तूं-में दे तंग घेरे चा जो न्यारा होई गेआ,
ओदा गै फुल्लें-किरणें नै इक रिश्ता होई गेआ।
औंगल जो उट्ठी ऐ निडर, जालम गी दस्सी गई,
शारा उ'दा ओ लोई दा इक मिसरा होई गेआ।
गंगा च न्हो तूं भोलेआ, भां देवका च न्हो,
पापें तेरें दा लाज लै हुन सस्ता होई गेआ।
लायै यरान्ने यार हुन, करदे न यार-मार,
भोला ज़माना हा कदें हुन, खचरा होई गेआ।
इक्कै घरें च आपूं-चें पन्छानदे नेईं लोक,
जीवन दी सांझ भुल्ले दा इक किस्सा होई गेआ।
अनगिनत नज़रां प्यासियां, अनगिनत मन उदास,
तेरे शराबखाने तै ए, खतरा होई गेआ।