हीखी दी जोत

समां चुपचाप, ब्हाड़ गुमसुम, दुआसी कुन्न खलारी ऐ?
नज़र हाम्बा दी, सेही हुन्दा, इसी कोई इन्तजारी ऐ!
सफर रातीं दी बत्ता दा निं मुक्का, सोचदा दीया-
जला करदी बजोगन ए, मेरी हिम्मत की हारी ऐ?
मनै दे रंग बदलन तां, बदलदे रंग दुनिया दे,
जलान्दी चाननी लगदी पुरै दी पौन आरी ऐ।
बजोगें च समें दी गैं, रुकी दी की सेही होन्दी,
धड़कदा कालजा, कम्बदी ए देह कोमल बचारी ऐ।
ए देह, हारी दी झरै दी, मनै दा साथ नेईं दिन्दी,
इं'दे पैरें च बेड़ी ऐ, भरै दा मन डोआरी ऐ।
इं'दे फुल्लने दे दिन आए तां 'पालें' बूर खूसी ले,
ए कोमल बेल सोचै दी मेरी किस्मत गै हारी ऐ!
ए अन्जाने कठन रस्ते ते मंजल दूर छप्पी दी,
ब हीखी ऐ चला करदी, ना थक्की ऐ ना हारी ऐ।
जड़ी घड़िया गिन्नै करदी मनै दी धड़कनै कन्ने,
उसी ए दिन ब'रें आंगू, उसी ए रात भारी ऐ।
समें ने रोग लाए दे, समें दै हत्थ कारी ऐ।
जि'दी नजरें च, चित्तै च, मन दी धड़कनें अन्दर,
समाया जोग हीखी दा, ओ जलदी जोत न्यारी ऐ॥ ✧