समें ने समें गी नसाया ते ऐ,
समें ने समें गी जगाया ते ऐ,
लचारी दे न्हेरे घने हे बड़े,
ए दीआ समें ने सजाया ते ऐ।
सुहाने सुरें दी ए सरगम सुनो,
गीतें दी सुर-लै ए सूखम, सुनो
ए शारे सुनैहरे सुहामें बड़े
कुसै भगवानै दे नैनें पढ़े,
जि'नें सार गीतें दी जानी लेई,
उ'नें जीने-मरने दी ठानी लेई।
बगावत सखांदी ऐ गीतें दी लै,
ए बागी बनांदी ऐ गीतें दी लै।
बगावत पराने रवाजें थमां,
बगावत बजीरें ते राजें थमां,
बगावत गरीबी दी हारें थमां
बगावत धनै दियें मारें थमां।
बगावत लचारी दे झूरें थमां,
बगावत घमंडा दे डूरें थमां,
बगावत इ'नें नंग-फाकें थमां,
बगावत चरस्तें दे डाकें थमां,
बगावत कताबें दे लारें थमां,
बगावत नसीबें दी कारें थमां।
बगावत दा बेला टली ए निं जा,
समां ए सुहामां चली गै निं जा! ✧