मूढ़ माह्नू च किश बचार् नेईं होंदा,
फोक सुटदे न ओदे च सार नेईं होंदा।
हिंजड़े बी होंदे माह्नू न, पर उं'दै,
नाच होंदा ऐ, शकार नेईं होंदा।
शराब पीऐ, ओ गालियां कड्ढै,
तुखम गंदा, शरमसार नेईं होंदा।
गल्लें-गल्लें नै पहाड़ नेईं ट्ठोंदा,
जढ़ा ट्हौंदा ऐ, ओ पहाड़ नेईं होंदा।
ककोहे, बैर, किंब ते गरने,
इ'नें फलें दा फलोहार नेईं होंदा।
कदें होंदा हा मोतिया इत्थे,
हून ते ओ बी, मेरे यार, नेईं होंदा।
थोहर उगदी ऐ रक्कड़ें थाह्रें,
रक्कड़ें थाह्रें कंधार नेईं होंदा।
ओ झूठ हा, पूंजदे रेह् जिसगी,
हर कलगी आला 'सरदार' नेईं होंदा।
डीडो मरदा ऐ जादियें खातर,
यादगारें दा ओ हककदार नेईं होंदा।