ओ कोई ग़ालिब बनै

दर्द जिसदा बैद-हकीमें दा मुत्हाजी नेईं होऐ,
जे कदें बी झुकियै चलने गित्तै राजी नेईं होऐ,
सद्दे बिन सुरगै च जाना बी जिसी मंजूर नेईं,
मान-इज्जत पाइयै बी जो होऐ मगरूर नेईं,
ओ कोई ग़ालिब बनै......
तंगदस्ती बी जि 'दी नजरें दा सुरमा होई जा,
ईन जिसदी उच्ची होइयै दूर गासें छहोई जा,

दुक्ख-सागर इच्छ जिसदा मन-कमल डुब्बै नेईं,
जो कदे' इनसानियत दे चित्तै गी चु'ब्बै नेईं
ओ कोई ग़ालिब बनै

हद्द्रां-बन्ने धर्म-जाति दे जिसी रोकन नेईं
तरक-मैज़र दोखियें दे, ए जिसी टोकन नेईं,
हर बोल धोता जा जि'दा, हर भाव होए दिलफरेब,
अपनी रूह दी गल्ल करदे, जिसगी होए दरेग,
ओ कोई ग़ालिब बनै.....

मयपरस्ती इच्छ बी बैहकै नेईं, भुल्लै नेईं,
बेमजा जीनें दी लज्जत पर जड़ा झुल्लै नेईं,
पारसाई जिसदे ऐबें दा सदा पानी भरै,
सैहज गल्लें अपनीयें पैग़म्बरी आनी धरै,
ओ कोई ग़ालिब बनै....

दीवानगी जिसदी समें शा दूर अग्गें चलदी जा,
जिसगी किरणें दे सम्हाले देई करि संज ढलदी जा,
तंग-नजरी गी जड़ा समझै कुफर दी राधना,
ओ कोई ग़ालिब बनै....

दास्तां अपनी जड़ा खून-जिगर कन्ने लिखै,
जिन्दगी दे गीत जो सुच्चे फिकर कन्ने लिखै,
सादगी पर मरने दी हसरत लेई जीए जड़ा,
ज़मज़मे पर बेहियै बी अपनी गै 'मय' पीए जड़ा,
ओ कोई ग़ालिब बनै....

नेईं सुन्नै-सुनियै बी जो जेकर बुरा बकदा कोई,
नेईं करै चर्चा कदे', जेकर बुरा करदा कोई,
रोकी लै, दिक्खै जडूं कोई गल्त बत्ता पर चलै,
बक्शी देऐ हिस्सियै, अनजान जे गलती करै,
ओ कोई ग़ालिब बनै....

जो हंगामे दा सुदाई, रोशनी दा तलबगार,
नग़मे खुशी जे नेईं, दुक्खें दा रोना गै बहार,
जिसगी तमन्ना गै नेईं शोहरत-सिले दी बी कोई,
गल्ल निकलै गै नेईं मुंहां गिले दी बी कोई,
ओ कोई ग़ालिब बनै.... ✧