ढोल,ढोलिया, डगा,
ए त्रैवै
हिरख-सम्होदें इक दुए दै,
इक दुए दी रूह पन्छानी लैंदे जेल्लै,
सूखम तार मनै दी कोई कम्बिन लगदी
तां लै जागै, घेरा ब'न्नै-
हत्थ डोलिये दे होई सोहगे, चौकस होइयै
मनै दी तारें बिच्चा जनमे
सूखम शारे दी भाशा गी समझी लैन्दे ।
हुकमें बज्झा,
जोड़-जोड़ जदूं थिरकी पौंदा
ताल जागदा,
दूरें-कोलें, अग्गें-पिच्छें
हवा दे कन्ने रासां पांदा
कुड्ड, फु'म्मनी, नटी, डंडारस,
जोश-भरोचा, नाच भांगड़ा।
ताल बड़ा ऐ कामरूपिया;
सौ-सौ रूप बनाई सकदा।
स्हाड़े इच बी ढोल कुतै ऐ
डगा कुतै ऐ
सेई रेहदा ऐ मड़ा डोलिया!
तां तालै शा खुंझै करने
तां लै दा लश्कारा नेईं ऐ! ✧