इ'नें रंगें 'नै माह्नू ने कला गी रूप दित्ते न,
इ'नें रंगें कला दा मौन छुड़काइयै,
उसी सुर-ताल ते, लै-बोल दित्ते न;
तां इक पैछी दी मौती ने
उस अक्खड़ सुध साधै गी¹,
अमर कवता दा बर देइयै
ओ पैह्ला काव्य² लिखने दा अमर जस्स-मान दित्ता हा;
उ'नें रंगें गी लेइयै गै
कुसै³ भेजे हे बदलें हत्थ इक प्रेमी दे संदेसे;
उ'नें रंगें गी लेइयै गै-
अमर हिरखै दी मूरत ओ "शकुन्तल" ही रची उसने।
ए मीरां, सूर ते रसखान, तुलसीदास सारे गै
उ'नें रंगें दे साधक हे
उ'नें रंगें गै दित्ते हे असेंई 'मीर' ते 'ग़ालिब'
गुरु नानक ते बारसशाह।
उ'नें रंगें गै दित्ते हे
अजन्ता, ताज ते आबू,
ते दक्खन भारतै दे केईं कला-मन्दर जगाए हे,
केईं नन्दन बसाए हे,
जि'नेंगी अज्ज बी दिक्खी, मनै दी मैल उतरी जा,
नजर मैली धनोई जा
- बाल्मीकि 2. रामायण। 3. कालिदास (मेघदूत)
ते स्वारथ भावना अपनी गी, मन सोचै छैपैली लें,
उ'नें रंगें च डुब्बी जां!
जि'नें रंगें दियें तांहरों,
सिलें दे खुरदरे, अनघड़ ते बदसूरत ब'रूपें चा-
कला दी छैनियें कन्ने,
लगन अपनी दे छोड़े पै,
जगाए भाव ओ कोमल,
शलैपें दे, प्यारें दे, सचाइयें दे, तपस्या दे
जे एही इतिहास बीते दा
घने चेतें दे नेरें शा
निकलियै बाहर आई बैठा।
ते सुन्ने मन्दरें दी कहानियें गी बी नमें सिरलेख ल'ब्बी गे,
धर्म ते आस्था गी एही नमें सहारें दा बल थ्होआ।
उ'नें रंगें दे मन-मौजी मिले बरदान हे ऐसे,
जे इस देसें दे हर लाके च
(अ)नेकां साधकें अपने मनै दी साध रंगी लेई,
ते कोमल भाव मस्ताने
उ'नें रंगें च ब'न्नी ले;
ते अनगिननी कला-कृतियां
हज़ारा मूरतां, लक्खां गै चित्तर
ओ बने, हस्से
तां सेही होआ-
मन अन्दर मनुक्खै दै
कनेह कोमल शलैपै न।
कनेहियां अमर व्हारों न।
कनेह सुरगी, मधुर, कोमल ते सूखम गीत बसदे न।
मेरी अपनी, भलौकी, एस धरती पर
उ'नें रंगें दियें सतरंगियें पीहंगें लोआरे ले,
तां शरमौकल शलैपै गी नमां शंगार थ्होआ हा,
तां उस रूपै दे ओ चरचे
बड़ी दूरै तगर गे हे
बसोहली, काँगड़ा, जम्मू,
कला दे प्रेमियें गित्तै
नमें तीरथ बनी गे हे।
ते ए धारां !
ए सैलियां धारां,
मेरी धरती दी छात्ती पर,
ज्याणें जागतें आंगू,
उ'दी ममता दा दुद्ध पीए,
ऐ जि'न्दी अक्खीं लग्गी दी-
ए धारां, सैलियां धारां
जि'नें भागु ते गिलमू दा हिरख-बलिदान दिक्खे दा,
जि'नें रोन्दी, बिलखदी चैञ्चली दे नीर ले गोदा,
जि'नें नेकां भलोके प्रेमियें दे हासें-हौंकें गी
नमां संगीत दित्ता हा,
नमें सुर-ताल दित्ते हे,
मधुर लै-बोल दित्ते हे;
जि'नें धुखदी जोआन्नी दी बजोगी वेदना उप्पर
नरम ते रेशमी गीतें दे फाहे आनी रक्खे हे;
जि'नें गीतें मेरी धारें दे प्राणें गी कम्बाय़ा ऐ,
जि'नें गीतें मेरे जाड़ें दी चुप्पी गी झुनक दित्ती,
जि'नें गीतें च जोबन, प्यार, ममता दा अमर रस ऐ।
जि'नें गीतें च माह्नू दे मनें दे भेद छप्पे दे,
जि'नें गीतें च धुंधां न बदलियां न फुहारां न,
जि'नें गीतें च हीखी दे सबेरे झांकदे ल'बदे,
उ'नें गीतें च के नईं ऐ।
इ'नें रंगें बिना सुश्टि?
ए इक सुनसान-जन हुन्दी,
बड़ी बेजान-जन हुन्दी,
जे हुन्दी बी तां सेही हुन्दी,
बजोगन कोई दुखिया ऐ,
घिरी गेदी नराशा दियें धुंधें च
जि'नें धुंधें उं'दा जीवन, शलैपा खाई लैता ऐ।
इ'नें रंगें बिना सृष्टि कदैं शंगार जे करदी,
तां सेही हुन्दी,
नलज्जी बेसवा कोई
जिसी बस देह गै प्यारी ऐ,
मरी गेदी ऐ जिसदी आतमा, ममता
ते कोमल प्यार करने दी
जिसी कोई रीत नेईं भाखी,
जिदा स्त्रीत्व अंगें दे झरोखे इच बैठा दा,
शकारी दी नजर लेइयै
चबक्की अपने दिखदा ऐ।
इ'नें रंगें बिना साथी,
ए दुनिया किन्नी फिक्की ही।
ए दुनिया किन्नी पैली ही।
ए दुनिया किन्नी निरधन ही।
इ'नें रंगें गित्तै मुड़ियै
असेंगी साधना करने दे, प्रण पाने दे दिन आए -
उ'नें रंगें गी फही मुड़ियै॥ ✧
पौड़ां¹
लम्मे उच्चे ए सफेदे, उच्ची तांहा-जन भुजा दे,
र्रोंहगे दियां र्रीहगां, रखवाले इस घाटी² दे।
कुंगालियें टालियें च ऐंठ ऐ, गमान ऐ ;
गमान एस भुजा दा ;
ऐंठ एहदी राखी गित्तै सोहणे खड़े रौहने दी,
इ'न्दे बिन घाटी? बिन पुतरें दै मां जि'यां।
अति ऐ गोहाड़ इन्दा, ओपरा शैलैपा ऐ,
साधना कमाल तप-त्याग बे-मसाल ऐ।
इ'न्दा ए गोहाड़ मान,
स'ब्बै किश पौड़े करी
पौड़ां, जि'नें, मित्तिया दे दूर ख'ल्ल जाई करी,
धरती दी आत्मा नै मित्तरी ऐ पाई दी।
झोंगे चनार, ममता दा खलार,
जि'यां शान्त-रस सूफी, प्रीत जोत मन बाली दी।
मीत एमनी नमानी दे,
देयै दे प्यार, कोई भेद-भाव भाखा नेईं,
भुल्ली-भुल्ली गेदे इत्थें आए परदेसी जन³
- जढ़ां 2. कश्मीर 3. चनार ईरान थमां आन्दे गे हे
धरती ने गोद लेआ हिरखै दा दुद्द दित्ता,
तन-मन दमँ उ'नें लोरियें च पाले इ'यां
सेही ओआ, सुरगै दा राज ध्वोई गेआ ऐ।
अज्ज इ'यां ऐ बझोन्दा,
जुगें-जुगें दे न साथी दमँ,
घाटी दे ए सन्ता; घाटी इ'न्दा तपोवन ऐ।
अति ऐ गोहाड़ इ'न्दा ओपरा शैलैपा ऐ
इ'न्दा ए गोहाड़, मान,
स'ब्बें किश पौड़ें करी!
पौड़ां जि'नें मित्तिया दे दूर ख'ल्ल जाई करी
धरती दी आत्मा नै मित्तरी ऐ पाई दी।
झीलें, सरें, सूटें, नालें, झरने दी सौंगी¹ जड़े,
अनगिन झौंगरे, सुन्हाके रुक्ख बैंदै दे।
गोरियें दे रेशमी मलैम लम्भे केस आंगू
बल-बल खाई-खाई पौन ताल्लिया ए जिन्दियां,
कुड़ियें कुआरियें बचारियें दै आंगू जड़े,
जित्त थाहर लाए उस्सै थाहरै गी बसाई दिंदे ;
कला दे शैलैपे अंगें-अगें च समाए दे,
प्रीतै आले पानिया दे घुट्टै गित्तै हम्बै दे
अति ऐ गोहाड़ इ'न्दा, ओपरा शैलैपा ऐ
साधना कमाल, तप त्याग बे-मसाल ऐ।
इ'न्दा ए गोहाड़ कला, प्रीत-भाव सुच्चा ऐ,
स'ब्बें किश पौड़ें करी,
पौड़ां जि'नें मित्तिया दे दूर ख'ल्ल जाई करी,
धरती दी आत्मा ने मित्तरी ऐ पाई दी॥
हजारां रंग फुल्लें दे, ए धानी सैलतन बांकी,
नज़र हारी जा जिन्दे' शा उ'नें धानें दी फसलें दी,
जोआनी, नाच ते मस्ती, कला, सुद्धै ते रंगें दी,
ए मेले, नाच मस्ताने, ए मिट्ठे गीत हिरखै दे,
अमर बाणी ओ लल्ला दी, ओ बागी गीत 'मजहूरी',
गनी, हब्बा दी ओ कविता बड़ी अनमुल्ल दौलत ऐ।
अमर जोबन ऐ घाटी दा, ए सब सुन्दर लसान्नी ऐ,
- सौंगी = कोल।
इ 'दा कारण ओ पौड़ा न जि 'नें मित्ती दा मन पाया।
उं 'दी ममता दा रस पीता, उ 'दी ममता दा रिण दित्ता॥ ✧