ए बनजारा, आप-मुहारा
डगर-डगर ते गौहली-गौहली
के तुपदा ऐ ?
लोक नमें, ए बड़ा पुराना,
इक जुगै दा फर्क मझाटै
जित्थें जन्दा ऐ बनजारा
भीड़ इसी ऐ घेरी लैन्दी।
✕ ✕ ✕
ओ हो ! ए ओ जुआन हा !
ए गास बी हरान हा
पठान ऐ ओपरा
जवान इसदी ओपरी
लबास एदा मुफलसी
- सुरगी चश्मा।
नज़र इ 'दी ए चमकदी
ए प्यार दी सुगात लेइयै आया हा गली-गली !
गम्भीर मेघ-गर्जना, झुकदी ही गली-गली
करो बगावतां, उठो, अज़ादियें दे बारसो !
बदेसियें दी कैद दा ए गैरतां छुड़ाई लौ !
(लय बदलदी ऐ)
ए उ 'थै ऐ? हां...ए उ 'थै
अस्सी झुर्रियां, अस्सी कुरजां-मुहें पर जीवन दी कहानी
अस्सी ब 'रें दी 'बार' सरहद्दी
बीर रसें ने जिसदा इक-इक बोल ऐ धोता !
ए पक्खुनें दी बीर-प्रसू धरती दा जाया,
केइयें ब 'रें दी पिछ्छों मुड़ियै
उ 'नें गै गलियें फ्ही ए आया?
पर इस बारी ए ते ऐ परदेसी ल 'बदा
भीड़ें कोला ए घबरान्दा।
के तुपदा ऐ ?
पुछदा चलदा कुत्थें न गांधी दे सुखने?
कुत्थें ऐ गांधी दी हिकमत?
कुत्थें ऐ गांधी दी अज़मत?
कुत्थें ऐ ओ सादा जीवन?
कुत्थें ऐ ओ प्यार नरोआ?
कुत्थें गीत ओ भाई-चारे दे?
कुत्थें ऐ ओ सुच्ची मेहनत?
कुत्थें ऐ पर-सवारथ सेवा?
''वैशणव जन तो तेने कहिये
पीर पराई जाने रे!''
ए बोल जि 'नें गी रंगी गे हे
ओ थाहर-हवामां कुत्थें गेइयां?
तुप्पां करनां इस देसै दी गली-गली च
गांधी दे सुखने दे मोती
उसदे पैरें दी कोई ल 'ब्बै इक-अद्दी गै चि 'न्न-नशानी!
उसदे सुच्चे लफ्ज़ ओ प्यारे -
हर माहनू गी जीवन-झरने दा जल मिट्ठा पीना देओ!
मैहल अटारी देसा दी ए सग्गोसारी
तुसेंई मुबारक
पर इ'न्दे लम्में परछामें जिसगी रोकी लैता दा ऐ
कच्चें कोठें अन्दर थोड़ी धुप्प नरोई औना देओ !
मां दी ममता दे सब बारस
इस ममता दी सीर ऐ मिट्टी
मां दे बच्चें दे ओठें तक पुज्जन देओ
इस धरती पर स'बनें गी तुस खिड़ना देओ, उज्जिन देओ।
दस्सो ए अल्फ़ाज़ के होए?
मेरे जैकारे निं लाओ।
ना पैसे ना फुल्ल बरहाओ,
मेरे मनै दी बेदन बुज्झो
मेरे नैनें दी जलन पछानो!
दस्सो, कुत्थें गे ओ सुखने।
दस्सो, कुत्थें ऐ ओ जन्नत जिसदी खात्तर लोक लड़े हे
कोई थाहर ते दस्सो भाई,
जित्थें गांधी ल'ब्बी सकदा?
तुप्पै करनां, इस देसै दी गली-गली च
तुप्पै करनां शैहर ते नग्गर
सारा भारत तुप्पी आयां,
फुल्ल बड़े, खुशबोई ऐ निं,
कच्चे कोठें अन्दर हुन बी न्हेर-मन्हेरा,
बड़ा घनेरा,
उच्ची मढ़ियें दे परछामें बधी गे।
मेरा जै-जै कार करो नेईं
दुक्ख होन्दा ऐ!
मिगी तुसें हा रुतबा दित्ता- 'बादशाह, सरहद्दी गांधी'
कुत्थें गे ओ यार-यराने?
कुत्थें गे ओ सब मस्ताने?
मान्हू दा ए इश्क नशा हा,
वैहदत दा हा गीत सुरीला
ओ नमाज ही, ओ पूजा ही।
के करने में मान-कसीदे,
के करने में पर्स ते थैली?
मेरी इस मैली झोली इच ए निं सजदे
देई सको तां
अपने नैनें दे दो-चार नरोए अत्थरूं देओ
जि'न्देह कन्ने धोई सकां में
मैल मनै दी, घृणा ते नफरत
फ़िराकेदारी, ए कदूरत
खुदगरजी दी कालख काली।
पाई लैता,
सब किज भाएं पाई लैता ऐ
पर गांधी ओ सुच्चा हीरा
उसी गुआई बैठे ओ यारो !
मेरा जै-जै कार करो नेईं
देई सको तां
अपने नैनें दे दो-चार अत्थरूं देओ ! ✧