माहनू होइयै माहनू हत्थें
किन्ने हे लचार ए ।
तंग, न्हेरे, बेक्यासे, पिंजरें दी उमर कैद ।
बद-नसीबी दे हे रक्खर
जि'न्दा कोई अर्थ नेईं,
गुप्प-न्हेरे दे हे कैदी'
कोई दीया बी नेईं हा जि'न्दी जीवन-बत्तै पर,
जो सदा रेह सोचदे-
के आं अस?
ते की आं अस?
जो तरसदे रेह
हवा, पानी, ते नाजें दे गरोलें आस्तै;
इक नरोई ब्हाउ दे ऐसे फनाके आस्तै
ए घुटन, बदबू जिदें नै दूर होऐ ।
सोहल सरकंडे दुआलै जो मनै गी छूइयै ।
तरसी गे, ‘ओ नीर' पीने गी
जिदे ने आतमा दी प्यास चुकी जा,
जे ओठें पर जम्मी दी जमान्दरू लचारी
ते मैली सख्त बदबूदार चु 'बदी पप्पड़ी उतरै !
काशी च सारनाथ दे बौद्ध तीर्थ-स्थानें पर इक दिसम्बर 1972 दे दिन इक हजार हिन्दू हरिजनों
दा बुद्ध-धर्म च प्रवेश
ते नाजें दे उ'नें दानें गितै तरसे
जि'नेंगी खाई माह्नू गी सेही होंदा,
ओ माह्नू ऐ।
✧
युगें दी बदसीबी ने
हवा, पानी ते नाजें दे ओ दाने जुड़न नेईं दित्ते!
ते उ'न्दै लेई ए ठौंगर-देवते सारे
ओ सिल-पत्थर बने दे रेह,
नेईं जागे,
कुसै गी तरस नेईं आया!
घृना-नफरत दे मारे दे
ओ जिस धर्में गी मन्ने हे
उ'दे खंडें, उ'दे नेजें इ'नेंगी घाल कीता हा।
ए कुढ़दे रेह,
ए धुखदे रेह,
बलगदे रेत
न्यांऽ गित्तै,
समां इ'न्दै गितै पर नेईं ए बदलैआ बिन्दक
जबर बधदा गेआ,
नफरत घनी हुन्दी गई,
आखर
कुतै कोई चिनग इक सलगी,
बगावत
मुर्दा चित्तें च, पता नेईं कि'यां ए सुरकी
जे निकलो एस ‘न्हेरे’ चा
तरोड़ो एस पिंजरे गी,
चलो, ऐसी ज’गा चलचै
हवा जित्थें घृणा कन्ने ऐ बिस्सली नेईं
ते पानी पर पाबंदी नेईं!
इ'नें गुंगे ते बोले देवतें दी आस ए छोड़ो,
इ'नें ‘पोथें’ दे छौरें शा बचो, निकलो
चलो निकलो, चलो निकलो!
✧
ते काशी धर्म नगरी दे
ओ पक्के घाट दिखदे रेह,
ते गंगा गुनगुमान्दी, मुस्करांदी
कोल बगदी रही,
परम पावन किलेबन्दी ओ धर्मै दी
शिवें दी, न्यारी नगरी घुरदी रही गेई ।
ते उस बागी जगा उप्पर
कदें गौतम ने जिस थाहरा
ओ पैहला उपदेश दित्ता हा,
बगावत पैहली कीती ही ।
पुराना पिंजरा भन्नी
इक हजार, ओ लचार पंछी
जाई बैठे न इक नमें पिंजरें अन्दर
घाट जिसदा ऐ पुराना
थाहर, पर अन्दर जरा खु'ल्ला कुशादा ऐ,
मनुक्खी नफरतें दी घुटन नेईं
✧
परानी कैद छुड़की गेई
नमें गासा दी हीखी ऐ ॥ ✧