काली धरती
जागै करदी काली धरती, जागै करदे काले लोग,
काले चन्न लगे हून चढ़ना, चिट्टे चन्न दा केह्र होग?
रोडेशिया-साऊथ अफ्रीका
अफ्रीका दी छाती उप्पर बैठे अजें बी चिट्टे नाग,
काल कौरिया बीन बजान्दा, आवै बिसले राग।
बीतनाम
ऐरावत हाथी ने कीता कमल-सरोवर इक बरबाद,
फसी गेआ नंददू दे जालें, लौहका सर ओ होआ अगाध।
अमरीकी नीगरो
सुरगुपुरी इच खलबल पेदी, गौरे इन्दर हैन हरान,
वृत्रासुर दे सैनक अपना लेई आए काला भगवान्।
दीवान विद्या मन्दिर
डोगरी भाशा दे (अ)पराधी खंडर, पाप मस्हा करदे,
डुग्गर ज्याणें दे पैरें दी धूड़ सिरै पर ला करदे।
नमीं भाशा-नमें अर्थ
नमें शिकारी, तीर नमें न, मिरग कुदाड़े भरदा जा,
कोई आखदा चरम लोड़दा, कोई आखै कनक निं खा!
ताशकन्द
कोसीजन ने सादे भेजे, इक संवत् ते हिजरी गी,
ताश खडारी, दाऽ अमनै दा, ‘कन्द’ गलान्दे मिशरी गी।
क्रिसमस
प्यार दा अमरत-मुल्ल चकाइयै, मोह्रे पीने पौन्दे न,
इक गद्दी दे जन्म-दिहाड़ै लक्खां मस्तक नौन्दे न।