काया दा सन्ताप मिटै, जे पीड़ मनै दी शीतल होऐ,
के बिजली दा हासा जेकर, धरती दा मन कुढै ते रोऐ!
ब'री गे ब'रने आले आइये, अपना धरम नभाई गे ओ,
अध-प्यासे रेह प्राण तड़फदे, ब'रियै प्यास बधाई गे ओ,
रेह् अरमान, सुलगदे अन्दर, जखम निं ओके बिन्द भलोए।
कितकारी ए बदल ब'रे दे!
कुतै ब'री गे, कुतै ब'रे नईं, ए बरखा दी रीत न्यारी,
कुसै दे बागें झड़ियां लग्गन, सुकदी रेही कोई सोह् ल क्यारी,
कच्चे कोठें दे मन धड़कन अन्दर चार घड़ी भर ब'रदी रौह् न्दी।
जड़े इसी तरसे दुखियारे, ओ इसदे औने पर रोए।
कितकारी ए बदल ब'रे दे!
इ'न्दा मिट्ठा पानी, स्वाड़े खारे पानी दी इक छल्ली,
जिसने किट्ठे होइयै जाइयै गोद समुन्दर दी ऐ मल्ली।
ओ खारा जल जुगें-जुगें दी कसक, कसालें दी ऐ कहानी,
तां रत्नाकर नां उसदा ऐ, तां अमुरत दा घर ओ पानी,
लोक गलान्दे पौन फुहारां, अ'ऊं आखां कु'न-कु'न ए रोए ?
कित कारी ए बदल बरे दे! ✧
[1958]