समें दी लचारी ऐ, औखी घड़ी ऐ,
उ'दे कन्ने चल, जिसदी औंगल फड़ी ऐ।
तूं कवता एं, गासा दे सैल्लें दी भुक्खी,
तूं ब्हारें-मल्हारें ते मैहलें दी भुक्खी;
जुआन्नी दी कलियें ते फुल्लें दा चाऽ ऐ,
तूं प्रीतै दी मनभानी गैह्लें दी भुक्खी;
तूं गजरें गी तरसें, दनासें गी तरसें,
तूं धामें ते गीतें ते कैह्लें दी भुक्खी।
रूपै दे बागैं च खेड़े दा चाऽ ऐ।
गतारें दी भुक्खी तूं छैल्लें दी भुक्खी॥
समें दी लचारी ऐ, औखी घड़ी ऐ,
उ'दे कन्ने चल, जिसदी औंगल फड़ी ऐ।
सैह्मे दे रुक्खें गी फुल्लें दी मीह ना।
घुटन बिस्स पीना ते झरें दा जीना।
मेरी धरती उप्पर नजारे डरे दे,
ए हीखी, हिरख, किन्द सारे डरे दे।
बड़ी ओपरी ऐ ए कहानी गै सारी।
ए रस्ते करस्ते, ए पैंडे न भारे,
ते तूं ऐं ज्याणी, पुआणी करां के?
समें दी लचारी ऐ, औखी घड़ी ऐ,
उ'दे कन्ने चल, जिसदी औंगल फड़ी ऐ। ✧