टपला

मेरै हिस्सै सुख नेईं आया,
तेरै हिस्सै दुख नेईं आया,

    नाज खलाड़े तक में आनां,
    अग्गें उसगी तूं लेई जाना,
            तू आखें ए सहाब बरोबर,
            अ'ऊं आखां कोई टपला भाई !

तेरे बागे रंग ते हासे,
मेरे बागे रुक्ख प्यासे,
तेरै गित्तै ब्हार-सुगातां,
मेरै गित्तै पतझड़-रातां !
तू आखें ए सहाब बरोबर,
अ'ऊं आखां कोई टपला भाई !

जोवन तेरा, मस्ती तेरी,
झूरे मेरे, पस्ती मेरी,
तेरी दुनिया लोऽ लश्कारे,
मेरी दुनिया न्हेरे काले!
तू आखें ए सहाब बरोबर,
अ'ऊं आखां कोई टपला भाई !

सुखने शैल खयाली तेरे,
परसे नित्त सोआली मेरे,
हौले फुल्ल ए खिन तेरे न,
पर्वत भारे दिन मेरे न,
तू आखें ए सहाब बरोबर,
अ'ऊं आखां कोई टपला भाई ! ✧