भला, ए रंग तेरी मूरतें दे अत्त गूढ़े की?
बड़ी निरमैल दुनिया ऐ, बड़ा पैन्ना गोहाड़ इ 'न्दा,
भलोकी इस बस्ती च बझोन्दे ओपरे अड़ेआ !
- मेरी धरती दे भलोके मनुक्खें
ए बस्ती होर चाल्ली दी चबक्खी रंग फिक्के न,
फिरी ए रंग तेरी मूरतें दे अत्त गूढ़े की?
तेरे फं 'नें च बल जे ऐ, तां गासें दूर गी जन्नां?
बिछी दी भुंज दूरा तक, तुगी सददी तूं सुनदा नईं।
तूं इ'त्थैं लैन जन्ना ऐं तां परती फ्ही तूं औन्नां की?
मेरी भुं 'जा देआ बासी तुगी गासा दी ममता की?
इ'नें गैहलें, इ'नें झुग्गें, इ'नें धारें इ'नें जाड़े,
असें बस तरसदे रौहना, असें बस बलगदे रौहना!
तूं स्हाडा ऐं, ब'अस सारे तुगी की ओपरे लगनें,
जे तुपदा तूं तां भुं 'जा बी बह्नेरे रूप बलगै दे।
की माह्नू मूरतें अन्दर बनानां होर चाल्ली दे?
शलैपे देवतें सुरगै दे कैसी तूं बनानां ऐ,
भला ए स्हारदे-जरदे-न कि 'यां सरदी-गरमी गी?
ओ मोह्मल ब्हार कुत्थें ऐ, जिसी बेदन गै भाखी नईं?
जि 'दा गही ओ भिड़डां लेई, सदा धारें चढ़ी जन्दा,
कदें तूं तड़प उस गौरां दे गीतें दी सुनी लैन्दा!
ओह्दे अंगें च बस्सेदा शलैपा आले दिन्दा ऐ,
ओह्दे हौंकें ते सूंक्कें ने इ'नें धारें दा मन डोल्ले ॥
ए शिब्बू बी निं भाखा तूं, जुआनी, जिसगी सोह्वै दी,
जड़ा कुप्पड़ ते दन्दें दी बी दाड़ें गी गिनी लैन्दा?
सुन्हाका, बांकड़ा, भोला, बदल बसदा ऐ बौली च,
एदे गीतें च, परसें दी सुगन्धी सुर जगान्दी ऐ ॥
कदें चक्की दे सुर मिट्ठे तेरे कन्ने गी नईं भाए?
कदें खुहें दी मन्नें पर तुगी हासे सुनोचे नईं ?
कदें लोरी दे सुर मिट्ठे तेरे चित्तै च नईं आए ?
कदें गिल्लू निं दिक्खे तूं, ओ सुच्चे फुल्ल धरती दे!
धड़कदे मन, गरीबी दे तरसदे बिन्द स्हारे गी,
चमकदे नैन दिन-रातीं दुआसी च संगोचे दे।
कदूं दे बलगदे कहानी कोई मैहरम सुनी लैन्दा,
तेरे पर आस लाई ही, तूं नजरां गै मलान्दा नईं!
ए मन तेरा ऐ सेही हुन्दा, तेरी जिन्दू दे काबू नईं,
तूं इसगी की करस्तें च चला करनां, नसां करनां?
असेें गी छलने आलेआ, तूं आपूं गी छला करनां,
चला करनां ऐं सहाड़े ने, ब सहाड़ी पीड़ तेरी नेईं ! ✧ [1958]