मन ते गास

कदैं सीतल फुहारां न, कदैं लूऐ दा फेरा ऐ,
इ'नें रुत्तें दा मैहरम गास जां फही मन ए मेरा ऐ।
ना इस फैलै दे गासै दा, कुसै कोई अन्त गै पाया,
ना अपने इस मनै दा भेद गै समझा मेरी आया।
दिनें अक्सर ए नीला गास सुन्दर झील सेही हुन्दा,
ते मन अपना ही केईं बारी ए सम्मन-सील सेही हुन्दा।
ए सूरज चमकदा सृष्टि दे कल-पुरजे चलांदा ऐ,
मनै दा हौसला उ'आं, मेरी बत्ता सजान्दा ऐ।
ए अम्बर पै'छियें दे डार उडदे गीत गान्दे न,
बड़े चंचल केईं अरमान मन मेरा सजान्दे न।
चमकदे अनगिनत तारे निराले रूप ओ दसदे,
मनै दी एस झीलै च मेरी मेदें दे फुल्ल हसदे॥ ✧