इक कतल ?

[ स्व० नरेन्द्र खजूरिया दी पैहली पुन तिथि 28-4-1971 ]

बड़ी हमदर्दिया कन्ने कुसै ने अथरूं पुंजे,
अति हेज्जलपुने कन्ने कुसै किस्से केई छेड़े -
जुलम होआ बड़ा भारी कैहर होआ !
बड़ा गै नातकी गम हा, बड़ा बेहिस्स मातम ऐ,
हरारत नेईं दुसदी, बड़ा सीतल स्वातम ऐ ।
जड़ा पानी दी छात्ती पर कुतै कोई जखम हुन्दा ऐ

उसी तुस बुलबुला आखो !
कत्ल होआ जड़ा सगमी, उसी तुस हादसा आखो !

बड़े न्हेरे ए रस्ते हे,
कुसै दी भाख जे गूंजी तां पर्वत उसदे नेईं होए,
ए रस्ते उसदे नेईं होए,
उ'दी भाखें दी लोड लैयै सफर बिन्द सैहल सेही होआ,
भरोसे दी चमक आई।

ते उस 'भाखा' गी तुस यारो, ए तुस बेजांयका आखो !
कत्ल होआ जड़ा सगमी, उसी तुस हादसा आखो !

मिगी पुछदे न उसदे ओ नमाने बे-समझ ज्यांणें
गला रुकदा ऐ रोह्रै नै,
कमल पत्ती दे ओंहगारे अक्ख सिप्पी-जन बनी जन्दी

मिगी पुछदे न कुत्थें ऐ ? ओ कुत्थें ऐ?
ए 'र रचना' आखदी की ऐ जे हुन पित्ती ने नेईं औना ?
ओ कुत्थें गे ? ओ कुत्थें न? कढूं औना ? कढूं औना ?

में के आखां ?
उं'दा कातल कुसी आखां ?

उसी अज्ज कहानीकारै दा अभागा बादशा-आखो !
कत्ल होआ जड़ा सगमी, उसी तुस हादसा आखो !

कलम उसदी जे ए इन्नी नेईं हुन्दी कदैं पैनी,
उ'दी चर्चा नेईं हुन्दी !
ओदे दोखी नेईं हुन्दे !

की उसने जैहर ए पीता?
की लिखियां कहानियां उसने ?
जमाने दे जबर-जुलमें दा पर्दा-फाश की कीता ?
इ'नें पहाड़े दी बेबसिया दे न्हेरे चूर की कीते?
उ'दे चित्तै च इन्ना ज़ौहर पीने दी समर्थ ऐ ही ?
उ'दा ओ कुंड अम्मत दा-जे सुकदा नेईं तां के हुन्दा !
ए अमत गै केईं रूपें च उसदी साधना बनेआ,
कुतै ममता, कुतै हासा, कुतै पैन्नी तनज़ं, करुणा,
कुतै भाशा नरोई,
नक्श जिससे फुल्ल-कलियां न,
लचक ते लोच लाफानी, चमक गीतें नरोएं दी

कुत्तै चिड़ें-दयारें दी सुरीली सरगमी सां-सां
ते उस भाशा गी तुस निन्दी उसी बेज़ायका आखो!
कतल होआ जड़ा सगमी-उसी तुस हासदा आखो
ते सरकारी शफाखाने दे उस 'वाडें' अन्दर
जि 'दी कहानी! ज़बाखाने कुला बदतर जि 'दी कहानी!
ओ त्रिया बेडु जेदे पर
तड़पदे चार दिन कट्टे
कहानी दी जुआन्नी ने
इ 'नें 'हाड़ें दी मैहरम उस निडर-बेखौफ़ कान्नी ने,
इ 'नें धारें दी ममता ने
गरीबी मुफ़लसी दे उस निडर जोगी-दरेसै ने,
जवां डुग्गर दे सैनिक ने
धनी कलमा दे उस मर्दे-मुजाहिद ने
ते मुजरम कातलें बक्खी कोई आँगल चकोई नेईं,
ओ ढाई (25) ऐपरेल, सत्तर (70) गी जेड़ा कैहर होआ हा
उसी कैहदी सज़ा आखो?
कतल होआ जड़ा सगमी-उसी तुस हादसा आखो!

                                  ✧
   पहाड़ें दे कोल खड़ोते दे, किंगरें दी सेध निं सुझदी ऐ,
   कंडे पर बेहियै सागर दी थाह के ऐ? अक्ख निं बुझदी ऐ,
   जदूं मौत गै पड़दे चुक्की लै तां रूप नज़र औन्दा असली,
   माह्नू दी हांब, चरज लगदा, ऐ किन्ने दूरें पुजदी ऐ! ✧

                      **म्हाड़ा इतिहास**

   म्हाड़ा ते इतिहास भरोचा, लोकें दे इ 'नें गीतें च,
   म्हाड़ा ते इतिहास समाया कोमल सुच्ची प्रीतें च,
   म्हाड़ा ते इतिहास कुसै ने, ना चुनेआ, ना लिखेआ ऐ,
   ए इतिहास ते खिल्लरे दा ऐ किज गरमी, किज सीतें च।
   जो इतिहास असेंगी थोआ, म्हाड़ी गल्ल ओ करदा नेईं,
   म्हाड़ी कत्थ सुनन्दा नेईं ए सुनियै डूहरा भरदा नेईं।
   ए रत्तू-खुशबूएं न्हाता, पलेआ नाच ते मुजरें च,
   मैहलें दा ए मैहरम, म्हाड़ी गैहली पैर बी धरदा नेईं।

इक कत्थ राजें दी ही, कत्थ ओकी मुक्की गेई,
ओपरी ही टाली जि’यां, धुप्प लग्गी सुक्की गेई,
डोगरें दी क्हानी, ए ते बड़ी लम्मी कहानी ऐ,
त’वी, अंजी, ब्यासा ते चनांS ने सुनानी ऐ॥

    x       x       x

कोई आखदा ओ सुनैहरी समां हा,
कोई आखदा ओ जैहरी समां हा,
सदी स्हाड़ै गित्तै ओ लम्मी बड़ी ही,
समे दे फ़रिश्ते दी ओ इक घड़ी ही ॥ ✧

                            [1969]