जुलाई दा हा दूआ पक्ख-सौन म्हीना,
संज्या दे छे बजे धुप्प किन्नी तेज ऐ !
नमीं ऐ नकोर, जि'यां हून गै ए खोल्ली ऐ !
इन्नां नमां पन एदा, इन्नी ए सनेहर एदी !
सजरी जोआन्नी आंगु तेज बी ते तत्ती बी।
ते घंटा भर पैहले- ओ अम्बरा दा समां हा -
घटा कालियें दा झुंड-हाथियें दा झुंड जि'यां,
बिज्ज लश्कारे जि'यां दंदें दा भलेखा हा !
बारी-बारी, बल्लें-बल्लें
मस्ती, गम्भीरता दी गर्जें दी बरोसरी,
ओपरा संगीत हा !
इकदम फही चुपचाप-जन छाई गेई
मुट्ठी-मुट्ठी बूंद, त्रिप-त्रिप करी पौन लगी
अम्बरा दे हिरखी स्नेह मिले धरती गी !
सैल्ली-सैल्ली खब्बली च सर-सर होन लगा-
हिरखै दा परता हा, रोम-रोम नच्चै दा !
लगी गेई झड़ी फही
धरती गी गासा ने कलावे इच लेई लेआ !
इक-मिक होई गे !
कैसे ओ खिन हे !
कमरे च बैठे-बैठे
तन-मन मेरा बी हां सिज्जेआ फुहारें ने
अक्खियें च रीहग-जन खिनें अनबिस्सरें दी झूली गेई लोआरें च ।
पक्के अंगने च खल्ल,
नंगे मुंगे गि'ल्लुएं दे आले पर सुन्ने
जागतें गी न्हौने लेई नीन्दरे सनोची गे !
दो घंटे बा'द ए धुप ए किन्नी तेज ऐ !
गिल्ले पत्तरें दे कि'यां गलें आई मिली ऐ !
बिजली दी तारें पर मोतियें दी रीहग-जन
बून्दें दी ओ झालर ही
लेई गेआ कोई जि'यां उसी ऐ तोआरियै !
बेहड़े इच तुलसी दा पौदा इक उ'आं गै-
चुपचाप, हसदा ना कून्दा जड़ा !
की ऐ दोआसी इन्नी !
ते मिगी चेतै आवै दा
पुच्छेआ हा मिगी कल मेरे इक साथी ने
1944 थमां चुप टुरे दे ओ तुस, दस्सो,
हुट्टी ते निं गे अजें ?
थक्की ते निं गे तुस ? ✧
[1970]