हादसा

रस्ते टपदे बुड्ढा कोई
इक ट्रकै जिल्ही दित्ता!
बे-बारस ओ लोथ ऐ पेदी,
अजें तगर निं कोई आया
छुट्टी होई, हसदे-नचदे
बाल-ज्याणे, अपनै-अपनै खिंडदे जन्दे।

बड़ा सुन्हाका जागत ज्याणा;
घरै दे कोलें सिड़क टपदे गी
टैक्सी आई, जि'ल्ली गेई
इक घरै इच अम्बर फटेआ-नेहरा होआ !
सबर करो, बस सबर करो।
इक्कै मैंतर फुरदा सारें

x     x     x

कलम गुआची गेई कुसै दी,
कुसै दी ऐनक भज्जी गेई ऐ
कोई लिखदा पर लिखी निं पान्दा,
भाव-छुआले गंडा पेइयां,
साध-साधना गुंगी होई गेई !
जड़ सुश्टि दा मैहरम मोआ,
मूक बेदना दा कोई ताही आपूं गुंगी बेदन बनेआ !
ए हादसा स'बनें कोला-बड़ा भयानक !

✧