इस पैदा' पर कल्लं जड़ा इक लेख हा लिखेआ,
कल्ला दा ओ लेख रहा ऐ कल्लै कन्ने,
कल्ल हे किन्ने नमें-नमें
ओ अक्खर उसदे
अज्ज पराणी गल्ल होई गेई,
पैडा दे इस कोरे-चिट्टे कागद उप्पर
चि'न दना रेही गेदे ओदे।
पर ए काकल करै निहालप,
नमें अक्खरें, नमें बचारें उतरी औना
तल्लक जि'न्दा अज्जै कन्ने।
कल्ला दे ए चि'न्न-नशान निं स्हान इसगी
की जे कल्ल ते होआ बीता,
अज्ज नमां ऐ
नमां लेख लिखने दी हीखी,
कोरापन ऐ इ'दा कुआरा,
कोरे दा कोरा निं रेही जा!
'कल्लं' नि होई जा इसदा बी ए अज्ज सुहामां!
'कल्लं' ते माहनू दा नेईं हुन्दा
ए हीखी ऐ जां लचारी?
जि'यां ए ठंडू दे दिन न
ठार बड़ी ऐ,
फही बदलोखी !
कल्ल ओ जेड़ी धुप्प ही फैली
कुन्दन रंगी कोसी-कोसी
अज्ज कुत्तै नेईं,
पर कल्ला दी धुप्प सनैहरी
अज्जा लेई कित कारी ऐ ओ?
अज्जै दी मद्दम-मद्दम
झुलसी-झुलसी,मरियल धुप्पड़ी
जैसी बी ऐ
इत्थै सच्च ऐ
जे बदलें दे पर्दे सरके
तां इस्सै ने दिखदे-दिखदे
गर्म होई जाना,
'अज्ज' मेरा इस्सै नै बज्झा¹ ॥ ✧