दिन बी लीकर, लौहकी नेही,
रात बी लीकर, लौहकी नेही,
हर चाल्ली दा जीवन लीकर
हफ्ते-महीने-साल ते दहाके
सृष्टि दी ए बुनतर सारी लीकर-लीकर।
रंग-बरंगी रेखाएं दी खेड सुहामी।
समें दा ए कोई सुखम जैन्तर
छेड़ निं करदा, नां गै ल'बदा,
आप-मुहारा लीकर-लीकर खिचदा जंदा!
सृष्टि दे इस 'कैनवस' उप्पर रेखाएं दी खेड ओपरी!
बनदी लीकर म्हीसदी लीकर,
सौ लीकर, साधारण लीकर
इक लीकर कोई ऐसी बनदी,
जिसदे अन्दर किरणें दी ऐ अजर-अमर मुस्कान चमकदी।
तां ओ लीकर म्हीसदी नेइयौ,
डलकां मारै, चमकै लिशकै
न्हेरे दी घेरें गी चु'ब्बौ!
गांधी, गालिब ते गुरु नानक
जि'न्दी फही परचोल होई ऐ
उस्सै चाल्ली दियां उज्ज्ल निरमल लकीरां सुन्दर।
दिख्खै करने
दिक्खी-दिक्खी नज़र निं रजदी
सोच सुरकदी -
अपने जीवन दी इस लीकर अन्दर बी
जे गांधी दी निडर सचाई
नानक दी ओ मानव-ममता
ग़ालिब दी गज़लै दा जोवन -
कोई रिशम बनी आई जन्दी
अपने जीवन दी ए लीकर लेख नमानी
इक खिन गै, भाएं अद्ध खिन गै
चमकी जन्दी, हंसी जन्दी
ते पही भाएं मौती दे इस न्हरे अन्दर
डुब्बी जन्दी!
(1969)
✧
जि'नें ज़िन्दगी समझी कलियें दा हासा,
कुत्तै कंडे ल'ब्बे, रन्हाके होई गे।
जड़े हसदे आए हे दूए प म्हेशां,
ओ रोए तां लोकें तमाशे होई गे। ✧