हर लैहर कनारे गी हांबे, पर कदैं कनारै रुकदी नईं,
जिच्चर न्हेरें दे घेरे न, लोई दी मंजल मुकदी नईं।
धरती दी प्यास बुझाने गी, बदलें ते बरदे रौहना ऐ,
सृष्टि दे औंकर जो पालै, प्रीतै दी सीर ओ सुकदी नईं
बिन्द पुच्छो सूरज-चन्नै गी-
अड़ेओ, खिड़ी-खिड़ियै अक्के नईं ?
जोतें गी पुच्छो, जलने दी-
ए बेदन किच्चर जरनी ऐ ?
बाऊ गी पुच्छो, पैरें दे
छाले बनि-बनियै पक्के नईं ?
मंज़ल ते नां ऐ मोती दा,
जीन्दे जी कोई मंज़ल नेईं।
ए पाले गलियै मुक्के नेईं,
दरयाएं भाखे डक्के नेईं ॥
हर किरण मंगदी लोऽ नमीं, अम्बर नमां, थिरकन नमीं,
हर प्रीत मंगदी मन नमां, सुखनें नमें, धड़कन नमीं।
हर लैहर मंगदी तट नमें, पनघट नमें, सागर नमें,
हर गीत मंगदा सुर नमां, अक्खर नमें, बेदन नमीं ॥ ✧
[1967]