राजे दे हुकमैं बज्झा दा कोई औखी म्हीमें चढ़ेआ हा,
साथी हे बहादर देसै दे, तां दूरै जाइयै लड़ेआ हा।
जोरावर सच्चा नां उसदा, गेई पिच्छें मजल चलांदा हा,
जि'नें रस्तें म्हीमां नेन्दा हा, उ'नें रस्तें पहाड़ नोआंदा हा।
जोरावर पूजे जन्दे हे, ओ समां हा जुद्ध-लड़ाइयें दा,
रत्तू ने खड़ग रज्ञाने गी रौहन्दा हा जोर चढ़ाइये दा।
जोरा आले कमजोर शा जोरा दी ईन मनांदे हे,
किज मरदे-मिटदे रोंदे हे, किज मारू भाखां लांदे हे।
जोरावर जोरा आला हा, पर समें दे शारें बज्झा हा,
जुग मांग नभाने खातर गै, बनियै जरनैल ओ सज्जा हा।
बन्ने भारत दी सीमा दे रूसा-चीना ने मेले हे,
पर रत्त नमानी डु'ल्ली ही, निरमम जुद्धे दे बेले हे।
दुएं दे दीए सहालो नेईं, अपने दीए कदें बलदे नेईं,
ऐसा विश्वास समें दा हा, विश्वास समें दे टलदे नेईं।
इतिहास गवाइयां दिन्दा ऐ, जितें इच्छ हार बी रौहन्दी ऐ,
इक दूआ पक्ख बी ऐ इसदा, केईं बारी सोच ए औन्दी ऐ।
कोई जोरावर जे इ'यां गै, घर सहाड़े फूंकी जाली जा,
इज्जत, गैरत जे लुट्टी जा, सहाड़ी खुशियें गी स़हाली जा।
अनखिड़ियाँ कलियां मिंधी जा, ते फुल्ल खिड़े दे पुट्टी जा,
हिरखा दे गीत खलारी जा, आसा दे मोती लुट्टी जा।
तां, तां पही साथी के होए ! जोरावर किन्ना चु'ब्बै ओ ?
कोई उसदा नां जे लै आइयै, कियां चित्ता बिच खु'ब्बै ओ ?
बहादर हा सहाड़े गित्तै, पर दुएं गित्तै शैतान हा ओ,
सहाड़े गित्तै बलवान हा ओ, दुएं गित्तै शमशान हा ओ।
दो रूप न उसदी कहानी दे, इक हसदा ऐ, इक रोंदा ऐ,
तांहू उसकी पूजा हुन्दी ऐ, तुआंहू उसगी कोई कोहंदा ऐ।
✧
समझदी ऐ दुनिया जे मरना कठन ऐ,
मिगी कोई पुच्छै जा जीना ऐ मुशकल।
फट्ने गी उ'आं जा अम्बर फटी,
कलि दा कलेजा बी सीना ऐ मुश्कल॥ ✧