अजें सूरज भलेआं धारें दे पिच्छें नेईं हा ओआ जे खौरगली नां दे ग्रां च इक हलचल होई ते मर्द-जनानियां, जागत स’ब्बै घरें च बाहर निकलियै दिक्खन लग्गे। बदलू सूबेदार ते सोमां ने बी उस पास्सै दिक्खेआ। जनानियें च खुसर-पुसर होन लग्गी:
“ए ते उ’यै जनेही ऐ! त्रै ब’रे होए, बदलू दे घरा नस्सी ही।”
“ऊंह, ए उ’यै नेही कुत्थै ऐ? नस्सने थमां पैहले ए इन्नी भरी-भरोची दी कुत्थें ही?”
“उ’आं बी कुड़े हुन चलाक सेही हुन्दी ऐ। दिक्खो हां एदी टोर। ऐ उसी कुत्तै डर जे सूबेदारै ने हुन एदे हडु भनने न।”
“हडु की भनने न एदे? ए ओदे बब्बै दा हानी। इस मोए गी शरम नेईं आई इस धिऊ गी मुल्लें लैन्दे?”
“गोहाड़ दिक्खेआं बुआ, एदा इस नीले रेशमी सूटै च।”
“कुड़े, त्रै ब’रे खबरें कुत्थें-कुत्थें खज्जल होई आई ऐ। इस रेशमी टल्लें दा लालच गै ते नैंदा ऐ इ’नें इत्थों।”
“ना जानकी, सुत्थन लाए दे इसी जड़ा गुहाड़ औन्दा हा, इस सलवारी च कुत्थें ऐ?” इक बुड्डी ठकरेयानी बोली, “बदलू ने ऐमें जानी जिद पिट्टी ऐ। इस बिजली गी उसने कुत्थें साम्बन होना ऐ! ए उस बेल्लै नस्सी गई ही, जिसले इसने दिक्खे दा किश नेईं हा, हुन ते उ’नें नग्गरें दा सौ कबत्तपुना दिक्खी-सिक्खी आई ऐ। अपने आस्तै ए, ऐमें जानी, साड़ स्हेंड़ेआ ऐ बदलू ने। उसी पीड़ ऐ अपने रुपें दी, पर सोमां हुन ओदे बसै दा रोग नेईं। दिक्खी लैआं, इसी भाएं मारग-कुट्टग, पर रातीं सनोना ओदे कोला बी नेईं। दिन-रात इस्सै दा पैहरा होई जाना ऐ।”
बदलू सूबेदार सोमां गी आखर लेई गै आया। ओ खसाली दा बसदा-रसदा ठौकर हा। फौजी पलटनी च सूबेदारी करियै पिनशनी आए दा। सोमां ओदा सारा मान-मल्हाजा मित्ती च रलाइयै त्रै ब’रे होए इस्सै लाके दे ठकरेटे भीमू कन्नै नस्सी गई ही। बदलू गी सेही होन लगा हा जि’यां ओदियें नाड़ियें च इस बेजती दा ज़ैहर घुली घुलियै ओदी रत्तू च रलै करदा ऐ। इ’नें त्रैं ब’रें च उसने बड़ी गै भंडी दा जीवन दिक्खेआ हा। पलटनी चा पिनशनी होइयै आया हा तां के-के सोचदा हा। ब्याही दी पैहली जनानी गी मोए दे पंज-सत्त ब’रै होई गे हे। ओदे चा कोई जागत ज्याणा नेईं हा। औतरे मरियै भूत बनने दा डर ते ऐ गै हा, अपने थेह ते अपने बुजर्गें दा नां बचाने दी लालसा ओदे थमां बी मती ही। तां 7-8 सौ रुपैया खर्च करियै नमें सिरेआ उसने घृस्त बनाने-चलाने दा ए प्रबन्ध कीता हा। पर दरअसल ओदा कोला इक भुल्ल होई गई ही। उसने अपनी उमरी दा
ख्याल नईं हा कीता ते सोमां दी सूरत दिखियै ललचोई गेआ हा। ओदे च ही जुआन ते शलैपे दी बिजली ते एदी ढलदी बरेस! हिरण पगड़ियै आंदा हा पर, दौं दिनें च गै ओ फही नस्सी गेआ।
सोमां गी बदलू दै आए दे हुन अट्ठ-दस दिन होन लग्गे हे, पर ओ हरान ही जे उसने उसी ना गाल दित्ती, ना निक्खेरआ, ना मारेआ। उसने सोचेआ-जुआनी भुल्लन हारी हुन्दी ऐ। पर बदलू दी उमरी ने दुनिया-दिक्खी दी ऐ। इससे करी खबरें ओदे च इन्ना धीरज ते शान्ति ऐ। पर बदलू दी चुप्पी दा भेत्त तौले गै खु'ल्ली गेआ। सोमां झिक्का दा आई ही तां निर्मल-नरोई ही पर हफ्ते-दस्सैं दिनें च गै उसी सही होन लगा जे ओदी भुक्ख घटदी जा करदी ऐ। बदलू दे घर पुज्जियै उसने दो डंग गै रोटी नेईं ही खाड्डी तां भुक्खै कन्ने ओदियां आंदरां जलन लगियां हियां। उसने बाड़ी जाइयै चोरी-चोरी कच्चियां नाखां खाइयै पानी पीता हा। सारी रात उसी निक्की-निक्की ढिड्डु पीड होंदी रही ही। फही हफ्ता-दस दिन उसने आपूं पकाई ही ते आपूं खादी ही। घरै च तुन्दाला बी ऐ हा। पर हुन ए के होन लगा ऐ? ओदे कालजे पर जि'यां कुसै ने कोह पत्थर रक्खी दित्ता हा! ए ओदियें लत्तैं के होआ करदा ऐ? पिन्नियें च हर बेल्लै पीड़ा कन्ने लऊं-लऊं हुन्दा रौहन्दा ऐ। अजै तगर कदै उसी खं'ग-जुकाम बी नेईं हा होआ ते हुन ए सिरपीड़ जन्दी गै नेईं! चादरी दा लड़ ओ कस्सियै मत्थे पर ब'न्नी रक्खदी। हफ्ता-दस दिन उसने इस हालती कन्ने मुकाबला कीता, पर उसी सही होन लगा जे ओदी ताकत बल्लै-बल्लै घटदी जा करदी ऐ। ओदा रंग भुस्सा हुन्दा जा करदा ऐ। ओ बेही जन्दी ऐ तां उट्ठनेईं मन नेईं करदा। ओदा मत्था ठनकेआ। उसी शक होआ दे बदलू ने ओदे कन्ने बदला लैने आस्तै उसी किश खलाई उडेआ। "के खलाया होग?" ओ सोचन लग्गी। जड़ियां? जां कोई नेहा जहर, जेहड़ा बल्लै-बल्लै असर करदा ऐ? हुन ओ लचार होइयै खट्टे पर पेई गेई ही। बदलू ने ओदी खट्ट, ओदी मर्जी कन्ने, बेहड़े आली बक्खी पसरै च डुहाई दित्ती ही। बदलू दिनें च दो-त्रै बारी ओदा हाल पुच्छी लैन्दा पर कन्ने गै मुसकराई उठदा। औंदे-जन्दे ओ उसी कुढदे-कि'ल्लदे, तड़पदे-छड़कदे दिखदा ते मुंडी ल्हान्दा-ल्हान्दा अन्दरै गी जन्दा उठी। सोमां गी चेतै आया बापू ने एदे हत्थ मिगी बेचदे बेल्लै ओ गल्ल इसी सुनाई ही जे पारले नाले दा भीमू तांही आइयै एदे कन्ने मिलदा रौहन्दा ऐ। बदलू ने सुनिथै बड़ मारी ही- "मेरा नां बदलू ऐ बदलू! ए बिजली हुन इस बदलै दी कैद चा कुतै च नेईं जान लग्गी।" कुसै लै आदमी अपने बित्तै थमां बढ़ बढ़ की मारदा ऐ? इसने मिगी ब'न्नियै रक्खना हा? सोमां गी उस हालती च बी बिन्द सारा हासा आई गेआ।
बदलू दे घरे दा सुन्नापन सोमां दे औने कन्ने दूर के होना हा, ओ सगुआं होर बघेआ। घरै च बदलू हा ते ओदे दो कामे। जेल्लै सोमां खट्टा पर पेई गेई तां रोटी पकाने दा कम्म फही आई पेआ चतरू पर। चतरू इस घरा दा पराना नौकर हा। बदलू सूबेदारै दा गै हानी-सानी। इसने आखदे न, बदलू गी समझाया हा जे, "लालच नेईं कर। कोइ रंड-विधवा लेई आ। खानदान चलदे न भागें कन्ने सूबेदारा, कधा पर गै लद्द चुक्कन चाहिदी।" पर बदलू गी इक तै पैसे दा गुमान हा, दूआ सूबेदारी दा घमंड। अंगै च बढ़ापा आई बड़े दा हा, पर उसी टपला हा जे फौजी औहदेदार कदै बुड्ढा नईं होंदा। चतरू गी सोमां कन्ने हमदर्दी ही। ओ हुन बी उसी निर्दोष समझदा हा। पहाड़ी जीवने दा मैहरम जे ए हा। ओ सबेरे-संज्या सोमां गी खाने दा बारे च पुच्छी जन्दा। उसी समझांदा जे ग्राह् नेईं छोड़ेआं। दुद्द गै थोड़ा-थोड़ा पी लै कर। पर सोमां आखदी, "तातो, भुक्ख गै
नेईं। पता नेईं नेहा के रोग आई बड़ेआ ऐ मेरी नरोई जिन्दू च ! पर तातो, इक गल्ल पुच्छां, बदलू गी मेरा पता कि 'यां लग्गा ?" चतरू ने इक मुट्ठी नेही गाल कुड्डी मत्थे गुज्जरें गी। "उस्सै बेटी ............ दा बेड़ा गर्क गेआ हा! तुगी ओ नगर दिक्खी आया हा कुतै। इत्थें आइयै लगा सूबेदारै आखन, "ए तैं के नुहार बनाई सूबेदार! भाई तुम हिन्दू लोक जनानियों का बड़ा गै बसोस बुजते ओ। पर, थारी सोमां दा पता औं दिन्नां!" 'ए नुहाडा बेड़ा गर्क गेआ हा। नेईं तां सूबेदार होई रेहदा हा सीतल। सिहली दी अग्ग उस्स बुड्ढे चौखरा ने फेही फूंकां देइयै सलगाई ही। जतीम जनानी कन्ने बदला लैने च के बहादरी ऐ धिए! पर खबरै, तु 'म्मी कुतै पिछलै जन्में दे के पाप हे कीते दे जे नेह कसाइयै दे बस पेई ! बदलू के ऐ ते तेरा बब्ब, ओ शराबी त्रलोकू के हा। एदे कोल पैसा हा, ते उसी पैसे दी लोड़ ही। बल लग्गी गेई तेरी धिए! अच्छा, अ'ऊ बाड़ी दा लकड़ियां लेई आमां। अज्ज सूबेदार कुशवा पारले चौथिरियें दै होए गेदा।"
चतरू ने ड्योढी टप्पी ते उदूं दरा बदलू दी खं 'ग सनोची। सोमां ने खट्टा पर पासा परती लेआ ते सामने कन्धा पर दिक्खन लग्गी पेई। ओ नेईं ही चाहन्दी जे सूबेदार ओदियें अक्खियें च अथरूं दिक्खी लै। कन्धा पर खबरै कदूं दा मकोल फिरे दा हा। कन्धा दी उस चिट्टी पर मैली चादरी पर ओदी नज़र इ 'यां खु 'ब्बी गेई जे उसी ओ सच्चे गै बाऊ दे फनाकें कन्ने हल्लदी ते सर-सर करदी चादर गै सेही होन लग्गी। सोमां सोचा करदी ही- "त्रों बरें च गै, के दा के होई गेआ ऐ! पर ए सब होआ की ?"
"सोमां अकल कर, ए घर-घृस्ती साम्ब। रानी बनियै रौह। ए के भेस बनाए दा ए तूं ?" बदलू ने समझाया हा।
"तेरा घर-घृस्त साम्बां? तूं, मेरे बब्बै दा हानी, औं तेरी धी नेईं? गाईं सकनां एं चन्न मेरे कन्ने? बजाई सकनां एं उ 'थै नेही बांसरी? मेरी जिन्दू दा मुल्ल देइयै लेई आयां एं तां मिगी कामा बनाइयै रक्ख, पर ए निं कुसै गी आखेंआ जे सोमां बदलू दी श्रीमत ऐ। इ 'नें कोठें गी अग्ग फूकियै आपूं बी उस्सै चल जली मरंग।" ते फेही बदलू ने सोटी कन्ने उसी किन्ना मारेआ हा। सारी जिन्दू पर नील गै नील पेई गे हे। नसदी नेईं तां के करदी? एदे च कसूर कोदा हा? मेरा? सामनै कंधा पर उसी अपनी गै तस्वीर ल 'ब्बन लग्गी। बौल्ली दै कोल दबबड़ी च बकरियां ते गवां चारदे, खाखें पर हत्थ रक्खियै, 'चन्न' ते 'कुंजू' गांदी सोमां दी तस्वीर। ओदे कन्ने च बांसरी दे मिट्टे सुर गुंजन लग्गे। भीमू दा के कसूर हा? इ 'थै जे ओ ग 'बरू जुआन हा, सुन्हाकड़ा हा, बांसरी बजान्दा हा? पार धारा दा चलिए मिगी मिलन औंदा हा? ओ गरीब, इसलै खबरै कुत्थै ऐ ठोकरां खा दा? इस कदूं अपने इ 'नें धारें-जाड़ें गी छोड़ियै झिक्का, इस कपटी लाके च जाना चाहन्दे हे? पर अस करदे के? होर चारा बी के हा?"
उसने दिक्खेआ, कंधा पर दो किरलियां आमने-सामनै आइयै रुकी गेइयां। इक रंग-बरंगी, चंचल, सुन्हाकड़ी पक्खर (तितली) आइयै कंधा कोल, कदें कंधा थमां छिंडै जाइयै मलाके मारन लग्गी। हे मेरिये माए! कनेही शैल ऐ ए पक्खर! पर ए फुल्लें गी छोड़ियै इत्थें के लैन आई ऐ? इक किरली ने दिखदे-दिखदे उसी मूंहां च फगड़ी लेआ। पक्खर बहेतरी तड़फी पर बल्लें-बल्लें किरली ने उसी नींगली लेआ। उसी चेतै आया ओ दिन, जदू ओ इस ग्रां च बिकी ही। इक
बक्खी आ ओदा शराबी बाबल त्रलोकु ते दूई बक्खी हा बदलू सूबेदार। कनेहा ब्याह होआ हा। ओ उस त्रकालें, जेल्लै बदलू दे कन्ने आए दे लाके दे पटवारी, चौकीदार, पन्त ते शाह दे बंगेरा कोई अपना-पराया उत्थें नेईं हा। मेरे सवाए उसल्लै उत्थें होर जनानी बी कोई नेईं ही। बदलू सूबेदारै ने प्याजी रेशमी तल्ले आन्दे दे हे मेरे आसतै, जेड़े उसने मेरे बब्बे दे हत्थ मिग्गी भेजे हे। कदैं में ओ लाई लैन्दी तां मेरे च ते इस पक्खरै बिन्द बी फर्क नेईं हा रौहना। पर उसने ओ तल्ले छंड करायै सुट्टे हे ते बापू गी आखेआ हा, “किन्ने रपे मेरा सौदा कीता ऐ बापू? इ'नें रपें कन्ने किन्ने चिर तेरी शराब चलग? पैसें दा गै लालच हा तां बी मिग्गी पुच्छी ते लैना हा बापू? इन्ने सारे रपे कुशबा भीमू बचारा बी कुत्तें दा चाढ़ी-चुक्कियै आनी दिन्दा। ए सूबेदार तेरा हानी-सानी ऐ बापू! धिऊ दा मुल्ल करदे ना तुसें ईं लज्जा आई, ना उसी शर्म आई। रपे लेइयै तूं 'दा धरम ते खत्म होई रेहा बापू, पर मेरा?” सोमां ने चादरी दी चूका कन्ने अपनियां अक्खियां पुंझियां ते पासा परती लेआ। कंधा पासै लेटेदे जि’यां ओदा साह रुकन लगा हा।
x x x
दपैरीं चतरू ने सूबेदार गी आखेआ, “सोमां दी हालत दिन-ब-दिन खराब हुन्दी जा करदी ऐ। तुसें कुसै गी दस्सना हा इसी। जे तुसें इसगी झिक्का दे उस गन्दै चा कुड्डी आन्दा ऐ तां एदी कोई दारू-कारी करो। हुन एदियें बदसीसें कन्ने की अपना परलोक बी बिगाड़ना ऐ, सूबेदार!”
“एदियें बदसीसें कन्ने मेरे कोकड़े जागत मरी जाने न चतरू? ए एडी सती-सवित्तरी कुत्थों शराप ते बदसीसां देने आली? ए ते इस्सै दे अपने पापें दा फल ऐ चतरू! तूं मेरे पर शक करना ऐं?” बदलू मुस्कराया। “अच्छा जा, झारी च तमाकू पाई आन। तु'म्मी ते करना ऐं फांडे-फूंडे, तुंएं 'किश उपाऽ करी दिक्ख।”
तोआई सोमां, अपने ख्यालें दे फं'गें उप्पर उडडी-उडडी उस्सा बौली दे कंडे जाई पुज्जी।
“सोमां! किन्ना जादू ऐं तेरे इस शैलपे च! तुईं दिक्खी-दिक्खियै रज्ज गै नेईं होन्दा।” सोमां गी अपनी खाखें ते अक्खीं कोल तत्ते-तत्ते सगन्धी आले साहु सेही होए। उसने अपनी छाती पर हत्थ रक्खेआ। कालजा बड़े ज़ोरें धड़कै दा हा। बौली दे निरमल पानी दे शीशे च उसी अपनी सूरत ल’ब्बी। किन्ने चिर ओ उसी दिखदी रही। परमेसरा! कैसी दित्ता हा इन्ना शैलपा तूं मिग्गी?''
गासा पर बदल जोरें कन्ना गरजेआ। “शुकर ऐ!” सोमां ने आखेआ, “ब’री जायां, मेरियें धारें देआ बदला! मत बिन्द ठंड पवै मेरे धुखदै कालजै। बिजली कड़की। सोमां खुश होई, “ज़रूर ब’रग” उस दिन बी किन्ने ज़ोरे दा ब’रेआ हा। भीमू ते ओ इक खोड़ै दे बूटे ख’ल्ल जाई खड़ेते हे, तड़पिन्न होए दे।
“सारी दुनिया स्वाड़ी बैरन होई गेई ऐ सोमां। ए बदली बी।” ‘‘'नेईं ए गल्ल नेईं। ए झड़ी नेईं हुंदी तां असें नस्सना कि'यां हा? इस्सै दी छत्तर-छाया च मज़े कन्ने जा करने आं। स’ब्बै अपनै-अपनै दड़े दे न। कुसै दिक्खना नेईं, कुसै मिलना नेईं। ए, ए सब इ'नें बदलें दी बड़ी मेहरबानी ऐ, चन जी।”
ख्यालें दी ए तन्द इत्थें गै त्रुट्टी गेई। ते फही दों ब'रें दी खज्जल-खुआरी दियां मूरतां लगियां ओदे मनै दी अक्खीं अग्रें औन। इ'नें त्रौं ब'रें च, ब'रा भर भीमू कन्ने कांगड़ै, पालमपुर ते फही
मनाली जाइये मैहनत-मजूरी करिये कट्टदे दे दिनें दा चेता अजें बी मिट्ठा लगदा हा। पर एदे बा'द दो ब'रे इस जे निस नरके च कट्टे हे, उ'न्दा चेता करिये ओदी देह कम्बी गेई। ओ डरौने मुंह, डरौनिया मुच्छां, शराबै दी मुश्क, सिगरेट-बीड़ियें दा धुं ते गालियां - हे राम ! ओ कनेहा नरक हा ! सोमां ने मुंड झुनकियै चेतें दे इस मकड़ी-जालै चा छुड़कने दा जतन कीता। इक धिक्का-जन लग्गा ते उसने दिक्खेआ, ठेकेदार उसी बांह दा फगड़ियै सहारा देये करदा ऐ। "सोमां दिक्खियै चल, ठेडे की खन्नी?" नमां मालक ! इल्लें, काएं ते बाजें थमां डरी दी चिड़ी गी ओ पिंजरा शुरु-शुरु च बड़े (अ)रामै दा थाहर सेही होआ हा। पर ठेकेदार बी बदलू दी गी उमरी दा हा, जड़ा हर हफ्ते अपनी मुच्छें ते कनपटियें कोल बालें गी काला रंगदा हा। सोमां गी आदमी दिएं इ'नें कमजोरियें पर हासा आई गेआ। ठेकेदार दी जनानी जीन्दी ही, पुत्तर बी ऐ हे। पर पुत्तर बब्बे कोला बक्ख होई गेदे हे। मां पुत्तरै कन्ने रौहन्दी ही। सोमां सोचदी भीमू बचारा खबरें कुत्थें होग? ठेकादारै ने उसी किन्ने गै रेशमी सूट स्याई दित्ते हे। ओ, पता नेई ओदे रेशमी टल्लें पर निक्की नेई बोतली चा के दवा लान्दा हा- जे सारा दिन उसी अपने टल्लें चा मिट्ठी-मिट्ठी मुश्क औंदी रौहन्दी ही। थोड़े दिनें पेरैंत उसी ए मुश्क बुरी सेही होन लगी है। ए नकली पज्ज कैसी? भीमू आखदा हुन्दा हा- "सोमा तेरी जिन्दू चा फुल्लें दा खुशबू औंदी ऐ। ओ खुशबू कनेही ही? ओ कुत्थें चली गेई?"
"के डौल ऐ तेरी?" बदलू ने पुच्छेआ।
सोमा ने जवाब नेई दित्ता।
"अज्ज फही बदल गरजै करदा ऐ। बिजली मिलकै करदी ऐ।"
सोमां समझी गेई, बदलू रमज मारा करदा ऐ, जे भीमू ते ओ जिस दिन नस्से हे उस दिन बी इ'थै जनेह बदल हे ! "आहो, ऐ हे- फगड़ी लैना हा ना तूं !" ओदे मुहां चा ए बोल निकलदे-निकलदे रही गे। उसी चेता आया, जिस दिन ओ भीमू कन्ने नस्सी ही उस दिन रस्ते च इक बारी बिजली इन्ने जोरै मिलकी ही जे ओ डरियै भीमू कन्ने चम्बड़ी गेई ही। "तुम्मी बिजली कोला घट ते नेई मोइए ! तूं एदे कोला की डरनी ऐं? तूं बिजली एं तां मेरा कालजा, मेरा ए प्यार इस्सै बदली आंहर सरल-निर्मल ते पबित्तर ऐ। तां तूं एदे च समाई दी ऐं।"
"खट्ट अन्दर कराई देआं।" बदलू ने तरस खादड़ा।
"ना इत्थै गै ठीक ऐ। ठंडी व्हार दा फनाका ते औंदा ऐ।"
बदलू पसारी दे कन्ने आले कमरे च बेहियै दनाली लगा साफ करन। खबरें के सोचियै उसने गड़ाका लाया ते आखन लगा- "अम्बरा पर ए खेड दिक्खै करनी सोमां? बदलै गी कि 'यां ए कढती बिजली तड़फा करदी ऐ! ओ बचारा सौ-सौ बास्ते पा करदा ऐ, रोआ करदा ऐ, जैं-जैं करै करदा ऐ। पिच्छें नस्सा करदा ऐ पर ओ हुनै ताहीं मिलकदी ऐ, खिनै च उत्त नुक्कैरा। "पगड़ हां मिगी, कि 'यां पगड़ना ऐं?" ते ओ साला कि 'यां चथौड़ होए दा खुशामदां करै करदा ऐ? जि 'यां एदे बगैर जीन गै नेई होना। बदलू ने बदलै गी इक होर गाल दित्ती- "सालेआ! म्हाड़े कोला आइयै सिक्खी जा- आ तुग्गी दस्सां मिलकदी बिजली गी कि 'यां काबू करदे न?"
सोमां ने दरवाजे दी दोआठनी पर बैठे दे बदलू गी दिक्खेआ ते ओदी ए गल्ल सुनियै ओ चुप्प नेईं रही सकी।
“तुसें टपला ए, सूबेदार जी! तुसें बिज्ज बचारी गी सप्प समझी लैता ए। मिलकदी बिजली गी उ'नें बदलें के ब'नना ए, जि'दे अंदर रस गै नेईं रहदा। बिजली हवाऊ च ते नेईं मिलकी सूबेदार जी, बदलें दे कालजें च मिलकदी ए, उत्थें कलोलां करदी ए। ओ ते उस कालजे गी तुपदी ऐ जित्थें ओ समी सकै। ओदी जलदी-बलदी आत्मा गी ठंड पेई जा। होर कोई थाहर ऐ दुनिया दा जड़ा इस अम्बरे दी बिजली गो थ'म्मी लै ? कुत्तै इसी पौंदे नेईं ना दिक्खेआ तुसें!” सोमां इन्नियां गल्लां करियै हफी-जन गई। पर उसी खुशी होई जे उस ने जवाब शैल दित्ता ए। बदलू रोह्रै कन्ने उड़ियै अन्दर चली गेआ ते पसारी आले भित्त बेड़ी उड़े। सोमां ने समझी लेआ जे बदलू गी झमानी आई गेई ए। हून उस ने दो घंटे भर सौना ए। कोई नौकर बी घर नेईं हा। ना चतरू ना दूआ। ते बदलें च ताहीं कुसै ने ना औना हा, ना जाना। बदल बड़े ज़ोरे दा ब'रा करदा हा। कदें बदल गरजदे फही बिजली मिलकदी। ओ खट्टै पर उड़ियै बेही गेई। इ'थै दिन हा जिस दिन ओ सूबेदार दी दुनाली दी शरीकणी चा निकली गेई ही। उस दिन बी इक तांह्ंग उसी इक नमां संसार दस्सै करदी ही। अज्ज फही उ'थै नेहा दिन आई गेआ ए। अज्ज फही इक आस उसी आले मारै करदी ए। “निकल इस कैद चा! भन्न इस पिंजरे गी। अजें तेरे पं'घें च बिन्द ज़ोर ए ते कल ए बी नेईं रौहना। फही तूं आले मारने न, खुशामदां करनियां, पर ए बदल नेईं औन्ने, नेहा मौका नेईं धोना। अपने अन्दरै दी जुआन सोमां गी इस गली-सड़ी दी लाशें कोला छुड़का। कुत्थें ओ सुच्ची प्रीतै दे गीत, कुत्थें ए चौहरे पैहरा दी घुटन ते कैद!”
“सोमां! ए दीया खिन-खिन मद्दम हुन्दा जा करदा ऐ। अजें एदी लोई च तूं उत्थों तगर पुज्जी सकनी ऐं। में जे तेरे कन्ने आं। नमें सवेरे, नमियां भाखां, नमें शैलैपे, नमियां जुआनियां सब किश तुगी बलगै करदा ऐ। इस नरकै चा निकलने दा इ'थै मौका ई। हिरखै दे सुरग सजाने आस्तै इ'थै मंगल घड़ी ऐ सोमां! उठु निकल, चल, चल इत्थों निकली चल!”
सोमां सचै गै उट्ठी खड़ोती, पर तौले उठुने करी ओदी अक्खीं अग्रे न्हेरी आई गेई। उसने थ'म्मी दा सहारा लेआ। दो खिन बसांS करियै ओ न्हेरा हटी गेआ तां उस ने बेड़ै पेदी इक सोटी चुक्की लेई ते ओदे सहारै बल्लें-बल्लें बाहरा गी चली पेई। बदल होर जोरा दा होई गेआ। इक्कै खिनै च ओदे तल्ले तरपिन होई गे। इ'यां गै जि'यां उस दिन होए हे। उसी ठंड- जन पेई गई। मन हौला होई गेआ। रस्ते च चिक्कड़ होई गेदा हा। अग्रे चार पौड़ियां बी ढलणियां हियां। ओ उस ने बेतियै ढलियां ते अगें फरलांग भर रस्ता होर चलना हा। जित्थें ओ जाने गी निकली ही, उस थाहरै गी पचोआड़ें बी रस्ता जन्दा हा। उद्दरा कोल बी ए हा, पर आड़ी दे कन्ने-कन्ने रस्ता इना तंग हा जे उसी आह नेईं पेई। ए रस्ता ठीक ए। इस रस्तै चलियै उत्थें पुज्जी ते जांग ना। उसी इक ओपरी खुशी-जन सेही होई। ओदा मन कीता जे जोरें-जोरें कोई भाख ला-‘चन्नै दी’ पर हाय, छात्ती च जोर नेईं हा रहदा। गिल्ली चादर गले च लपटोई दी बिन्द तंग करन लगी तां उसने उसी तोआरियै सुट्टी दित्ता। रस्ते च इक नाडू आया, उसने दो घुट पानी पी लेआ। त्रेह बी लग्गी दी ही।
ने नाड़ू दा ठंडा पानी लेइयै औंगलियें कन्ने अक्खियें च लाया। ठंड पेई गेई। फ्ही अग्गें चली। ओ सामनै ल'ब्बा करदा हा, ओ दन्दा, जित्थें उसने जाना हा।
× × ×
चतरू घाऽ दी लद्द चुक्के दे जेल्लै घर परतोआ तां उसी रस्ते सोमां दी चादर पेदी ल'ब्बी। दे झूट्टे कन्ने चादर उसने चुक्की लेई ते घावरे दा तौला-तौला घरै गी आया। दिक्खेआ पसार ई खाली ही। उसने सुबेदारै गी आला दित्ता, भित्त व्होरेआ।
“कु'न ऐ?” सुबेदारै बिन्द रौह्रै कन्ने पुच्छेआ।
“औं आं चतरू, पर सुबेदारनी पसारी च नेईं ऐ। ए चादर खबरै ख'ल्ल उस खुम्बे च कि'यां ई पेदी ही?”
बदलू दा मत्था ठनकेआ। घावरे दा ओ पसारी च आया। खट्ट खाली ही।
“चतरू! सोमां गेई, सोमां गेई दन्दे पर। आ मेरे कन्ने।”
इन्ना आखियै बदलू नंगे सिर, नंगे पैरें, बिना लोई-फड़की लैते बाहरा गी होआ। “के खेआ तूं। ए चादर कुत्थें ल'ब्बी?”
“चतरू! तां सोमां गेई। गेई उस्सै दन्दे परा छाल देने गी जित्थें परसू दी भैन मंगी छाल देइयै ई ही। ओ कु'न ऐ बै? हे राम! ओ ते उप्परले कुप्पड़ा पर जाई खड़ीती दी ऐ। पर उत्थें ए चढ़ी 'यां ऐ?”
आले दिन्दा ऐ- “सोमां! सोमां!”
“इत्थें मेरे कोल पुज्जने दा हठ नेईं करेंआं सूबेदारा! तुं'दे इत्थें पुज्जने थमां पैहलें अं'ऊ दस री छाल मारी सकनी आं।”
“सोमां, मिगी माफ करी दे। ए दिक्ख इस उमरी च हत्थ जोड़ियै तेरे कोला माफी मंगना मां! मेरे सिर ए हत्या नेईं ला, मेरे पर कयास कर। त्रलोकू दे थेह इ'नें बरखें च ढेई गे न। मेरे ले बी ढेई-गली जाने न, पर मिगी ए सजा नेईं दे। अ'ऊं अपना कसूर मननां सोमां-औं अपना पूर मननां।”
बड़े जोरै कन्ने बिजली कड़की। इ'यां सेही होआ जे उप्पर गै पेई गेई ऐ। सूबेदार डरियै ती गेआ। उसने दम्मै हत्थ अक्खीं पर रक्खी ले। दूए खिन उसने अक्ख पुट्टी तां छड़ा काला मड़, दैन्त-जन खड़ौता दा ल'ब्बा।