मते बारी रुत्तें भाएं फेरा पाया,
निहालप ही जिसदी ओ मौसम निं आया।
बड़ा गौह हा ममता दा जिस पत्तरै गी,
झड़ी पेआ जिस खिन, ओ होआ पराया।
जदूं बोट खादा कुत्तै कांएं इ'दा,
दना-भर गै बस्स रोन चिड़ियै गी आया।
गिले-शिकवे कैहदे, कोई रोह् निं रोसा,
असें फुल्ल राहे, तुसें हार पाया।
ए घर बसदा-रसदा, फ्ही रौला ए की ऐ,
'नां तूं किज बनाया', 'नां उस किज बनाया'।
जिसी ऐं'च समझी केई यार बेही गे,
मिगी उत्थों रस्ता असल नज़री आया।
नजर जीवनै सौ चराई इ'दे शा,
इसी खीर मोती ने गल अपने लाया।
ब्रह्मांड मंडुआ, अनेकां न पात्तर,
समें सूत्रधारै ऐ नाटक रचाया।
धरत नर्तकी मुजरे पाई-पाई निं थक्की,
ब' सूरज ने आखो जे बिंद बी सराहेआ।