मेरी किताब—तेरी किताब

मेरी किताब
इक किरण,
धर्म, जाति, रंग, धरती दी नेईं कैदी जड़ी ।

मेरी किताब,
    आदमी दी नज़र गी निरमल करै,
    सृष्टि दे सौ राज़ खोल्लै,
    आदमी दी सोच-समझ गी बझालै
    प्यार करियै, मुस्कराइयै, उसगी आखै -
    भोलिये, पन्छान अपना-आप तूं,
    तुम्मी किरण,
    ऐसी किरण, न्हेरे जिसी घेरी लेआ,
    तूं बेखबर, तुम्मी किरण ऐं जाग तूं,

मेरी किताब,
    रोशनी जिसदी कदै घटदी नेईं,
    चन्न-सूरज स'बनें थों सिरमौर ऐ ।
    ए नेईं हुन्दी कदै
    तां सैकड़े ए चन्न-सूरज बी तेरे
    दूर करी सकदे नेईं
    अज्ञानता दे गुप्प न्हेरे ।
    आदमी, तां आदमी बनदा कि'यां ?

मेरी किताब,
    ए मेरी मिट्टी दी खुशबू,
    ए मेरी धरती दे बेटे दी चमक,
    उ'न्दियें सोचें दा अमरत,
    सुच्चे खिनें दी साधना,
    कोमल दिलें दी लालसा
    ए रोशनी दी कामना ।

मेरी किताब !
    आदमी लेई आदमी दा प्यार ऐ,

ज़िन्दगी दा गीत ऐ-सिंगार ऐ।

           ×        ×        ×

      ते ए मेरी दुनिया दे मालक !
      ए जड़ी तेरी किताब !
      धर्म, धरती, रंग, जाति दी आवाज़,
      हर कुसै दा अपना राग !
      आदमियत दा भंडारा ए करैं,
      ए नमें झण्डे झुलाS,
      ए नमें नाहरे देऐ।
      इतिहास सारा ए मेरा-
      तेरी कताबै दा असर।
      सौ लड़ाइयां कतल-गारत
      बरबादियां मारू जेहाद,
      तबलीग ते तेगो-तबर
      तेरी कताब !
      आदमी गुमराह,
      मंजल दी तलाश
      गुप्प-न्हेरे च हठीला गीत ऐ-
      बे-सुरा, लै-ताल जिसदी नईं रलै,
      तेरी कताब ! ✧