुणेआ हा जे इस त'वी पर बी कुतै ब'न्न बन्नने दी स्कीम ही। आखदे हे ओदे करी इक लम्मी सुन्दर झील बनी जानी ही इत्थें। सुन्नै करनें देसै च केईं ब'न्न ब'न्ने गे न, केइयें दरयाएं गी ब'न्नी लैता गेआ ऐ। उस स्कीमै दा के होआ?'
मास्टर : [मैं हंसियै जवाब दित्ता :-] 'केइयें स्कीमें दे भाग उस्सै चाल्ली दे होंदे न शाह जी, जि'यां कोई ज्याणा जरमै गै मोए दा। असें चों म्हीने आस्तै हकूमतै दी कुरसी दिन्दे तां दिखदे स्कीम तोड़ चढ़दी ऐ जां नेईं? पर, अस रेह अपने स्कूलै दी उस पुरानी, डोलके खंडी कुरसी गी, जागतें कोला नुआई-नुआई पेटी दियां फट्टियां लान्दे, झील कि'यां बननी ही?'
[इन्ना आखियै मैं इक जोरें दा गड़ाका लाया ते छत्तरी गी कच्छा हेठ देइयै बाँसरी गी ओठों पर रखियै सुर सिद्धा कीता ते भाख लाई :-]
मास्टर : "चल मनै देआ मौजिया। तुगी पहाड़ें दी सैर करांऽ!!"
[खच्चर त्राह कन्नै रुकी गई। उसने मुंडी गी इक बक्खी मोड़ियै मेरे पासै दिख्खेआ। दमं शाह बी पैहलें मेरे बक्खी दिखदे ते फही इक दूए बक्खी! दोनें मुंडियें गी झुनक दित्ती। इक जना दूए गी बल्लें-बल्लें आखै करदा हा-]
दमं शाह : 'मास्टर ऐ ना, कोई कल-पुरजा ढिल्ला ऐ बिचारे दा। पैहलें कनेहियां शैल गल्लां हा करै दा।'
[ओ दमं पगडंडी छोड़ियै खब्बै हत्थै गी चढ़ी गे ते अ'ऊं इक थाहर खब्बली आला थाहर दिखियै बेही गेआ ते बाँसरी बजाने दा नन्द लैन लगा। ✥]
रसाल सिंह
मैं आं रसाल सिंह 'धारां ते धूड़ां' दा हीरो, जेदे च रामगढ़ी दे जगीरदार राजा शिवदयाल सिंह हुन्दी ढलदी बरेसा दी कहानी ऐ। ढलदी बरेसा दा नां सुनियै तुसेंगी ए तपला नेईं लग्गै जे राजा होर बी, अजोध्या दे राजा दशरथ हुन्दे आंगू, अपनी पुड्डुपुड्डी कोल इक्क बग्गा बांल दिख्वियै बानप्रस्थी होने दी सोच्चै दे हे। नां-नां ओ चिट्टे बांल थमां डरने आले उ'थै नेह कायर राजे नेईं हे। राजा दशरथ गी सलाह देने आले वसिष्ठ, वामदेव, दुनियादारी अग्गें हार खाईं जानें आले, कमजोर बजीर हे- पर राजा शिवदयाल सिंह हुन्दे बजीर हे हिक्का पंडित, जेहड़े आखदे हे- "साढ़े दस्से दे रस्ते पर चलो, बुढ़ापा कोलें नेईं लंघग।" दुए कुसै होर नै उं'दा ए नुसखा बरतेआ जां नेईं, पर राजा शिवदयाल सिंह हुन्दे पर ते ओदा जादूं आला असर बिलकुल परतक्ख हा। पंजाएं-पचुन्जें ब'रें दी उमरी च बी उ'नें, नसतें च कंजकां पूजदे होई विधवा हुकमी दी इक्कै इक कुड़ी कमलो गी नमीं रेशमी पुशाक, रुपे ते फल मतेआई देइयै पुजेआ हा। हिक्का पंडित कोल खुड़ोते दा सब किश समझड़ा जा करदा हा। उस नै मनै च आखेआ हा- "राजा दिख्वने च भाएं, शिवजी दी गै जान्नी चा खिंडे दा सेही हुन्दा ऐ, पर मोतियें दी परख ऐ इसी भली। होए बी की नेईं, टिक्का पंडित जेड़ा बजीर होए....। ते हफ़्ते दै अन्दर-अन्दर कमलो हुकमी दे कच्चे कोठू चा गायब होई गेई ते राजा शिवदयाल सिंह हुन्दे महलै दै अन्दर जाई प्रगट होई। टिक्का पंडित हुन्दे गुप्त सैनकें जाल सुट्टेटआ ते इक रोन्दी-करलान्दी कूंज पगड़ियै अपने अन्नदाता दी सेवा च पेश करी दित्ती।"
मैं उस बेल्लै कोई 18-20 ब'रें दा अनपढ़ ग़्राईं जागत हा। मां-बब्बू मरी गेदे हे ते बिधवा बुआ नै मिगी पालया हा। कमलो, हुकमी दी इक्कै-इक कुड़ी, कमलो ते में बचपने दे साथी हे। किट्टो खेडना, लड़ना, रुसना ते मनना। असें गी खेडदे दिख्वियै मेरी बुआ ते विधवा हुकमी दमें दुए पासे कनखियें कन्नै दिखदियं ते मुस्कराई उठदियां। असें गी दुनिया दा कोई पता नेईं हा। साढ़े उस लौहके नेह कसबे दे आले-दुआले दे ग़्राएं गी छोड़ियै होर बी कोई दुनिया ऐ- असें कदें सोचेआ गै नेईं हा। मेरी दुनिया च कमलो गै कमलो ही। ते कमलो दे मनै च के हा- मेरा मन जानदा ऐ। अस दमें अनजान, अपनी भलोकी प्रीतै च अपनें सुखनें दे शीश-मैहल सोआरदे जा करदे हे जे इक दिन सवेरै विधवा हुकमी दा बरलाप सुनियै मेरी विधवा बुआ नै गिद्धी दे सिरे कन्नै अखियां पुंजदे-पुंजदे जि'यां मिगी आखया- "तूं जम्मेआ गै बदकिस्मत हा। तेरे आस्तै खडाल बन्दी पिच्छों ऐ भज्जी पैहलें जन्दी ऐ। कमलो गी जगीरदारें दे आदमी रातीं चुक्कियै लै गे। जा दिख्व हुकमी नै रोई-रोई के हाल कीता ऐ। इस रासकै कोला खबरें इस लाके दी खलासी कंदू होनी ऐ।''
ओ दिन मेरे जीवनै दा स'ब्बने कोला काला दिन हा। मेरे मनै च अग्गी दे भांबड़ बलै दै हे-
पर बाहरें सारी बस्ती पर बेबसी ते लचारी दी घनी धुड़ आइयै छाई गेदी ही। कोल खड़ोता दा
माह्नु नेईं हा ल'बदा। में बतोई जन गेआ हा। गुस्से कन्नै तड़फेआ हा, करलाया हा, कुढ़ेआ हा,
जलैआ हा, पर चौनै पासें छाई दी नुक्क चुप्पी नै आखो जे, बिन्द बी मेरे पासै अख्ख पुट्टियै
दिक्खेआ। धारां चुप्प, नाले चुप्प, रुक्ख चुप्प, बस्ती चुप्प, मरद चुप्प। मेरा साह रुकन लगा। दम
घुटने लगा। मिगी सेही होआ जे उस घनी धुड़ै चा निकलियै जागीरदारें दे काले बदसूरत हत्थ मेरे
पासै बधै करदे न- ते ओदे पिच्छें सैंकड़े बूटें ते सोटें दी छेड़ सनौचै करदी ऐ।
में माऊ बब्बे दी उस धरती गी छोड़ियै नस्सी गेआ। कुत्तै डडला छाल देइयै मरी जाना मेरे
संस्कारें च नेईं हा। पर कमलो गी जागीरदारै दी बाह्रै च तड़फदे छोड़ियै नस्सना बी सखल्ला नेईं
हा। दरअसल उस बेल्लै में जीवनै दी ए पोथी पढ़ी दी नेईं ही। में समझदा हा जीवन बस कमलो
दियें अखियें दी नीली निर्मल झीलें दे कण्डे बेडियै गीत गाने दा गै नां ऐ। बाँसरी दे सुरें दै फज्जें मनै
दी गल्ल आखीयै लैने गी गै जीवन समझदा हा। ते जिसलै चान-चक्क नां रेहियां ओ झीलॉ ते नां रही
ओ बाँसरी, तां मिगी पता लग्गा जे फुल्लें च कंडे बी हुन्दे न, झीलें दी डबरी च तन्दुए बी रौहन्दे
न। उस हालती च उथै रौहन्दा तां कुरबा जागीरदारै दे गुण्डें दै हत्थें कतल होई जन्दा, जां ओदे
किलेनुमां मैहलें दे कुसै सरदखाने च कुढ़ी-कुढ़ी ते चुड़ी-चुड़ी मरी जन्दा, जां अपने हठी सुभाऽ
कारण ओदे कोर्टे दे कठोर कुपड़ें कन्नै टक्कर मारियै मरी जन्दा। इस करी उथों में नस्सी आया।
कालजे च इक रड़क लैयै बारां बरें पांडु ए आं आला लेखा बनवास-जन कटदा रेहा। फौजां च
भरथी होआ, केइयें नगरें च फिरेआ। भान्त-सभान्ते लोकें कन्नै मिलेआ। दुनिया दी पोथी दे नमें
पत्तरे पढ़ने दा मौका लग्गा। उस नमीं दुनिया दे उ'न्नै रौलें 'च कदे में डुब्बी जन्दा, कदे में पही तरी
पौंदा, पर मनै च कुत्तै कमलो दा चेता धुखदा गै रेहा- धुखदा गै रेहा। जित्थै-जित्थै गेआ, जिन्नें-
जि'न्नें लोकें कन्नै मिलेआ, उथैं गै सैंकड़े नमियाँ गल्लां सुन्ने-समझने दा मौका मिलेआ- पर
हैरानी ए सुनियै होन्दी रही जे शिवदयाल सिंह नेह जाबर लोक होरने थाह्रें बी होए न। पर उ'नें
थाह्रें जित्थै-जित्थै लोकें रलियै उं'दा मुकाबला कीता उथैं गै राजा शिवदयाल सिंह गी हार खानी
पेई। ए मेरे आस्तै बिल्कुल नमीं गल्ल ही जे शिवदयाल सिंह बी हारी-नस्सी गे न, पर ए कवत्ता
उ'नें पहाड़ें दे बेचलै अपनी किलेबन्दी गी पक्का करियै, अजें बी लड़ाई लड़ै करदा ऐ। पर पही
सोच आई लड़ाई कणेही? कु'न हा ओदे नै लड़ै दा? अज्जै तक्कर कुसै नै इक जन्न बी ते ओदे
किले बख्वी नेईं ही बाही। उसी डर कोदे कोला हा? उसी अजें कुसै नै लड़ाई आस्तै बंगारेआ गै
नेईं हा। ओ तां अजें बी अपने शीश मैहलें च इन्द्र दे दरबार लाइयै परियें दे नाच दिखदा होग।
कमलो गी [सूँक सुट्टियै] रसाल सिंहै दी कमलो गी, शराबै दे नशे च, छाती कन्नै लाइयै पुछदा
होग- "कुत्थै ऐ तेरा ओ रसाल सिंह? रसाल सिंहै नै तुगी ए रेशमी पुशाकां देनियाँ हियां? गहने,
ए गोल्लियां, ए चान्नी दे थाल, ए नित नमें पकवान देने हे, उस नखट्टू भुक्खे नै ?"
बारें बरें दै बाद मिगी इ'नें बिसली चु'ब्बें गै परतियै उस धरती पर सद्दो आन्दा जित्थै मेरी
प्रीतै दा सुर्ग जलियै स्वाह होआ हा, जित्थों जानें पर कुसै नै मिगी दों पैसें दा खत लिखियै
सम्हालेआ तक नेईं हा। उस्सें बुड्ढी विधवा बुआ दे सवाए जित्थै मेरा होर कोई नेईं हा। ना दोस्त,
ना रिश्तेदार, फही बी बारां ब'रे अपने देसै दे बक्खरे-बक्खरे लाकें च फिरी-फरायै मिगी अपनै
अन्दर फिरी उस्सै अग्गी दियां लपटां लप-लप करदियां सेही होइयां जिसी में समझदा हा कर्दू दी
खिहली गेई दी ऐ। ए अपनी उस्सै धरती दी ममता दी अग्ग ही, जिस नै मेरी प्रीत उज्ज़ड़ने पर,
हमदर्दी दा इक अथरू नेईं हा बगाया। पर अज्ज बारें ब'रें परैन्त मिगी अपनै उ'नें दिनें दी
नासमझगी पर आपूं हासा औन्दा ऐ। उस जग़ीरै च मेरै कन्नै हमदर्दी दस्सने आस्तै अथरूं बचे दे
गै कोदी अक्खीं च हे ? स'ब्बे अक्खियां रोई-रोई खाली होई गेईं दियां हियां। ते उ'नें लचार मनें
दियें सूंकै गी, बेबसी च झुकी दियें नज़रें गी, पढ़ने दी अकल उस बेल्लै मेरे कोल बी नेईं ही।
अज्ज में इस धरती दी चुप्पी च तड़फदी उस दी बेदनै गी थोड़ा पन्छांनने जोग होई गेदा हा-
इसकरी मेरे पैर अपने-आप राजा शिवदयाल सिंह हुन्दी उस पक्की किलेबन्दी पासै चली पे,
जित्थै जग़ीरदारी खतम होई जाने परैन्त बी, लोक अजें अपने-आपै गी पैहलें आंगू गै जग़ीरदारै दी
रेआया समझियै डरे-सहमे दे हे। दूई थाहरें समां किन्ना बदली गेआ ऐ- एदा उ'नें गी कोई पता
नेईं हा। इस्सै बेबसी च डुब्बी दी रामगढ़ी च में परती आया। में फही इक गलती कीती। में पैहलें
उस बेबसी दी उप्परली चुप्पी गै दिक्खी-ओदै ख'ल्ल के तूफान सुरकै करदा ऐ, ए मिगी पिच्छों
पता लग्गा। "सुरकै करदा ऐ"- ए अक्खर में जानियै बरतने न। दरअसल मेरे उस लाके गी इन्ना
पिच्छड़े दा दस्सणा बी उस लाके कन्नै इक जुलम करनै ए। पर एदे च मेरा के कसूर ऐ- अ'ऊं
ते उस कहानी दी गल्ल करै करनां जेदे च में हीरो बनेआ हा। जग़ीरां मुक्की-मकाई गेइयां, इ'नें
जग़ीरें गी बिसली ताकत देने आली मंझली कोरज बी सुक्की-सकाई गेई। फही बी रामगढ़ी च ना
कोई स्यासी संस्था बनी, ना उ'नें लोकें दी गैरत नै जोश मारेआ। कुत्ते दो-चार मनचले बी आजादी
दे गीत गान्दे नेईं ल'ब्बे।
रामगढ़ी च आयियै मिगी ल'ब्बी उ'थै बुड्ढी बुआ, विधवा हुकमी, रेशमी तल्ले लावे आली
विधवा तारो, गुआर नाथी, भागें दा मारे दा छनकू झीर, मनमौजी शागू बाबा जां नत्थू दी घरै
आली- जि'यां धुखी-धुखियै ठंडियां होई गेदियां धूनियां होन। कुत्ते कोई चंगारी स्वाई च दबोई दी
बची दी होग- उप्परौ दिक्खियै पता नेईं हा लगदा। ते तोआहीं राजै नै समां परखियै अपने पैहलें
शस्त्र-हथ्यार बदलियै नमें जोड़ी बनाई लैते हे। किला उस्सै चाल्ली मजबूत ते पक्का हा। टिक्का
पंडत उ'थै नेहा हा। ओदे गुण्डें दी संख्या किज बधी गेदी ही। हून बी उ'आं गै मैहलें दे बेहड़े च
रामलीला हुन्दी, नरातें च उ'आं गै कज्जाकां पजोन्दियां। बाह्य इन्ना हा, जे हुन रामलीला दी स्टेजा
परा टिक्का पंडत मैम्बर असैम्बली राजा शिवदयाल सिंह हुन्दी तरफ ते सराहना करने आस्तै
तकरीर जरूर करदा।
लोक-तंत्री जुगै दे लग्गने परैन्त पैहला चुनाS होई चुके दा हा जेदे च इस लाके चा राजा
शिवदयाल सिंह होर बिला मुकाबला चुने गे हे। ओ हुन दूए चुनाS आस्तै बी खड़ोने दी त्यारी करै
करदे हे। एतकी उ 'नेईं तुलसी रामै कन्नै मुकाबले दा बी डर हा।
में उत्थें आई ते पुज्जा, पर करां के ? इस मोरचे पर लड़ने दी मिगी बी कोई जाच नेईं ही।
उत्थें मिगी इस लड़ाई गी शुरु करने दा रस्ता दस्सेआ तुलसी रामै नै, जेहड़ा इस लाके दा पैहला
ग्रैजुएट हा ते जिस नै अग्गें औने आले चुनाएं च पुराने जग़ीरदारै दा मुकाबला करने दा निश्चा
करी लैते दा हा। उस घने न्हेरे च मिगी उ'थै इक टिम-टिम करदा दीया सेही होआ। तुलसी रामै
कन्नै मिलियै ते ओदियां गल्लां सुनियै मिगी सेही हुआ जे ओदे बोलें च नमें जुगै दी चेतना दे ललकारे न। ओदी नजरें च नमें सुखनें दे रंग न। ओ सुभाऽ दा कोमल चित्रकार जन हा, जेहड़ा बड़ी सद्धरें कन्नै अपनी भावनाएं दे रंग घोलियै उस लाके दे मन-भाने शलपै गी जीवनदान देने आस्तै तरसै करदा हा। पर थोड़े दिनें च मिगी सेही होन लगा जे तुलसी राम सुखने दिखने आला कलाकार ते ऐ हा, पर उ'नें शलपै दी तपाशें च घनी धुड़ें चा रस्ता तुप्पियै धारें-धारें फिरने आला जोगी नेईं। नमें चुणाएं च जागीरदारै दा मुकाबला करने आस्तै लाके च स्यासी बेदारी दी ज्वाला जगाने आला कोई साधन-हथ्यार ओदे कोल नेईं हा। कई बारी ओ डरियै पिछें हटी जाने दी सोचदा हा। पर मेरे पुज्जी जाने पर उसी किज होंसला हुआ। उ'आं ओ लक्ख कमजोर हा, पर रामगढ़ी च नमां मोरचा बनाने दी प्रेरणा मिगी उससे कोला थ्होई ही, ए बी सच ऐ।
रामगढ़ी दी इस कहानी गी जिन्ना 'रस' हुकमी, तारो ते कमलो कारण थ्होआ ऐ- में समझनां मेरे कारण ओदे च कोई खास बाड्डा नेईं हा हुआ। मेरे च बी 'हीरो' आले कोई खास गुण थोड़े हे। में ते दरअसल 'अ'नें' 'च' 'काना' राजा हा। मेरे कालजे च अपनी अग्ग ही, जिस नै मेरी प्रीत, मेरी जुआनी, मेरी गृहस्ती दे सुनैहरी सुखनें गी फूकियै स्वाह करी दित्ता हा। उस अग्गी गी रामगढ़ी दी बेबसी नै होर भड़काया हा। राजा (हुन मैम्बर असैम्बली) शिवदयाल सिंह दे किलेनुमा महलें दी बड्डी ड्योढ़ी दा जि'यां 'बोर्ड' बदली गेआ हा- पर उस पुरानी हवेली दै अन्दर स'ब्बे गल्लां उस पुरानी जागीरदारी आलियां गै हियां।
तुलसी रामै गी लेइयै अस दो-त्रै जने आले-दुआले दे ग्राएं च फिरी आए, जलसे करी आए, लोकें कन्नै मिली आए। स'बनें थाहरें लोकें असें गी वोट देने दा यकीन दुआया। अस बड़े खुश हे, जे जित्थें जनेआं कामयाबी ल'बदियै। पर इस नाटकै च 'हीरो' दा पार्ट करियै ते खीरले 'सीना च, जानियै आत्महत्या करने दे बा'द अज्ज में उ'नें जलसें दी गल्ल सोचना तां सेही हुन्दा ऐ जि'यां असें स्यासी लामबन्दी दे बारे च पूरा बचपना दस्सेआ हा। अस बिना पक्की नींह रक्खे गै कोट-कन्धां चुक्कन लगी पे हे। इ'नें लड़ाइएं च भला कल्ले माहनू दी के बिसात ऐ। ते असें नां कोई पार्टी खड़ेरी ते ना कुसै दुई पार्टी कन्नै अपना आप जोड़ेआ। इस चुनाऽ च अस कोरे आदर्शें दियां गल्लां ते करदे हे पर असें ए कदें सोचेआ गै नेईं हा जे असैम्बली च जाइयै बी तुलसी बचारा करग के? ना हंसें च ना काएं च। ना कोई टकोदा स्यासी नजरिया ते ना गै कोई लोक-भलाई दे कम्मै-काजै दी सोची-समझी दी रूप-रेखा। लोकें दी साढ़े कन्नै किन्नी हमदर्दी ही, एदा थोड़ा-मता पता ते असेंगी उ'नें दिनें गै लग्गी गेआ हा, जि'नें दिनें अस जागीरदारै दी रामलीला च जाइयै ते टिक्का पंडता दे गुण्डें दियां डांगें कन्नै सिर-बाह्रं बनाइयै खट्टें पर पेदे हे। कुसै लाके च कोई जलसा नेईं होआ, कोई जलूस नेईं निकलेआ। कुतै कुसै नै रलियै बावेला नेईं कीता। कसबे दे लोक चोरी-छुप्पे साढ़ा हाल पुच्छी जन्दे। दरअसल उस रामलीला च बी गलती मियें कीती ही। ना मौका दिक्खेआ, ना अपना जोर, ते चलाक ते पूरी चाल्ली त्यार बैठे दे बैरी दै बेहड़े जाइयै लग्गी पेआ डौले दस्सन ते जे मुहां च आया उ'यै बक्कन। इसी गै आखदे न- "आ बलाई मेरै सिर!" पर में हीरो जे हा! ते हीरो गी केईं बारी कुप्पड़ै कन्नै बी टक्कर मारनी पेई जन्दी ऐ। अज्ज असेंई अपनी दुई गलती बी साफ-टकोदी ल'ब्बा करदी ऐ। अस ते जि'यां जागीरदारै दी गोदें च बहियै
ओदे कन्ने लड़ै करदे हे। रामगढ़ी च उसलै बी उसै दा राज हा। ओदे कोल पैसा हा, आदमी हे। साढ़े कोल ओदा मुकाबला करने आस्तै कोई नकेबला थाहर बी नेईं हा। ओदे किले च के-के हुन्दा ऐ असेंई बिन्द पता नेईं हा लगदा, पर साढ़ी इक-इक गल्ल ओदे तगर रोज पुज्जी जन्दी ही। बारां बरै बाहर रहियें मैं भापा मता किज सिक्खेआ हा पर मनासब मोचाबन्दी करने दी अकल उसलै असेंई नेईं आई। बारां बरै राजे दी रानी बनियै रौहने पर बी कमलो मां नेईं बनी- फही बी ओदे संस्कार उसी राजे दे विरुद्ध बगावत करने थमां रोकदे गै रे। उसी ना जीने दी जाच आई ना मरने दी। उ'थै हाल साढ़ा हा। बारें बरै परैन्त बी असेंई जागीरदारा दी असली ताकता दा ते अपनी कमजोरियें दा पता नेईं लग्गा बारें बरै परैन्त बी, जिस दिन अद्दी रातीं कमलो, राजे दी भेजी दी मेरे कोल आई ही तां मिगी लालटैन स्हालनी पेई गई ही। लोई च मिगी डर सेही ओआ हा, ते न्हैरे च मैं रस्ता तुप्पे आस्तै तलोफां मारनियां मनासब समझियां हियां। कमलो गी कोल बैठे दे दिक्खियै, मिगी डर हा जे में बतोई नेईं जां। रामगढ़ी दे लोकें दे अथरूं-हौके-सुकां भुल्ली नेईं जां, राजा शिवदयाल सिंह दे काले कारनामें भुल्ली नेईं जां! किन्ना जोर हा? अद्दी रातीं अपनी ब्याहता जुआन रानी गी मेरे कोल भेजियै मेरे कन्ने सुलह करन दा जतन करन लग्गा हा। ते में बी तुलसी गी 'शिखण्डी' (महाभारत च शिखण्डी गी अग्गें करियै अर्जुन नै भीष्म पितामह कन्ने लड़ाई कीती ही) आला लेखा अग्नें रखियै शिवदयाल सिंह गी स्यासी खाड्डे च धाने दी सोचै करदा हा। दरअसल, मिगी अज्ज अपणे उप्पर गै रोह आवै करदा ऐ।
पैहली माली दा ओ घोल। ते जोड़ एैसे पैहलवान कन्ने हा जेहड़ा उमर खाइयै छड़ा बुत-जन खड़ाेता दा हा, बारां बरै जेहदे महलें च रहियै बी कमलो दी गोद सख्खनी ही। जेहड़ी जागीर नेईं ही रही। जेदा कुल सहारा हे दस-बीह गुण्डे, जेहड़े उसने नौकर रक्खे दे हे। होर पंजें-दसें बरें 'च शिवदयाल सिंहा नै आपूं गै मरी-भुजी जाना हा। टिक्का पंडतै उसी किन्ना चिर संजीवनी बूटी खलान्दे रौहना हा? पर असेंई पार्ट गै नेहा थ्योआ हा, अस के करदे? खीरले सीना च जिस चाल्ली दा 'ट्रैजडी' होई उसी नभान्दे होई मिगी आपूं हासा आवा करदा हा। पर करदा के? तारो इस खीरले सीना च, सरंगी चा निकलने आली बारीक मातमी सुरा आंगु राजे दी कुरसी दे पावे ख'ल्ल दबोई दी तड़फा करदी ही। में भला उथैं की गेआ? में दरअसल तारो दी दिक्खा-दिक्खी ओदे पिच्छें तुरी गेआ। बगैर कोई साम्भ-सम्भाल कीते, बगैर कुसै तैयारी दै। मैं आपूं गै बैरी दे बिच्छे दे जालै च जाइयै फंसी गेआ हा। अगें राजा पूरा निशानेबाज हा। तारो ओदी पैहली गोली कन्ने गै लुड़की गेई ते दुई आई सिद्दी मेरे कालजे च। मैं ढेई पेआ, पर मोआ नेईं। अजें मेरा पार्ट अगें होर हा। राजा शिवदयाल सिंह मिगी सारतां करा करदा हा जे मैं ओदे पासै सरकदा-सरकदा बधां, ते कोल जाइयै दोनें हत्थें च लेइयै ओदी मुण्डी दबांऽ जे ओबी कुरसी परा ख'ल्ल पवै ते मरी जा।
खीरला सीन मिगी सेही ओआ करदा हा जे बड़ा गैर-कुदरती हुन्दा जा करदा ऐ, पर मिगी इस गल्ला दी खुशी बी ऐ ही, जे दिखने आले बुत्त-जन बनी गेदे न। चार मोतां दिक्खियै उ'न्दे साह तेज होई जन्दे न, ते कदें रुकदे सेही हुन्दे न। में मरदे होई तारो गी सम्भालेआ। ओदे नां पर कोई सड़क जां स्कूल बनाने दी प्रार्थना कीती। इस्सै जनानी गी सारा ग्रां कब्ती ते कंजरी आखदा हा।
मिगी स'बनें कोला बड्डी खुशी इस गल्लै दी ही जे ऐतकी असें ए सारी खेढ अपनी मातृभाषा डोगरी च खेढी। पैह्लें जित्थें उर्दू-हिन्दी दे स्कील पार्ट चेतै करने पौन्दे हे ऐतकी ओ कलेश नेईं जरना पेआ। पार्ट करने दा नन्द आई गेआ। एही कहानी अपने लाके दी अपने लोकें दी। पनछानी दियां सूरतां, पनछाने दे हासे, पनछाने दे अत्थरूं! नेईं तां तारो, हुकमी ते कमलो नेहियें इस धरती दिएं पुत्रियें दी गल्ल कुन्न करदा हा।
मेरा मन ऐ जे में हुन कुसै नेही कहानी दा 'हीरो' बणां जेदे च जनता दियें नमियें तांहुंगें दा नमां संगीत होऐ, जेदे च इस धरती पर नमियें रचनाएं आस्तै नमें तुलसी राम औन, तारो, हुकमी ते कमलो गी प्यार-ममता दे सुच्चे बातावरणै च नमें गीतें दियां नमियां भाखां बनियै उस्सरने दा मौका थ्वोऐ। जेदे च इस धरती दी गरीबी-मूढ़ता दे कन्नै-कन्नै एदे पर प्रगट होने आले नमें स्वार्थें कन्नै टक्कर लैने आस्तै, नमें उद्यम, नमीं लोड ते नमें हौंसले दे नजारे होन। अच्छा हुन आज्ञा देओ। तुसें बड़े सब्रै कन्नै मेरी गल्ल सुनी- एदे आस्तै तुंदा धन्यवाद।
( "रसाल सिंह" - प्रो० मदनमोहन शर्मा हुन्दे डोगरी उपन्यास 'धारां ते धूड़ां' दा हीरो)
जीवन ते त्रै उद्देश्य
धर्म
धर्म शब्द बोलदे-सुनदे गै साढे़ सामनै हिन्दू-धर्म, बुद्ध-धर्म, पारसी-धर्म, इस्लाम-धर्म, ईसाई-धर्म- अर्थात् धर्मै दी इक लम्मी रीडी, फिल्मी मूरतें आंहर चलदी सेही हुंदी ऐ। ते जिसलै अस इ'नें धर्मै दे मनने आलें दी इतहास पढ़ने-सुनने आं, तां इ'यां सेही हुन्दा ऐ, जे धर्म नां दी आस्था दे मनुक्खें गी किट्ठा घट्ट कीता ऐ ते लड़ाया मता ऐ। रचना पासै घट्ट प्रेरेआ ते, दूएं दे धर्मै कन्नै सरबन्ध रखने आली कीमती-थमां-कीमती बरास्तें गी बरबाद करने दी प्रेरणा मती दित्ती ऐ। एह गल्ल बी लोक मनदे न, जे स'बनें धर्मै दे बुनियादी आदरशें च इन्ना बिरोध नेईं जिन्ना उसदे कर्मकांडें च ल'बदा ऐ। पर, फही बी इस गल्लै थमां इन्कार करना कठिन ऐ, जे आम मज़हबी आदमी, उ'नें सांझें आदरशें गी, वक्ती मसलहत समझियै भाएं थोड़े चिरै आस्तै मन्नी बी लै, पर छाप ओदे मनै पर उस धर्मै कन्नै सरबन्ध रखने आले कट्टर कर्मकांडें दी गै हुन्दी ऐ, जिसी ओ कदै अपनी अकली दी कसौटी पर परखदा नेईं। इस संसारै च कला ते साहित्य दे खेतैं च मनुक्खें जो-जो सराहने-जोग कम्म् कीते न, उ'न्दें च धार्मिक प्रेरणा दा बी बड़ा हत्थ रेहा ऐ। एहदे कोला इन्कार नेईं कीता जाई सकदा। पर, उस सम्पत्ति दा अस्सी-नब्बे प्रतिशत हिस्सा मनुक्खें इस प्रेरणा थमां दूर रेहियै रचेआ। कला ते साहित्य दी रचना बारे धार्मिक ते धर्म-निरपेक्ष प्रेरणा दे इस अनुपात गी मेरे केईं साथी, खुशबा धर्म-निरपेक्ष प्रेरणा बारै पक्षपात गै मन्नन, पर इस गल्ला थमां कु'न इन्कार करी सकदा ऐ जे कला ते साहित्य दे अनमुल्ल भंडारें गी बरबाद करने दी मती सारी जिम्मेवारी इस्सै कट्टर ते बिसली धार्मिक भावना पर औंदी ऐ। मेरा आखने दा मतलब एह ऐ जे जिसलै अस जीवन दे उद्देशें च धर्मै दी चरचा करने आं- तां साढ़ा मतलब धर्मै दे इस संकीर्ण ते अन्धविश्वासै पर टिके दे रूपै कन्नै नेईं हुंदा। धर्म दे उस संकीर्ण रूपै गी जीवन दा उद्देश्य कि'यां मन्नेआ जाई सकदा ऐ- जिसदे पिंजरे च कैद होइयै मनुक्खें दे मन, बुद्धि ते आत्मा, त्रैव्वै खुंढे ते हठी होई जन्दे न। मनुक्खें दी सोच, उ'न्दे कम्म्, ऐसे सांचे च बझ्झी जन्दे न, जेदे च मनासब-ना-मनासब दी सोच आस्तै रत्ती-मात्तर बी थाहर नेईं रोंहदा। आदमी उस्सै कट्टर धार्मिक भावना दी मशीनै दा इक निर्जीव पुर्जा मात्तर बनी जंदा ऐ। ओ अपने लेई सुतंतर होइयै सोची नेईं सकदा। अपनी सोचें दे दस्से दे रस्ते पर चलियै कम्मैं-काजें दी परख-पड़ताल नेईं करी सकदा। ते जे कोई मनचला इ'नें कंधी गी टप्पियै, खु'ल्ले मदानें दी निर्मल हवा च साह लेईयै आखै- जीवन ते इस्सै मुक्त वातावरण च ऐ- उत्थै अन्दर ते न्हेरा गै न्हेरा ऐ, दमघोटू न्हेरा। जेड़ी मद्धम-मद्धम लो ऐ बी, ओदे च छड़े फौजी ढंगै दे करतब हुंदे न। जि'यां भिड़ें दे पिच्छें भिड़ चलदी ऐ- सिर नीमां सुट्टियै। पर जदूं ए जेलां, कट्टर धार्मिक भावनाएं दियां जेलां, पक्कियां हियां- इ'दे पेहरे मज़बूत हे, तां इस
जेलै दी, जेलरें दी, ते जेल-कनुनें दी नुकताचीनी करने आलें गी शेरें अग्गें सुट्टियै लीर-लीर हुंदे दिक्खेआ जांदा हा। उ'नेंगी पुट्टे टंगियै उ'न्दे ख'ल्ल अग्ग बालियै उ'न्दे बागी सिरें दी चरबी कड्ढी जंदी ही। उ'नेंगी जहर पीने गी दित्ते जंदे हे। उ'नेंगी सूलियें पर चढ़ाया जांदा हा। पर हरानी इ'थै जे धर्म दे उस कट्टर रूपै गी, सुतंतरता दा प्रेमी मनुक्ख, म्हेशां चुनौती दिंदा आया ऐ। हर जुगै च सुनचदा आया ऐ जे कट्टर-पन धर्म नेईं। शास्त्रें, पोथियें दी एह् गुलामी धर्म दा असली सरूप नेईं ऐ। एह् दम्भ ऐ, पाखंड ऐ। सच्ची मनुक्खता दा एहदे कन्नै कोई नाता नेईं। सच्ची मनुक्खता गी जेहड़े घेरे बक्ख-बक्ख हिस्सें च बंडदे-खंडादे न उ'नेंगी धर्म कि'यां आखेआ जा? धर्म ते मनुक्खता गी धारण करने आले गुणें दा नां ऐ। धर्म ते उ'नें रसतें दा नां ऐ जि'नें पर चलियै मनुक्ख जीवनें दियें सच्चियें मंज़लें पर जाई पुजदा ऐ। धर्म कुसै कन्नै घ्रिणा करना नेईं सिखांदा। धर्म कुसै कन्नै बैर करदा नेईं सिखांदा। धर्म मनै च घमंड बनियै उसी मतबाला नेईं करदा। ते धर्म झूठें पाखंडें नेईं हुंदा। सही धर्म हुंदा केह् ऐ? धर्म हुंदा ऐ निच्छल सरल जीवनें दा सरल प्रवाह। रुक्ख-बेलें दा धर्म ऐ? फुल्लें दा केह् धर्म ऐ? सूरजै दा केह् धर्म ऐ, कण्डें दा केह् धर्म ऐ? इ'त्थै नेह सैकड़ें सवालें दा जवाब देना कोई औखा नेईं सेही हुंदा। हवाऊ दा धर्म दस्सने समझाने दी बी लोड नेईं पौंदी। बहाऽ जरा बी रुकी, हुम्म होआ, परसे बगण लग्गे; पक्खी ते ठंडे पानी गी मन हांबन लग्गा। बहाऊ गी अपने धर्म दे पालने च बिन्द रोक पेई ते दिक्खो के हलचल मची गेई ऐ! सूरजै गी चार ध्याड़े दिनें बदलोक्खे च छप्पे रौहन देओ ते पेही दस्सो सूरजै दा धर्म केह् ऐ? कुत्तै बरफानी लाके च ठंड़ु कन्ने ठरदे माह्नू गी अग्गी दे ग्यानी कोल ब्हालियै हत्थ-पैर सेकदे होई पुच्छो-अग्गी दा धर्म केह् ऐ? अफ्फल बुट्टें गी बागै चा की कप्पी-बढ्ढी छोड़दे न? ना छां, ना फल, भला उस रुक्खै दा केह् लाह? अपना धर्म पालने दी सरमत्था नेईं रही, तां बढ़ो-टुक्को ते बालन बनाओ उसदा।
ते माह्नू दा धर्म केह् ऐ? मंदिरें गी पूजना ते मसीतें गी अग्ग लानी? जा मसीतें च नमाजां बन्दनियां ते दूए धर्मस्थानें गी अग्ग फूकनी? ना, ना, ना। माह्नू दा पैह्ला धर्म ते इ'थै जे ओ अपने-आपे गी माह्नू बनाइयै रक्खी सकै- ना पशु बनन देए- नां राक्षस। ओदा कोई बी कम्म, दूए मनुक्खें आस्तै ना कंडें बनै, ना सूल बनै, ना डारे बनै। अरबों तारें गासै पर चमकदे न, लक्खां रुक्ख-बूटे जाड़ें च किट्टे उगदे-उस्सरदे न बेलां जहारें फुल्लें कन्ने लदोई जंदियां न। पही माह्नू गै इस धरती पर रलियै की नेईं रही सकदे? ओ इससे करी जे माह्नू गी खोऽ ऐ दूएं दे कम्में च दखल देने दी, माह्नू गी खोऽ ऐ देखावा करने दी, माह्नू गी खोऽ ऐ इक्कलसोख होइयै रौहने दी। इ'थै चीज़ां ओदियां कमजोरियां न। इ'थै चीज़ां उसी करस्तै पांदियां न। इ'थै चीज़ां उसी अपने धर्मै कोला दूर लेई जंदियां न।
फौजा दा सिपाई मोरचें च बैठा दा सामने डटे दे दुशमनें कन्नै दो करारे हत्थ करने दी गल्ल भलाइयै जेकर ए सोचन लगै जे ओदे ग्रां दा घीसू शाह नन्दै च ऐ। मिट्ठा बोलदा ऐ ते रज्जियै घट्ट तोलदा ऐ। ओदे जागत बी खन्दे-पीन्दे मौज करदे न, ते इक्क अस आं- इत्थै मौतै कन्नै चौंपड़ खेल्लै करने आं। मास्टर रलाराम जमाता च कुरसी पर बैठे दा, उडडा-उडडा जे सोचन लगै पापो हलवाई अड्डोसुड्डु पानी पाइयै दुद्ध बेचदा ऐ, ओदे सारे तब्बरें दे गले च सुन्ने दियां जंजीरियां न।
ओदे चार पक्के मकान न तां व्हाS रुकदी सेही होग; सूरज बदलखी च जाग उठी। धर्म दुहाई देन लगी पौग। रस्ते च औंदें-जन्दे माहनुएं गी टक्करों लग्गन लगी पौडन। मोर्चे च बैठे देआ जुआना, अपनी गण संभाल, गोलियें दी 'बैल्ट' सधेरिये रक्ख। सामने दुश्मन दूरबीन लायै दिख्यै करदा ऐ। तेरी बिन्द-क गफलत तेरी मौत बनी जाग। मास्टर रत्नाराम जी! जागत तु'न्दे दुआस मुँहें पासै दिक्खा करदे न। इ'नेंगी तुसें अज्ज 'जमा' दा तरीका समझाना हा। तुम तफरीकै च पेई गे ओ! माऊ दा धर्म, बब्बै दा धर्म, पुत्तरै दा धर्म, परजा दा धर्म, राजा दा धर्म, स'बनें जुगें च इक्कै-नेह रेह न। इस्सै करी अस धर्मै दा कट्टर ते शास्त्रें दा पाबन्द रूप नेईं मन्दे। धर्मै दा ते जीवें दा अटूट नाता ऐ। हर जीवै गी इस संसारै च आइयै अपने अनेंकां धर्म पालन पौंदे न। की जे, हर माहनू दे, ओदे समाजै च ते परोआरै च केई रूप हुन्दे न। इक्कै माहनू पुत्तर बी हुन्दा ऐ, भाS बी, पिता बी। इस्सै चाल्ली धी बी, भैन बी, माता बी। महल्लें च दूएं दा गोआंढी बी, नग्गरै च नगरबासी बी, देसै च देस-बासी बी ते प्रथवी पर माहनू बी। एदे अलावा ओ कोई कार-व्यवहार बी करदा होग। हर रूप च ओदे पर जेड़ियां जिम्मेदारियां औंदियां न, उ'नें स'बनें गी नभाना गै ओदा धर्म ऐ। ओदे जीवनै च मनासब बोध-बकास दे रस्ते च जेहड़ियां अन्दरूनी (लोभ-मोह-अहंकार ते स्वार्थ) ते बरूनी (नातेदारियां-मित्रोचारियां-केईं दारो-चारियां) रोका औंदियां न- उ'नेंगी हटाना बी ओदा धर्म ऐ। जेकर ओ सेही करै जे जिस समाजै च ओ र'वै करदा ऐ ओदा ढांचा सिरै थमां लैयै पैरें तगर बदलै बिना मनक्ख बनियै जीना मुमकन नेईं, तां समाजै दे उस मानव-बरोधी व्यवस्था दे ढांचे गी तोड़ने ते ओदे कोला अजाद होइयै कोई ढांचा बनाने चलाने दा बी उसी पूरा हक ऐ, जेहदे च स'बनें मनक्खें गी बोध-बकास करने दे इक्वे-जनेह मौके मिली सकन।