ब्यान मास्टर मुकन्दलाल दा : “में भगवान गी हाजर-नाज़र मन्नियै ठीक-ठीक ब्यान देंग। श्रीमती मोहिनी दे घरै आला बी मास्टर हा। सेही ते होंदा जे ओदी आमदन माकूल ऐ। जी नेईं, उ'न्दे घर मेरा औन-जान नेईं हा। पर मोहल्ले च कदें-कदें कुसै दे होने आले ब्याहें-कारजें पर हरिशंकर मिलदा तां रामसत्त होई जन्दी ही। ओ बचारा बड़ा मिलनसार नेईं हा। झेंपू सुभाऽ दा हा। मोहल्ले च इस गल्लै दी चर्चा होंदी ही जे हरिशंकर बमार रौंहदा ऐ ते मोहिनी ओदी बड़ी सेवा करदी ऐ। जिस दिन हरिशंकर गुजरी गेआ हा उस दिन में कुत्तै बाहर गेदा हा। बापस औने पर मोहल्ले च मोहिनी दी गै चर्चा सुनी। मोहल्ले च लोकेंई इ'थै बड़ी चिंता ही जे इस बेचारी दा गुजारा कि'यां होग? ओदे ज्याणें कि'यां पलंगन ? हरिशंकर दे मरने दी तरीक मिगी चेतै नेईं। मते ब'रे होई गे न।”
“ओदे शायद चार-पंज ज्याणे हे। बड़ा जागत हा जां कुड़ी मिगी पता नेईं।”
“हां, उ'न्नें दि'नें हरिशंकर दे दोस्त राजकुमार दे बारे च बी मोहल्ले च खासे घोर-मसोरे होंदे हे। ओदियां नीलिया अखियां मोहल्ले च बड़ियां मशहूर हियां। लोकें दे बचारे राजकुमार बारै इक्कै जनेह नेईं हे। उसदी गल्ल चलने पर कोई आखदा काना ते कांचरा माहनू बसाह-भरोसे दे काबल नेईं होंदा। ए ऐ कु'न ? इ'न्दा लगदा के ए?'' दूए आखदे 'कोई बी ए, इ'नें जतीमें आस्तै तै परमेसर ऐ जि'न्दा अज्ज कोई सहारा नेईं। मिगी पता नेईं जे राजकुमार कार-रोजगार के करदा हा? अस मास्टर लोक, दूएं बारें धौंथियां धरेड़ना भला नेईं बुज्झदे। ओदे शराब पीने दा बी मिगी पता नेईं। लोकें दा आखना? गल्ल अक्खीं दिक्खी गै करनी चाहिदी। आं, टल्ले राजकुमार शैल लान्दा हा। उस घरै च टल्लै स'ब्बे जने शैल लान्दे हे। मोहिनी बी ते ओदे जागत कुडियां बी।
“में राजकुमार गी मोहल्ले च दिखदा ज़रूर हा, पर कदें ओदे कन्ने मेरी गल्ल-बात नेईं ही होई श्रीमती मोहिनी दे घरै में मोहल्ले दे दूए-लोकें कन्ने गै मातमै दे उ'नें ध्याड़े च इक-दो बारी गेआ हा। घरै दी रहत-बैहत खासी अमीराना सेही होंदी ही।”
“नेईं, इस गल्लै दा मिगी पता नेईं जे हरिशंकर कोल किन्ना पैसा-धेला हा। ओदे थोड़े दिनें बा'द गै सुनेआ जे मोहिनी ज्याणें गी लेइयै कुत्तै चली गई ऐ। इस गल्लै दा मिगी पता नेईं जे राजकुमार उ'न्दे कन्ने गेआ जां कुत्तै होर चली गेआ।
“इस कुड़ी गी में नेईं पछानदा। में मोहिनी दे चार-पंज बच्चे दिक्खे दे ज़रूर न पर उ'न्दी भलेआ पछान मिगी नेईं। श्रीमती मोहिनी गी अपने ज्याणें कन्ने बड़ा प्यार हा। जी ......... जी हां!”
ब्यान राजकुमार दा "मेरा नां राजकुमार ऐ। में एफ०ए० तगर पढ़े दां। नेई में एफ० ए० पास नेई हा कीती। फेल बी नेई हा होआ, में पढ़ाई गै छोड़ी दित्ती ही। मिगी इक रोजगार थ्होई गेआ हा। पढ़ाई च मिगी कई खास रुची नेई ही। मिगी कलकत्ते दी इक फर्में दी अजेंसी थ्होई गेई ही। उस कंपनी दियें बनी दियें दुआइयें दी बिक्री दा कम्म हा।"
"मेरी आमदनी चार-पंच सौ रुपेआ महीना ही। में पंज बरें तगर ए अजेंसी चलांदा रे'आं।"
"नेई बकील साहब, मिगी शिकार खेढने दा शौक नेई हा। शकार खेढने आस्तै ना मेरे अन्दर रुची ही ते ना उन्ना उध्म। मेरे पिता बड़ी कोमल रुचि दे मनुक्ख हे। ओ जोत्सी हे। अस त्रै भराड हे। इक मास्टर होई गेआ, दूआ घरा नस्सी गेआ ते फ्ही ओदा कोई पता नेई लग्गा। नेई, पिता जी, कोई मकान-जैदाद स्हाड़े आस्तै नेई छोड़ो गे। कुत्तै ग्रां च थोड़ी सारी ज़मीन ऐ ही, ओ ना में साम्बन होई ना मेरे लौहके भराऊ नै, जड़ा मास्टर हा। ओ बेचारा अज्ज इत्थें ते कल उत्थें, ते में बी सैलानी सुभाऽ दा हा।"
"हरिशंकर मेरा दोस्त बी था ते उस करोबारै च मेरा भाईवाल बी। मनाफे चा रुपे पिच्छें चौं आने दा ओ भ्याल हा। कागदें-पत्त्तरें पर मेरा गै नां हा। ओ सरकारी नौकर जे हा, इसकी कागदें च ओदा नां नेई हा। श्रीमती मोहिनी दा नां, होई सकदा हा जां नेई, में किश आखी नेई सकदा, पर दर-असल इस गल्लै दी उस बेल्लै लोड़ गै नेई ही पेई? श्रीमती मोहिनी गी बी इस गल्लै दा पता हा। घरा च हर महीनें सौ, सवा सौ रुपें दी ओपरी आमदन ओदे कोला छप्पी कि 'यां रही सकदी ही? भाएं में ए पैसे मोहिनी गी नेई हरिशंकर गी गै दिन्दा हा।"
"हरिशंकर दा ए दूआ ब्याह हा, इस करी दोनें दी उमरी च फर्क होना कुदरती हा। पर जिसी मैनै दा मेल आखदे न उसी दिक्खियै ए कोई बे-मेल नेई हा। मोहिनी ते हरिशंकर दी घृस्ती शैल चलै करदी ही। शैल चलने च इस सौ, सवा सौ रुपें दा किन्ना हत्थ हा ए में के आखी सकदां? गल्ल ए ऐ जे पैसे बगैर कोई बी गाड़ी नेई चलदी। इस कारोबारी हिस्सेदारी दा मुनाफा ओदा हक हा। में समझनां ए ओदी समझदारी बी ही। जी, ओ बीमार रोंहदा हा। डाक्टर आखदे हे जे ओदे मेदे च अलसर ऐ, कन्नै इक गुर्दे च बी खराबी ऐ। इस हालती च मोहिनी ने हरिशंकर गी जड़ा प्यार दित्ता, ओदी जड़ी सेवा कीती ओदे बिना ओ शायद ब्याह दे बाद दस बरें उस चाल्ली दी सुखी घृस्ती च नेई कट्टा।"
"बमारी दे खीरले महीनें च मोहिनी ने हरि दी दारी ते सेवा च उस्सै चाल्ली दी चौकसी ते फर्ज-शनासी दा सबूत दित्ता जड़ी कि समझदार सुन्दर नर्स अपने चाजैं च आदे रोगी दी सेवा च दिन्दी ऐ। हरि इक बारी खट्टै पर पेई गेआ तां फ्ही ओदे आस्तै उठना मुश्कल होई गेआ। ओदी जिन्दू दी ताकत बल्लें-बल्लें खीण होंदी जा करदी ही। मोहिनी उसी जीवादान देने आस्तै, कदै टानक बनियै ते कदै पानी दी गर्म बोतल बनियै सम्हल्दी रही। ओदे चौन्नें पासे घनोए दे दुआस बाताबरनै च कदै फुल्लें दा गुलदस्ता बनियै ते कदै शीतल प्रकाश देने आले दीए दी जोत बनियै बाशना ते रोशनी बरह्ांदी रही ही।"
"में ए नेईं आखेआ बकील साहब जे मोहिनी ते हरी च कुसै चाल्ली दा बनावटी प्यार हा जनेहा इक नरसै गी कुसै मरीज कन्ने होंदा ऐ। में ते ओदी चौकस सेवादारी दी मसाल दित्ती ऐ।"
"हां, इस गल्ला कोई बी इन्कार की'यां करग, जे मोहिनी ते हरिशंकर, इक बड़ी बेमेल जोड़ी ही। ब्याह दे मौके हरिशंकर दी उमर चाली कोला उप्पर होनी ऐ। मोहिनी ओदे मरने दे दस्सैं ब'रें बाद बी अजें तियें ब'रें दी नेईं ही होई। एदे च के शक ऐ साहब, मेरे आस्तै बी एह इक बड़ी नोखी घटना ही। नारी दे बलिदानें दी ओदी निस्वार्थ सेवा-भावना दी बड़ी कठिन परीक्षा ही। खीरले त्रै महीनें ते हरिशंकर दे प्राण पचाने आस्तै मोहिनी दा तड़फना दिक्खियै अचंभा लगदा हा। मिगी चाहंदा हा जे हरिशंकर बची जा, पर डाक्टरें ओदे बारे च जे किश आख़ी दित्ता हा, उसी चेतै करियै अ'ऊं विधाता दा ए करूर नाटक बड़ी मजबूरी च दिक्खै करदा हा।
"उ'नें दिनें मोहिनी च में किश कमाल तबदीली दिक्खी। हरिशंकर दी बीमारी दे दिनें च पहलें ए अपने खाने-लाने दा सारा शौंक जि'यां भुल्ली-बिस्सरी गेई ही पर चानचक्क इसने ओ पहलें आला अपना बनाव-सिंगार फही शुरु कर दित्ता। मिगी एदी पहेली उदासी ते जिन्दू दी बे-सम्हाल दिक्खियै मनै च डरडा-झकदा हा। मोहिनी दी उस उदासी गी में हरिशंकर आस्तै बी खतरनाक समझदा हा। बीमार आदमी दी कोमल भावना पर ओदा बुरा असर पौने दा डर हा। पर मिगी ए दिक्खियै बड़ा धिक्का लग्गा जे एदा ओ बनाव-सिंगार उस बीमार कोलै जरना औखा होई गेआ। मोहिनी ने हरि दी ठंडी होंदी जा करदी देहू दे अन्धरा अपने रूपै दे ताऽ कन्ने, जड़ी गर्मी पैदा करने दा जतन कीता ओदे कन्ने हरिशंकर दा उ'थै हाल होन लगा जडा इक तिड़के दे सुन्दर मलैम चीनी मरतबानै दा होजे जे ओदे च घड़ी-घड़ी गरम पानी पाया जा। इक दिन हरिशंकर ने मिगी आखेआ, "राज, मोहिनी गी में नेईं समझी सकेआ। दसें बरें दे इस जीवनै च में जि'यां इक बल्लोरी शीशे चा केह्युं-रंगे दे झलकारे निकलदे दिक्खे न। ए रंग केईं बारी खिल्लरे दे सेही होंदे न तो केईं बारी, जदू ए किट्टे होई जन्दे न तां इक सुन्दर-इन्दर-धनख बनी जन्दा ऐ। मोहिनी दा ए रूप-शलैपा बी उस्सै चाल्ली दा इक बल्लोरी शीशा ऐ। राज, मिगी पत्ता ऐ जे मोहिनी अपने ब्याह पर खुश नेईं ही। ए सब ओदी मर्जी दे खिलाफ हुआ हा। ब्याह दे बा'द, इस्सै करी ए ना कदै प्योके गेई ते ना इसने प्योके दे कुसै अपने-पराए गी अपने घर औन दित्ता। इस्सै करी मेरी इस बीमारी च बी उं'दे चा कोई कदें नेईं आया। में हमेशा एदा ए चमकदा मिलकदा रूप दिक्खियै सं'गदा रेहां। शुरु दे दो ब'रें ते मेरे कन्ने बी इसने इक-रमी बोलचाल मातर गै रक्खी ही। उ'नें दिनें इस घुस्ती च अस दमें इ'यां र'वै करदे हे जि'यां रेलगड्डी दे इक कम्पार्टमेंट च, इक्कै पासे दा सफ़र करने आले दो ओपरे मसाफ़र होन! पर एदी उस बेरुखी गी दूर कीता मेरे हिरखै दी मौन साधना ने। स्हाड़े ए ज्यांणें इस गल्ल दी निशानी न। ते हुन जेल्लें जरूरत इस गल्लै दी ऐ जे मिगी बल्लें-बल्लें इस रोगै दी कैदू चा मुक्त होन दित्ता जा, राज, मिगी पत्ता ऐ जे डाक्टर भल्ला के आख़ी गेदा ऐ, पर मोहिनी मिगी शान्ति कन्ने मरन बी नेईं देए करदी। मेरी इस रोगी देहू कन्ने उसी ए नमां ओपरा हिरख ही जागी पेआ ऐ? ओदे रूपै दे इस में बनाव-सिंगारें दी इस गर्मी च मेरी ए लिस्सी देह झलसोए करदी ऐ। ओ इस सुआही दे ढेरें चा जि'यां बचे-खुचे दे डारे फरोली-फरोली तुप्पी कढदी ऐ ते उ'नेंईं फूकां मारी-मारियै तेज करदी ऐ ते फही इक्कै बारी लो देइयै इं'झई बुज्झदे ते ठंडे होंदे दिखदी ऐ। इक-इक डारा ओ इस चाल्ली की बाला-स्हाला करदी ऐ? ओ मेरे कोल आइयै बौन्दी ऐ तां औं सहमी जनां, फही बल्लें-बल्लें मेरी इस ठंडी देहू पर सरकंडे उ'ब्बरी औन्दे न।"
मेरी बासना दी सपकंजै च बी जि'यां हलचल होन लगी पौन्दी ऐ। मिगी अपनीयें अखियें चा उसलै इक ताऽ जन निकलदा सेही होन लगदा ऐ। पही ए जेल्लै उठियै चली जन्दी ऐ तां मिगी सेही होन लगदा ऐ जे मेरी जिंद पत्ती ठंडी होन लग पेई ऐ। ए गर्मी, ए सर्दी, एदा के भेद ऐ राज ? ए कनेहा प्यार ऐ ? ए कनेहा रिश्ता ऐ ? में कदै-कदै सोचनां, ए शायद, इ'नें आखरी खिनें च बी मेरे कन्ने इस बे-मर्जी दे ब्याह दा गै तिल-तिल करियै बदला लै करदी ऐ। ते जे एदा प्यार सच्चा ऐ तां ए नारी कु'न केड़े सुर्गें दी अप्सरा ऐ जड़ी इस दुक्खें भरोची धरती पर आई भुल्ली ऐ?
“ हरिशंकर मरी गेआ जज साहब। उसलै मिगी इ'यां सेही होआ जे इस बिपदा दे मौके हरि दे टब्बरे गी बेसहारा छोड़ियै चली जाना, इक नीचता होग। ए कोडे स्ताऐ रौहंगन ? मेरी जगह कोई होर होंदा तां ओ बी शायद इ'यां गै सोचदा। मेरी गैरत, मेरी आदमीयत दे सामनै जड़ै प्रश्न-चि'न हे उ'नदे कला हरियै नस्सी जाना सखल्ला नेईं हा।
“मेरा कारोबार घटी गेदा हा। हरि दी बीमारी दे दिनें च गै, रौहरा च कम्पनी ने दो होर अजैंट मुकर्रर करी दित्ते हे।
“उस बेल्लै में मोहिनी गी पुच्छेआ हा जे उसने अग्गें आस्तै के सोचेआ ऐ? मिगी भलेआं याद ऐ जे इसने आखेआ हा, “इस रौहरा च में हुन इक दिन बी रौहना नेईं चाहन्दी। में उस बेल्लै एदा इ'यै मतलब समझेआ हा जे मोहिनी ने इस औखी घड़ी च मिगी गै अपना सहारा समझेआ ऐ।
“इस गल्लै दे थोड़े दिनें बा'द अस देहरादुन चली गे। इ'नें दसतें बरें च अस पति-पत्नी दे रूपै च गै रौह आं। देहरादुन पुज्जने दे थोड़े चिरै च गै मोहिनी दी कुड़ी मंजू टाइफाइड कन्ने मरी गेई। बड्डे जागत अप्पू गी में इक पब्लिक स्कूलें च दाखिल कराया पर ओ पढ़ने-लिखने च कमजोर हा। इस स्कूलै दा वातावरण उसी रास नेईं आया। ओ उथों नस्सी आया। मिगी ओदी ए लापरवाही पसन्द नेईं आई। में उसी इस गल्लै पर नराज़ होआ। ओ जिद्दी हा, पही आवारा बी होई गेआ हा। इक दिन ओ घरा नस्सी गेआ। मोहिनी समझदी ही जे उसी में नसाया ऐ। बस उस्सै दिनै थमां मोहिनी दे ते मेरे सरबन्ध बिगड़ने गे। उस बेल्लै एदी गोदै च इ'यै कुड़ी ही।
“एह कुड़ी मेरी ते मोहिनी दी ऐ। मेरा डाऽवा ऐ जे एदे पर मेरा हक ऐ। ए मिगी मिलनी चाह्दी। मोहिनी कोल रेहियै ना एदी ठीक चाली दी परवरिश होई सकदी ऐ ते ना पढ़ाई-लिखाई। ए बी होई सकदा ऐ जे एदा जिद्दी स्वातम इस कोमल जीवें कन्ने बी उस्सै चाल्ली बेहरम सलूक करै जि'यां इसने अपने सक्के रिशतेदारें कन्ने कीता ऐ। देहरादुन छोड़ियै आए दे असेंईं त्रै म्हीने होई गे न। इत्थें औन थमां पैहलें गै असें ए फैसला करी लेआ हा जे उस दमें हुन किट्टे नेईं रौहगे, पर ए कुड़ी कोड़े कोल रौहग एदे बारे च सहाड़े च कोई समझोता नेईं होई सकेआ हा। अज्ज मोहिनी दे सामनै अपने जीवन-निबाह दी जड़ी बिकट समस्था ऐ उसी दिखदे होई इस कुड़ी दा एदे कोल रौहना होर बी ना-मनासय ऐ।
“में समझनां जे ए अपनी मजबूरी करी जां ते इसी कुश्वा कुत्तै पैसे लेइयै देई देग जां एदा कोई ऐसा बेमेल सरबंध करग जेदे करी एदा अपना जीवन-निबाह चलदा र'वै। जज साहब, मोह-ममता हिरख-प्यार ए सब कोमल भावनां उत्थें गै रही सकदियां न जित्थें माहनू दियां बुनियादी जरूरतं पूरियां होई सकन। गरीबी, तंगदस्ती ते फाकें दी ज्वाला च ए कोमल औंकर कलमाई जन्दे न। में इ'नें दसें बरें च मोहिनी गी किसै चाल्ली दी तंगी महसूस नेईं होन दित्ती।
इसने अज्जै तगर मेहनत-मजूरी करने दी गल्ल सोची बी नेईं। ए अपने पोकियें कोल बी नेईं जाई सकदी। ऐसी हालती च इस मसूस लड़की गी एदे कोल रौहन देना कुत्थों तगर मनासब होग ? इस करी मेरी प्रार्थना ऐ जे ए लड़की मेरी ऐ, अदालत इसी एदे कोला मिगी दोआई देए।”
× × ×