बरगद

मगध देस दा राजा हा इक
नन्द नाम हा,
धन-सैना दा मान बड़ा हा,
इक दिन भोजन करियै राजा
चूटी करदे-करदे उसदै
कु'न जानें, के मनै च आया,
सैहबन गै ओ हस्सी पेआ ।
कोल खड़ोती दी इक दासी
हत्थ धुआ करदी ही उसदे,
मुंह लगदी ही राजे दी ओ ।
राजे गी ओ हसदा दिक्खी
खिड़-खिड़ करियै हस्सी पेई;
इकदम राजा,
ओ महाराजा,
धन-सैना दा मानी राजा,

लाल होई गेआ, रोहै कन्ने,
पुच्छन लग्गा—'की हस्सी तूं?'
"जिस करियै सरकार हे हस्से।"
"अस की हस्से?"
ठीक जवाब दित्ता नेईं, तां
सूली कल्ल चढ़ी जागी तूं।
शकटार नां दा इक मंत्री हा
दुर्गै अन्दर सुट्टे दा हा जिसगी राजै,
दासी उसदे कोल चली गई,
रुट्टी देन ओ जंदी गै ही-
मन्त्री ने ओ रस्सी छहूती, जानी लैत्ता,
दासी ए अज्ज दुखी बड़ी ऐ।
"किस दुक्खै अज्ज घेरी लैत्ता,
अज्ज तूं हस्सी-बोली की नेईं?"
दासी ने सब गल्ल सुनाई: ते पही बोली:
"जिन्द मेरी हुन बचदी नेईं ऐ"
"बचदी की नेईं?
समझी गेआं, राजा गी की हासा आया?
मैहलें अन्दर
बोहड़ी दा ओ रुक्ख बड़ा ऐ,
बड़ा पराना, बड़ा झौंगरा
थाहर घमां-भर मल्ले दा ऐ,
अज्जकल मोसम गु'ल्लें दा ऐ।
इक गु'ल्लै अन्दर होन्दे, लक्खां जहारां बीऽ बोहड़ी दे,
सरेआं दे दानें शा लौहके,
इक-इक बीऐ अन्दर रौहन्दा,
बोहड़ी दा इक रुक्ख दबोआ।
चरज बड़ा ऐ!
इ'थै चरज-चबात सोचियै
राजा हा ओ हस्सी पेआ।
जा हुन तैंकी कोई निं खंदा।"
दुर्गै दे उस न्हेरे अन्दर इक गड़ाका

सरेआं दे दानें शा लौहके,
इक-इक बीऐ अन्दर के ऐ ?
बोहुड़ी दा ओ बुट्टा, बरगद ।
किन्ने बींऽ पर बरगद बनदे ?
अनगिनती ए जमदे-मरदे ।
कोई-कोई पर बरगद बनदा ।
बीज अनेकां धरती उप्पर ,
अनगिनती ए जमदे-मरदे ।
जीव प्राणी इस दुनिया च,
कोई -कोई गै गांधी बनदा। ✧