सरदार मंगलसिंह दी नर्मी कोठी च, इक बरे च होने आला ऐ त्रिया अखंड पाठ ऐ। पैहला पाठ उसने ए नर्मी कोठी बनवाने ते ओदे च आइयै अपने इक्कै-इक जागत दलीपसिंह दे ब्याह दी अरदास देने आस्तै कराया हा। नर्मी आलीशान कोठी, सिंह जुआन स-न्हाकड़ा पुत्तर, लखपतियें दी जाई, परी जन नूह। इस पैहले पाठै दे मौके उस कोठी दे अन्दर-बाहर, जि'यां बसंती रुतें दे शलैपे दी झिलमिल ही। लाऊड स्पीकरें पर गुरुये दी पवित्र बाणी गुंजै करदी ही, बेहड़ें नमें साएबान लग्गे दे हे। कुर्सियें दियां रौहंगां लग्गी दियां हियां। म्हल्लें दे जागत-ब्याणें इस रौनका च मस्त होए दे थाएं-थाएं महफलां लाइयै बैठे दे हे। सयाने कम्म-काजी लोक कारोबारी गल्लें-बैहसें दा नन्द लै करदे हे। रेशमी तल्लें दी सर-सर, जुआन हास्से, हर जात-बरादरी दे लोकें दी घटदी-बधदी भीड़, मबारकां, सब खुशी च मद्दी दियां तस्वीरां। हर चीज़ै च खुशी ही, हर चीज़ै च गोहाड़ हा।
सरदार मंगल सिंह दा के आखना! ओ खुशी दे नशे च हा। दलीप अपने जुआन साथियें कन्नै अपने सज्जे दे ड्राइंग रूमै च गपशप करै करदा हा। ओदे यार ओदे ब्याह दे बेल्ले दे फोटो दिक्खी-दिक्खी कदै ओदी, कदै फोटो च आई दियें कुड़ियें-चिड़ियें दी तरीफ करै करदे हे। लखपति बाबलै दी धी जीत कौर, रेशम ते गैहनें च चमकदी-मुसकरान्दी, म्हल्लें दिए जुआन कुड़ियें च घिरी दी उ'न्दे हास्से-मखौलें दा जवाब देऐ करदी ही। जनानियां उसी दिक्खदियां ते औंगल दन्दें हेठ दबाई लैन्दियां। वाहे गुरु! वाहे गुरु! कोई जीतकौर गी सराहन्दा, कोई दलीप दे भागें गी। पर स'ब्बे जने इक्क राड हे जे मंगलसिंहा नेहा भागवान संसारै च कोई बिरला गै होंदा ऐ। ए पैहला अखंड पाठ इस्सै खुशी दे हासे-गड़ाकें च होई बीती गेआ।
दुआ अखंड पाठ अज्जै थमां कोई चार महीने पैहले होआ हा। मंगलसिंहा दे इस्सै जुआन सुन्हाकड़े पुत्तरै दे “तेरहवें” पर। दलीप दा ब्याह होने दे सत्तें-अट्ठें महीनें बा'द गै इक दिन बड़ी रहस्यपूर्ण हालती च ओ कतल होई गेआ हा। कुसै ने उसी गोली मारी दित्ती ही। दुआ पाठ ओदी आत्मा दी शान्ति आस्तै बैठा हा। इस मौके उस कोठी दा ठाठ-बाठ अक्खीं गी चु'बदा हा। हर चीज़ै पर दुआसी ही, हर चीज़ डरी-सैहमी दी ही। म्हल्लें दे जागतें दी कोई महफ़ल नेईं ही। कारोबारी गल्लां ते बैहसां मौन हियां, जुआनियां कलमाई दियां, शलैपे डरे दे ते बुढ़ापे दियें नज़रें च धुन्दां ते नेरे हे। हर चीज़ै पर मौतै दे डरौने परछामें सेही हुन्दे हे। सिर्फ लाऊड-स्पीकरें परा गुंजदी गुरुएं दी पवित्र बाणी गै उस मौतै दे वातावरणै च अनडर सेही होन्दी ही। ओदा कारण हा जे इस बाणी गी जीवन-धारा दा सारा भेद-मर्म पता हा। इस जीवन-धारा दे दोनैं किनारें गी, जन्म दे किनारें गी ते मृत्यु दे किनारें गी बी ए बाणी भलेआं समझदी-पछान्दी ऐ। ते माहनू दी नज़री गी इ'थै समर्थ नेईं थोई। ओ इक कंडे गी जेल्लै दिक्खदी ऐ ओल्लै दुआ कंडा ओडी हाम्बा कशा दूर परे हुन्दा ऐ। जीने दे किनारे परा इस धारा दियें लहरें पर जगमग दीए गी, उं'दे सुनैहरी
परछामें गो जेल्लै ए नजर दिखदी ए, तां न्हैरे च डुब्बे दा दूआ कंधा उसी नेईं ल'बदा, जित्थें पुजदे-पुजदे ए जोतां स्हिली जन्दियां न, न्हैरे च इक-मिक होई जन्दियां न। ते जेल्लै कदै ए नजर, माह्नू दी नजर, मोती दे कनरै फैले दे न्हैरे च जाई फसदी ए तां माह्नू दा तन-मन, ओदे नैन-प्राण सब उस काले न्हैरे च सहमी जन्दे न, संगचोई जन्दे न। इस्सै करी पैहले अखंड पाठै दी अम्बरत बाणी उस कोठी दे हासें-गडांके ते कारोबारी जोजनाएं दे रौलै कशा उप्पर-उप्पर नीले अम्बरै च गूंजदी रेही ते दूए पाठै दी मौके बी ए बाणी उस कोठी पर छाई उदासी गी, उ'नें मत्थरुपें-हौंकें दी उस चुप्पी गी बेदी नेईं सकी। इस कोठी दे कोलें लंगदे बाऊ दे फनाकें दे रथै पर बैठियै उस बाणी दे बोल नीले अम्बरै च लीन हुन्दे रेह। इस दूए अखंड पाठै दे बा'द, इ'नें चौं महीनें च सरदार मंगलसिंहै दी ए कोठी इक बचित्तर जगह बनी गई ही, जित्थें हर बेल्लै इक बिस्सली उदासी छाई रौहन्दी। सिड़कै दै कंधै बनी दी ए आलीशान कोठी, औने-जानें आले लोकें आस्तै खतौले दा थाहर बनदी बी कि'यां नेईं? जे उत्थें जीवन दा कदै कोई चि'न-नशान ल'बदा बी ऐ तां ओ सरकारी जीपै-गड्डी पर सलाह-मशवरे आस्तै औने आले कोई पुलसा दा अफसर होंदा जां अदालती च चलने आले इस खुनै दे मकद्दमे च मंगलसिंह पासेआ पैरवी करने आले वकीलें च कोई होन्दा ते जां फही मंगलसिंहा गी दिक्खने आस्तै औने-जाने आला कोई डाक्टर, हकीम।
लोकेंई अपनी सो चिन्ता-फिकर होने पर बी दुएं दे बारे परेशान होने आस्तै, उं'दे कोल बड़ी बेहल होन्दी ऐ। इ'नें लोकें गी हुन ए चिन्ता खा करदी ही जे एड्डी बड्डी कोठी दा के बनग? पुत्तर-बजोगी सरदार मंगलसिंह बचारा ते दिन-ब-दिन घटदा जा करदा ऐ। कालजै लग्गे दे इस डुंगे जखमा ने इसगी आखर किन्ने चिर जीन देना ऐ? फही के होग? मंगलसिंहा दी घरैआली बचारी ने ए मौहरे दे घुट पी-पीयै किन्ने-क चिर लड़ना ऐ मोती कन्ने? लोकें गी आई-जायै मता तरस औंदा मंगलसिंहै दी नूंहां पर जेड़ी जुआनी ते शलैपै दियां गल्लां ओ नित्त सुनदे-सुनादे हे। लोक आपूं-बिचै आखदे-“कुत्थें रौहन लगी इस दम-घोटू सोगी मकबरे च! ओदा लखपतिया बाबल उसी कद्दूं खुद्दने-धुखने आस्तै इत्थें रौहन देग। आखदे न, उं'दियां एदे कोला बी सोआइयां त्रै-चार कोठियां न। इक भाS बड़ा बड़ा ठेकेदार, दूआ पलटनी च करनैल ए। बब्बे ने पार्टीशन दे बा'द दिल्ली च आयियै इक ढाबा खोलेआ हा जडा अज्ज 'लिबर्टी' नां दे होटल दा रूप लेइयै उ'नें लोकें पर हसदा ऐ जेहड़े आखदे न - 'भाग कोई चीज गै नेईं। दस्सो भला बिना भागें बी आदमी गी कदै ओ सबीलां सुझदियां न जि'न्दे राहें धन्नै दियां सीरां फुटदियां न? नेईं कदै बी नेईं। पर भाग कदै-कदै आदमी पर दयालु होइयै उसदे कन्ने दगा बी करी जन्दे न, जि'यां उ'नें सरदार मंगल सिंहै कन्ने ते ओदे इक्कै-इक्क जागत दलीपसिंहा कन्ने कीता।
दलीपसिंह ने बी० ए० पीस कीता तां मंगलसिंह ने अपना गड्डियें-बस्सें दा सारा कारोबार उसी सौंपी दित्ता। दलीप इक ते पढ़े-लिखे दा ग'बरू, दूआ कम्म अग्गे गै पक्के पैरें खड़ोता दा। सत्त-अठ ज्वार रपे महीने दी टकोरी आमदन। पर आखदे बी हैन पैसे कन्ने पैसे दी त्रेह (तृष्णा) उ'आं गै बधदी ऐ जि'यां लूना आला पानी पीने कन्ने।
इक आम आदमी जि'नें गल्लें दी, मनै च कल्पना करियै अपने आस्तै इक सुरग सजाई लैन्दा ऐ ओ सब गल्ला मंगलसिंहा दे अग्गें दस्त-बदस्त हाजर रौहदियां हियां, ओदा शरीर जरूर भारा होई गेदा हा, पर ओ शराबै दी दौलत ओआ हा। दाढ़ी दे बाल भाएं चिट्टे फिरी गेदे हे पर मुंहां
दी लाली अजें बी जुआनें गी शरमिन्दा करदी ही। उमर ओदी सट्टें तगर पुज्जी पेदा ही। ब'रा घट जां ब'रा बद्ध।
पर दलीप अजें जुआन हा। ओ सोचदा- ए सब ते मेरे बब्बे दी कमाई ऐ। अनपढ़ बब्बे दी कमाई! ओदा पढ़े-लिखे दा होना किस कारी जे एदे कोला बी सुआई कमाई करियै नेईं दस्सै। ओदे इक रिश्तेदारें ने इक बारी उसी आखेआ- "आ मेरे कन्ने भाईवाली च ठेकेदारी करी लै।" उसने सुनियाै नक्ख-मुंह चाड़ियै आखेआ- "टके-टके दे इंजीनियरें ते क्लर्कें गी बन्दगियां कराना ऐं? मेरी जुत्ती परा। कम्म ओ, जेदे च गर्दन नेईं नीमीं होपे, कुसै दी खुशामद नेईं करनी पवै। मिगी सच पुच्छो तां ए ट्रांसपोर्ट दा कम्म बी पसन्द नेईंओ। हर साल इ'नें गड्डियें गी पास कराने दी तरद्दद ते ट्रैफ्क दे अफसरें दियां नाज़-बरदारियां। ए बी जलात ऐ। नौजवान ट्रांसपोर्टर इ'यै नेहियां गल्लां सुनी-सुनी दलीप गी अपना लीडर समझन लग्गी पे हे। उ'नेईं मेद ही जे दलीप ने जां ते कुतै दिल्ली जनेही जगह कोई बड्डा होटल चलाना ऐ तां जां फही कोई सिनेमा खोलना ऐ जेदे अगें जम्मू दा 'के० सी०' जां दिल्ली दा 'गोलचा' सब हेच होई जांगन।
दलीप सिंह उ'न्दियां ए गल्लां सुनियै हसदा ते आखदा- "में हिन्दोस्तान च इन्ने चिर गें जिन्ने चिर मेरे कोल अट्ठ-दस लक्ख रुपेआ नेईं होआ। वालद साहब दे पैसे गी में उ'न्दी अमानत समझनां। एदे पर सरदार साहब दे पोतरें दा हक होई सकदा ऐ पर में ते रपे पर अपना कोई हक नेईं समझदा। ओ चाहन तां अपनी ए जायदाद गरीब-गुरबें गी बांडी देन। गुरद्वारे गी देई देन।
सरदार मंगलसिंह गी बी कदै-कदै अपने दलीप दियें गल्लें दी भिनक सुनचदी तां ओ हसदे-हसदे जवाब दिन्दे- "जुआनी दी गरमी ऐ ना! लक्खें दी कमाई पर बैठे दा कोई बी ग'बरू इस्सै चाल्ली बैह्की सकदा ऐ। दलीप दी अजें उमर गै के ऐ? पर मंगलसिंह अपने मनें च सोचदा- उ'आं बपारिएं दे पुत्तरें च इ'यै नेही लालसा होनी जरूर चाहिदी। कमाई दे नमें दरवाजे खोलने दी तांहेग कोई माड़ा लच्छन ते नेईं। आखिर पुत्तर कोदा ऐ? मिम्मी ते आइयै सौ रपे दी नौकरी करियै गै ए कहानी इत्थों तगर पुजाई ऐ। आं कुदरती तौर पर मेरे कोला तेज चलने दी सोचै दा ऐ।"
सेही हुन्दा हा जे दलीप सिंह गी अपनियें इ'नें उचियें लालसाएं गी पूरा करने दा कोई रस्ता ल'ब्बी गेआ हा। दिखदे-दिखदे उसने दो-त्रै लक्ख रुपेआ कमाई लेआ। पर कमाया कुत्थों? कम्म के कीता? ओदे किज अन्तरंग साथी हे। ओ बी दिखदे-दिखदे पैसे आले होई गे। इस गल्ला दी चर्चा देवक दे प्रवाह आंगु ही जो रेतू दे ख'ल्लें-ख'ल्लें चलदी ऐ पर जित्थें बिन्द कुसै खोतरेआ उत्थों गै पानी प्रगट होई जन्दा ऐ। ट्रांसपोर्टरें च किज बड़े संजीदा तजरबेकार बुद्ध लोक बी ऐ हे। उ'न्दा मत्था ठनकेआ। उ'नदे च इक ने आखेआ- "इस चाल्ली न्हैरी गलियें रस्ती जड़ी दौलत औन्दी ऐ ओ घर बसांदी नेईं, बस्से दे जुआड़दी ऐ। ए दलीप कुसै गी गिनती च गै नेईं आनदा। ए लच्छन खरे नेईं। कुत्तै खता खायगा। ओ नेईं होए जे बब्बे दी कमाई बी धनोई जा!" ए लोक समझदे हे जे दलीप सट्टा खेददा ऐ। उस्सै चा इन्ने तौले नेह बारे-न्यारे होन्दे न। दलीप ए सुनदा तां आखदा जलदे-भुखदे न साले। पर केइयें दा ख्याल हा जे दलीप शराब बन्दी आले शहरें च शराब भेजने दा धन्दा करदा ऐ तां गै हफ्ता-हफ्ता भर इत्थों गायब रौहन्दा ऐ। ए सब क्याफे उस दिन झूठे होए जिस दिन लोकें सुनेआ जे पाकिस्तान दे बाडरें कोल, पारै दे अपने साथियें कन्ने लैन-देन करन गेदे दलीप गी बार्डर दे कुसै राखे ने गोली मारियै मारी दित्ता ऐ। जिस दिन ओदी लाश पोस्टमार्टम आस्तै हस्पताल आई ही उस दिन सेही होन्दा हा जि'यां सारा शहर गै हस्पताल दे हाते च आई
किड़ा होआ ऐ। बस, जिन्ने मुंह उन्नियां गल्लां। कोई आखै सपाही दी गोली कन्नै त्रै पाकिस्तानी आदमी मोए हे। उ'न्दियां लाशों ओ लोक कन्नै लेई गे न। इसी छोड़ी गे। कोई आखै 'जित्थै वाक्या होआ ऐ ओ थाहर बार्डर कोला त्रै मील पिच्छें ऐ।' कोई ए बी आखदा सुननेआ जे 'दरअसल इ'न्नें दिनें बार्डर दे कोल सरूत्तें दे बेलें च सूरें दा बड़ा शकार ऐ। उत्थें गेदे, न्हेरे च अपने गै कुसै आदमी दी गोली तपले कन्नै इसी लग्गी गेई ही।'' पर ए गल्लां सुन्नियै इक बडेर नेहा ग्राई आक्खन लगा- "इ'न्दे चा इक बी गल्ल ठीक नेईं। लोक एमें जानी अटकलां लान्दे न। असल गल्ल ए ऐ जे, ए सरदार इस कम्मै च कल्ला नेईं हा। एदी इक बाकायदा टोली ऐ। ए लोक बन्दूकें पस्तौलें कन्नै लैस होइयै उठैं जन्दे हे। बार्डर पारे दे साथिएं कन्नै इस चाल्ली लैन-देन करना कोई खेड थोड़ी ऐ! पर इक ते जुआनी, दुआ पैसा, त्री शराब ते चौथै बन्दूकें-दुनालियें दा गुमान। इ'न्ने सारी दुनिया उसलै पिज्जड़-पाड़े सेही हुन्दी ही। जिसी मरजी ऐ पंगी देन, जिसी मरजी ऐ ढाई लैन। सुनने च ए आया ए जे इ'न्नें लोकें पिछले दिनें बार्डर दे अग्गें-पिच्छें जड़ी जगहें पारें दे साथिएं कन्नै गिनी-मिथी दी ही, उत्थें लैन-देन कीता ते फ्ही शराबा पीयै कुसै दे घर जाई बड़े। उ'न्दी जुआन नूंह-धी दिक्खी तां मखौल कीता। घरै च कल्ला बुड्ढ़ा हा, उसने ल'अड़ दा घुट पीयै ओ सब पद्द्ब जरी लेत्ता। बुड्ढे दा जागत रातीं पैहरे पर कुतै अग्गें-पिच्छें गेदा हा। सवेरे उसने आइयै सारी गल्ल सुनी। उसने बड़े धीरजै कन्नै बब्बे गी दिलासा दित्ता। सबर करने लेई आखेआ पर आपूं गुस्से ते बेसंबरी कन्नै पागल-जन होइयै इ'न्दी सुह लैन्दा रेहा। अज्ज रातीं ए फ्ही बार्डर पर लैन-देन करन गेदे हे। जीप इ'न्दे कन्नै ही। जागतें इ'न्ने गी औन्दे दिक्खी लेआ हा। उसने उ'न्दे औने-जाने दे सस्ते बारै सोच-बचार कीता ते फ्ही अपने ग्रां कोला कोई दो मील पिच्छें इक मोड़ै पर इक पुली दे पिच्छें आइयै छप्पी रेहा। रातीं दे खीरले पैहर इ'न्दी जीप औंदी दिक्खियै उसने कारतूसी बन्दूक साहरी करी लेई। इ'थै जागत जड़ा मोआ ऐ, जीप चला करदा हा। सपाही नै, पुली पर जीपै दे पुजदे गै नशस्त लेइयै गोली चलाई। गोली एदे सिरै गी लग्गी ते खोपड़ी गै डोआरियै लेई गेई। जीप रुकी पर कोई दो-ड्डिड फलांग अगें जाइयै जेल्लै इक बूटे कन्नै ओदी टक्कर लग्गी। बन्दूकां लेइयै दो-त्रै साथी पिच्छें गी दौड़दे आए पर ओ जुआन उसलै तगर उत्थै थोड़ा हा बैठे दा।"
केई दिन शैहरै च इस्सै कत्लै दियां गल्ला हुन्दियां रेहियां। लोग अटकलां लान्दे रेह। पर ए इक सचाई ते टकोदी ही जे सरदार मंगलसिंहा दा इक्कै इक जुआन पुत्तर दलीप कत्ल होई गेआ हा। कत्ल कि'यां होआ, कत्ल करने आले कु'न हे? एदे बारै च लोकें गी इन्ना गै पता हा जे, बब्बे-पुत्तरें, दौं जनें गी पुलिसै नै पगड़ी आन्दा ते उ'न्दे पर कत्लै दा मुकद्दमा चलाया ऐ। ए० डी० एम० दी दालती नै फर्द जुर्म लाइयै उ'न्नेईं सैशन-सपुर्द करी दित्ता ऐ। सरदार मंगलसिंह ने इ'न्नें चों महीने च अपनी पुत्तरै दा बदला लैने आस्तै रुपैया पाणी आंहेगर बगाया। सैशन जजै दी दालती च पैरवी आस्तै उसने दिल्ली दा बस्टर बी नोआया हा जढ़ा आखदे न दौं ड्वाडियें दी बारां हजार रुपे फीस लेई गेआ हा। हुण इ'न्ने दिनें च गै फैसला बी होने आला ऐ। इसकरी सरदार मंगलसिंह ने इस बरें च ए त्री बारी अखंड पाठ रखाया हा। उसी अपने धनै पर, अपने रसूखै पर जड़ी थोड़ी मती बेबसाई होई सकदी ही उस कमी गी पूरा करने आस्तै मंगलसिंहा ने परमात्मा दी मदद लेने दी ए सबील लड़ाई। दालती च सारा मामला तकरीबन साफ हा। इक चीज जड़ी मंगलसिंहा दे वकीलें गी ते सरकारी वकीलें गी परेशान करें करदी ही ओ ही बब्बे-पुत्तरें कल्ले अपने गै उप्पर लेइयै दूए गी बचाने दा जतन। बब्बे-पुत्तरें दोनें दा इकबाली बयान ते दलीप गी कत्ल करने च सारा
जुर्म कल्ले अपने गै उप्पर लेइये दूए गी बचाने दा जतन। बब्बे-पुत्तरै दा इक्कै बयान हा, ‘‘जे ओ उस लाके दा बार्डर स्काऊट ऐ। ए लोक बार्डर पारै दे लोकें कन्नै चोरी-छप्पे लैन-दैन करदे हे। उस दिन बी ए बार्डर दे कोल, सरूंटें च छप्पे दे बैटरी कन्नै पार शरें करदे हे जे में इ'नेंई दिक्खी लेआ। में पोजीशन लेई लेई ते जेल्लें इ'न्ने पाकिस्तानी साथियें दे औने दी छोड़ सुनी तां नेहरे च गै उ'नदे पर इक फायर कीता। मेरी गोली कुसैंई लग्गी नेई पर पाकिस्तानी समगलर नस्सी गे। ताहीं इ'नें लोकें मेरे पर किट्टे दो-त्रै फायर करी दित्ते। में पत्थरें पिच्छें हा मेरी कोई मनशा इ'नदे पर फायर करने दी नेई ही। पर जेल्लें में नेहरे च छड़े अन्दाजे पर गै इ'नदे पासै बन्दूक करियै इक फायर कीता तां ओदे कन्नै मिगी सेही होआ जे ओ सरदार उथें गै ढेई पेआ ए। एदे बाकी साथी पैहलें ते नस्सन लग्गे पही ओदी लाश चुक्कियै लेई गे।’’ बब्बा दा बयान बी इ'यै हा ते पुत्तरै दी बी। पुलसा ने इस बाके गी दुआ गै रंग दित्ता हा। उ'थै जड़ा उस बुड्ढे गराई ने उस दिन हस्पतालै च लोकेंई सुनाया हा। सरकारी बकील ते मंगलसिंहें दे बैरिस्टर ने साबत करने दा जतन कीता जे बकुआ बार्डर कोला चार मील पिच्छें उस बेल्लें दे कोल होएदा ए जित्थें ए लोक शिकार खेडन गेदे हे। घरा कोला एडी दूर आइयै चलदी जीपै च गोली कन्नै आदमी गी मारने दा कम्म बुड्ढे दा नेई होई सकदा। उ'न्दी कोशश ही जे बुड्ढे गा 'बरू पुत्तर गै फांसी चढ़ै।
पुलिसा गी ते मंगलसिंहा गी कामल यकीन हा जे बुड्ढे सपाही दा जुआन जागत फांसी पर चढ़ने कोला किसै चाल्ली बी बची नेई सकदा।
ए त्रिया अखंड-पाठ मंगलसिंहा ने अपने पुत्रा दा बदला लैने आस्तै कीते दे जतनें च रही गेदी कसर पूरी करने आस्तै रखाया हा। उ'आं आखदे न एदे च ओदे बकीलें दा बी बड़ा हत्थ हा। ओ इ'यां जे इ'नें च 'ऊँ महीनां च मंगलसिंह शराब बेसाब पीन लगी पेआ हा। जेल्लै बी जुआन पुत्तरै दा चेता आइयै कालजे गी डंगदा-त्रुम्बदा उसलै शराब गै उसी बिंद सहारा दिंदी। पर, इस उमरी च इनी शराब पीने कन्नै ओदा शरीर बल्लें-बल्लें रोगी होंदा गेआ। डाक्टर उसी शराब पी ने कोला रोकदे हे। उ'न्दी राए ही मंगलसिंह जे इस्सै चाल्ली शराब पीन्दा रेहा तां थोड़े चिरै च गै खट्टै पर पेई जाग, उसी दिलै दी बीमारी होई जाग, फालज होई जाग जां ओदे दिमागै दी कोई नाड़ फटी जाग। पर, मंगलसिंह मजबूर हा। इस करी बी डाक्टरें-बकीलें उसी ए पाठ रखाने दी प्रेरणा दित्ती ही। उ'न्दा ख्याल हा जे दुखी आदमी गी इक आसरा परमेश्वरै दा बी हुन्दा ऐ। मतै ग्रंथ साहब दा पाठ होने दे दिनें ए शराब घटाई देए जां होई सकदा ए पीऐ गै नेई। इक हफ्ता भर बी जे मंगलसिंह इस शराबै कोला दूर रही जा तां फही कुरबा सम्हली गै जा। दुए उ'नेंई भरोसा हा जे गुरुयें दी पवित्र बाणी एदे दुखी कालजै गी जरूर थोड़ी मती शान्ति देग।
सरदार मंगलसिंह दे हमदर्दें गी ए दिक्खियै बड़ी प्रसन्नता बी होई ते हरानगी बी जे सच्चें गै इस बार गुरबाणी ने मंगलसिंहा गी बड़ी आत्मक शान्ति दित्ती। ओ बचारा कमजोरी करी बेही नेई हा सकदा, इसकी बरांडे च भुंजा इक दरी पर लेटे दा गुरबाणी गी बड़ी श्रद्धा कन्नै सुनदा रौहन्दा। बाणी दा इक-इक अक्खर ओदे हिरदे गी छूँहदा जन्दा हा। ओदे कन्न, बस उस बाणी दे बोलें पासै गै लग्गे दे रौहन्दे। बाणी दा कोई-कोई बोल ते किन्ना-किन्ना चिर ओदे कन्नें च ते मनें च गूंजदा रौहन्दा।
औदे कन्नें च बोल पे:-
‘‘मित्रां, दोसत, माल धन, छोड़ि चले पति भाई,