उस बैतल माह्नू दा हासा, उस बैतल माह्नू दी मस्ती,
घर-बार लटायै बी थोए, तां बी ओ चीज़ बड़ी सस्ती।
कोई लगन ब्यापी अक्खीं च, तन-मन उसदै बस होआ ऐ,
हर ठोकर ताल बनाई लैन्दा, ऐसा मन जिसगी थोआ ऐ।
गासा दे नीलें हासे दी, लै जिसदे बिच समाई दी,
धरती दी ममता दी बेदन, जिसने छात्ती ने लाई दी।
उस बैतल माह्नू दा हासा
उस बैतल माह्नू दी मस्ती!
जिसदी बेहोशी दी गोदा, सब होश सम्हाले-बसदे न,
अनजाने रस्ते सुत्ते दे, जिसदी गैं पौन्दे हसदे न।
सब तान्ने-मीहने हिरखा दे, जि'दे हासें कोला हारे न,
सब तीर सुआके तरकें दे, जिस फुल्लें आंगू स्हारे न।
उस बैतल माह्नू दा हासा
उस बैतल माह्नू दी मस्ती!
कोई भामें उसगी हसदा ऐ, कोई मूर्ख दिखदे खं'गदा ऐ। ,
मस्ती दे रंग रंगाआ दा, ना खिंझदा ऐ ना संगदा ऐ।
ममता जि'दे रस्ते दिखदी ऐ, सुख आले देइयै सददे न,
ओ रुकदा नेईं, ओ मुड़दा नेईं, जिदे पैर नरन्तर बधदे न।
उस बैतल माह्नू दा हासा, उस बैतल माह्नू दी मस्ती,
घर-बार लटाइयै बी थ्होऐ, तां बी ओ चीज बड़ी सस्ती। ✧