प्रश्न

की चलदे ए ऐसे रस्तै?
की पीन्दे ए मोहरा जानी?
ए रस्ता अग्गी दे लोरे,
इस रस्ते सौ नाग-फुंफकारां !
ए रस्ता अग्गी दे लोरे,
ए रस्ता बस तेज कटारां,
ए रस्ता ते मौत-हुलारे
ए रस्ता ऐ मकदे डारे
ए जुआड़ गुंगे डडलें दी
बिस्सले कंडें दी ए बस्ती
स्वार्थ दी लू्हें दा मारू लम्मा रस्ता
सुन्ना रस्ता!
ए सेवा दा रस्ता औखा,
चोर-लटेरे पोटै-पोटै
गत्त घनेरे कोहकू-कोहकू
ए सच्च दी डगर कबल्ली।

ओ रस्ता, दुनिया दा रस्ता
भीड़ बड़ी ऐ
पनछान कुसै नई,
नजर कुसै दी टिकै कुत्तै नई
अपना-अपना चारा तुप्पन
आड़ीं भन्नी, हाटें दे मन्सूबे रुज्झे।
इस बेफौन्दे रौले अन्दर
इन्ना सूखम गीत ए लेड़यै
की चलदे
फही चलदे कल्ले?
भाखां लाइयै
आले मारी
पोटें कन्ने कंडे सोतन,
ए गांदे, मुस्कान्दे मत्तू
अनथक्क गै चलदे जन्दे
ए निं डरदे रुत्तें कोला,
ए हिरखै दे दीए बाली
चलदे जोतां साम्बी-साम्बी
जित्थै न्हेरी-झक्खड़ सुंकन!
की चलदे?
फही ए चलदे?
दास कबीरे, तेग बहादुर
दयानन्द, लूथर मनसूरे
ईसा, बुद्ध ते मीरां, गांधी?
जित्तो, डीडो, दाता रणपत? ✧