कु’न केड़ा ऐ दिन जदूं कोई हादसा हुन्दा नेईं?
नागहानी मौत अपने रूप ते दाऽ बदलदी।
रोज हुन्दे हादसे, ते रोज खबरां पढ़ने आं,
पर इ’नें खबरें दा कोई असर किज हुन्दा नेईं।
ए बी सहाड़ी सभ्यता दी, मारके दी पकड़ ऐ,
आदमी दी सोच, तन-मन सब होई जन्दे मशीन।
हादसे दी खबर पढ़ियै जे कोई हौका भरै,
लोक मुस्काइयै गलान्दे-‘ए अजें कमजोर ऐ’।
मिम्मी कोई अपवाद नेईं, मिम्मी नेईं कोई देवता,
हादसे गित्तै मेरी छात्ती बी सिल-पत्थर बनी।
अज्ज पर ए चानचक्क किज गल्ल होई होर नेईं,
इक खबर ऐसी सुनी, चु'बदी गेई कंडे नेही,
होर कोई खबर सुनने दा फिरी थौह नेईं रेहा।
खबर ही इक माऊ दी पंज हे पुत्तर जिदे,
चार उसदे लाल देसै पर नछावर होई गए।
दो मुहाज़े पर मोए, इक लापता, इक ज़ख्मी ऐ।
सोचनां दुद्दै उ'दै इच, ऐसा के अमरत्त था जो,
पी लेआ लालें जि'नें, मौतै दे आशक होई गए!
पी लेआ जामे-शहादत, अपने देसै दे लेई,
तेरे दुद्दै दा चुकाया रिण सुरखरू होई गए।
मान मित्ती दा बढ़ाया, नां करी गे बैंस दा-
इक कहानी होर राजस्थान गी देई गए।
कुत्थें राजस्थान ते कुत्थें ओ नेफा ते लद्दाख!
एकता दी लीकरें गी ल'ऊ नमां ओ देई गे।
मां उसी मां आखना बी सूरमें दी परख ही,
अस उसी किस मूंहे कन्ने आखचै मां-अपनी मां?
अस जि'नें इस संकटै पर त्याग कोई कीता नेईं,
रोहै कन्ने अक्ख बी नेईं लाल जि'न्दी होई सकी।
अस जि'नें दो गीत लिखियै चाल गै बदली लेई,
जां कुत्तै नाहरे उचारे, चीन गी गाली देई।
सूई कन्ने दरदे-दरदे औंगली गी त्रिम्बेआ,
तिलक लाने गी सपाहियें गी कुत्तै तुपदे फिरे।
रेशमी ऐ टोर, सारा तन-बदन ऐ रेशमी,
एस संकट दी घड़ी गी बी तमाशा थापेआ,
अपनी शोहरत दा बनज करने दी मंडी जानेआ,
चीन बैठा बन्ने पर, खेडें गी दिखदा मुस्करा।
जे उ'दै कपटै दे बदलें लेई कोई नेहरी बी ऐ,
जे उ'दै मनसूबें दे चन्नै लेई कोई राहू ऐ,
तां उ'थै नेही मां कोई, दुर्गा कोई, कुन्ती कोई!
ते धरत इस देसै दी ऐसी मामें बिन खाली नेईं।
गरजदे बद्दल जड़े ओ गरजदे, 'ब'रदे नेईं,
ब'रने आली बदलियें दी छेड़ बी सुनचै नेईं ॥ ✧
[1962]