बदले नेईं जे अस तां के बदले जमाने न,
दूरा दे ढोल सुनियै ते नच्चदे दबाने न।
कोहलू दे बैल रुकदे नेईं पुजदे बी कुत्तै नेईं,
अनमुक्क बत्त, जातरू पैरैं पुआने न।
खतरा ऐ; रस्ता बिखड़ा ऐ, कल्ले आं; लैना के ?
बे-हौसलें, तै रुकने दे अनगिनत बहाने न।
जेदे भरोसे बी चले, उस्सै ने लुट्टेआ,
किन्ने'री अस लटोए आं, राहजन बी रहाने न।
इं'दै गै मशवरें चली, बस्ती ए उज्वड़ी ऐ,
फी बी बसाह बने दा- ए पुज्जे दे दाने न।
हर इक दा शिकवा जे उं'दा, इं'दे च जिकर नेईं,
पुछदी ऐ धरत ए फिरी कोदे फसाने न ?
राजें दे किस्से राजें दे कन्ने गै मुक्की गे,
में ते सुनाने लोकें गी उं'दे फसाने न।