किन्ने सच्चे लोक हे ओ, किन्ने सुच्चे लोक हे ओ,
किन्ने भोले लोक हे ओ, किन्ने उच्चे लोक हे ओ!
ओ लोक हे ऐसी मिट्टी दे
सुन्ने कोला जो भारी ही
बचना दे पक्के माह्नू हे
ईना इच बझ्झी नारी ही।
सिद्धा दा जीवन, सरल बड़ा, ओ लोक प्रभु दे प्यारे हे,
जीवन दे घेरे लोहके हे, पर जीने च लशकारे हे।
ए अपना ऐ, ओ बखला ऐ, ए भेद-भरम नेईं भाखे हे,
माह्नू कन्ने हा हिरख उ'नें ओह् माह्नू बड़े सुजाखे हे।
जीने दी हवस ही इन्नी गै
जे कम्म कोई शुभ कीता जा।
सेवा दिया बत्ता चलेआ जा,
पर स्वारथ-अमरत पीता जा।
मरने शा ओ नेईं डरदे हे, मौती अग्गें नेईं झुकदे हे,
जे मरना गै पेई जन्दा हा, ना सं'गदे हे ना रुकदे हे,
गीता दा मर्म समझेदे हे, जे मरियै जीवन मुकदा नेईं,
जीवन ए ऐसा झरना ऐ जो मौती कन्ने सुकदा नेईं।
ओ झरने मिट्ठे पानी दे,
तरेहाएं दे ओ सहारे हे ।
बलिदानी जीवन उ'न्दे हे,
ओ तां धरती दे प्यारे हे ।
ओ फुल्लें आगूं हौले हे ओ पर्वत उच्चे भारे हे,
तां उ'न्दे मन्दर सोभै दे, तां होए जै-जैकारे हे ।
ते अस बी आं पूजक उ'न्दे, जीने दी जाच भुलाई बैठे,
मौती शा किन्ने डरने आं, जीने दा मुल्ल गुआई बैठे ।
ओ त्यागी हे, अस लोभी आं, ओ सच्चे हे, अस झूठे आं,
ओ सिद्धे हे, अस दम्बी आं, ओ सुच्चे हे अस जूठे आं ।
[ 'बाबा अम्बो' जयन्ती, 1969 ]
✧
कोई ज़िन्दगी निं मौती शा बचदी,
मती लम्मी होई जा तां कहानी निं जचदी ।
कदें गै कुतै औंदी नेही ज़िन्दगानी,
जुगें तोड़ी चलदी अमर जिसदी कहानी । ✧